ەلىمىزدە ەرەكشە قورعالاتىن 6 تابيعي اۋماق قۇرىلادى
استانا. KAZINFORM - ەلىمىزدە ەرەكشە قورعالاتىن 6 تابيعي اۋماق قۇرىلادى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ ايتتى.
- بيولوگيالىق ارتۇرلىلىكتى ساقتاپ قالۋ جونىندەگى كونۆەنسيا اياسىندا قازاقستان رەسپۋبليكاسىنىڭ مىندەتتەمەلەرىن ىسكە اسىرۋ ماقساتىندا «ەلىمىدىڭ بيو ارتۇرلىلىكتى ساقتاۋ تۇجىرىمداماسىن» ازىرلەۋ جۇمىستارى جۇرگىزىلۋدە، تۇجىرىمدامانىڭ جوباسى ەل اۋماعىندا ەرەكشە قورعالاتىن تابيعي اۋماقتاردىڭ الاڭىن 12,5 پايىزعا دەيىن جەتكىزۋگە مۇمكىندىك بەرەدى. بۇگىنگى كۇنى ول 11,3 پايىزدى قۇرايدى، - دەدى دانيار تۇرعامبايەۆ.
وسى رەتتە ول 6 ەرەكشە قورعالاتىن تابيعي اۋماق قۇرۋ جوسپارلانىپ وتىرعانىن ايتادى. ولار: ارال، جايىق ورمانى، ەرتىس جايىلماسى تابيعي رەزەرۆاتتارى، تۇكتى ۇلتتىق پاركى، مەركە وڭىرلىك پاركى جانە قىزىلقۇم قورىعى. مۇنان بولەك ءۇستىرت، قاراتاۋ قورىقتارىنىڭ، اقجايىق جانە يلە بالحاش رەزەرۆات اۋماقتارىن كەڭەيتۋ كوزدەلگەنگەن
- ۇلتتىق پاركتەردەگى ەكولوگيالىق تۋريزم - بۇل قورشاعان ورتاعا مينيمالدى اسەر ەتە وتىرىپ، تابيعي اۋماقتاردى تانىپ-بىلۋگە باعىتتالعان جاۋاپتى ساياحات. سوڭعى جىلدارداعى ستاتيستيكالىق دەرەكتەر تۋريستەر سانىنىڭ بىرتىندەپ ءوسىپ كەلە جاتقانىن كورسەتەدى. ماسەلەن، 2024 -جىلى ەرەكشە قورعالاتىن تابيعي اۋماقتارعا شامامەن 2,8 ميلليون ادام بارعان، بۇل 2023 -جىلمەن سالىستىرعاندا 400 مىڭعا كوپ، - دەدى كوميتەت باسشىسى.
ايتا كەتەيىك، ەرەكشە قورعالاتىن تابيعي اۋماقتاردى پايدالانعانى ءۇشىن تولەم ۇلتتىق پاركتەردىڭ ەسەبىندە قالادى.
اۆتور
مارلان جيەمباي
