ەلىمىزدە مال ۇرلىعى جازاسى قاتاڭداتىلدى

استانا. KAZINFORM - ەندى مال ۇرلىعى قايتالانعان جاعدايدا اۋىر قىلمىس سانالادى. بۇل تۋرالى ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ ءمالىم ەتتى.

- مال ۇرلىعى ءۇشىن قىلمىستىق كودەكستە جەكە باپ ەنگىزىلدى. ۇرلىقشىنىڭ مۇلكىن تاركىلەپ، 12 جىلعا دەيىن باس بوستاندىعىنان ايىرۋ قاراستىرىلدى. مال ۇرلىعى قايتالانسا جانە قورادان ۇرلاعان جاعدايدا جازا قاتاڭدايدى، ياعني اۋىر قىلمىستار ساناتىنا جاتادى، - دەدى شىڭعىس الەكەشيەۆ ۆەدومستۆودا وتكەن ونلاين باسپا ءسوز ءماسليحاتىندا.

رەسمي وكىلدىڭ ايتۋىنشا، اتالعان جازا ءتۇرى ەكى جاقتىڭ ءوزارا تاتۋلاسىپ، ۇرىنىڭ جاۋاپكەرشىلىكتەن جالتارۋىنا جول بەرمەيدى.

ايتا كەتەيىك، تاياۋدا ءماجىلىس دەپۋتاتى ماقسات تولىقبايەۆ شىعىس قازاقستاندا مال ۇرلىعى ءورشىپ تۇرعانىن ايتىپ، ىشكى ىستەر مينيسترلىگىنە ماسەلەنى نازارعا الۋدى سۇرادى.

اۆتور

داۋلەت ىزتىلەۋ