ەلىمىزدە كۇنكورىس دەڭگەيى بويىنشا وزگەرىستەر قارالىپ جاتىر

استانا. KAZINFORM - ءاربىر بەسىنشى قازاقستاندىق مەملەكەت جاعىنان الەۋمەتتىك قولداۋ الىپ وتىر. بۇل تۋرالى پرەمەر-ءمينيستردىڭ ورىنباسارى تامارا دۇيسەنوۆا ءمالىم ەتتى.

«الەۋمەتتىك قامسىزداندىرۋ ماسەلەسىنە توقتالساق، مەملەكەت ازاماتتارمىز الدىنداعى بارشا الەۋمەتتىك مىندەتتەمەلەرىن تولىق ورىنداپ كەلەدى. قازىر ءاربىر بەسىنشى قازاقستاندىق مەملەكەت جاعىنان الەۋمەتتىك قولداۋ الىپ وتىر. ونىڭ تيىمدىلىگىن ارتتىرۋدا سيفرلىق ونىمدەردى ەنگىزۋ باستى ورىندا. بىلتىر بۇل سالاداعى سيفرلاندىرۋ ناتيجەلەرى بىرىككەن ۇلتتار ۇيىمى جانە حالىقارالىق ينستيتۋتتار تاراپىنان وڭ باعاسىن الىپ، وزگە ەلدەرگە ۇلگى ەتىپ كورسەتىپ جاتىر»، - دەدى ت. دۇيسەنوۆا ءماجىلىستىڭ جالپى وتىرىسىندا.

وسى ورايدا ول قازىر الەۋمەتتىك قولداۋدىڭ باسىم كوپشىلىگى (27 ءتۇرى) بويىنشا قىزمەت پرواكتيۆتى فورمات اياسىندا اتقارىلىپ جاتقانىن ەسكە سالدى.

«بىلتىر مەملەكەت باسشىسىنىڭ جولداۋىندا قاراستىرىلىپ، دەپۋتاتتار تاراپىنان قولداۋ تاپقان قاۋىپتى جۇمىس ورىندارداعى قىزمەتكەرلەردىڭ ارناۋلى جاردەم اقىلارى بيىلدىڭ باسىنان تولەنىپ كەلەدى. قازىر ونى الاتىنداردىڭ سانى 7140 ادامعا جەتىپ، ول ماقساتقا 1,2 ميلليارد تەنگە قارجى جۇمسالدى. بۇل جۇمىس جالعاسادى. نەگىزگى ستاندارت رەتىندە قولدانىلاتىن كۇنكورىس دەڭگەيى بويىنشا ايتقان دەپۋتاتتاردىڭ سىنى بويىنشا دا وزگەرىستەر قارالۋدا. ياعني الەۋمەتتىك كودەكستە قارالعانداي، كەلەر جىلدان مەدياندىق تابىسقا ءوتۋ مەحانيزمدەرى پىسىقتالىپ وتىر. بۇل ازاماتتاردىڭ تابىس دەڭگەيىنىڭ ناقتى كورسەتكىشى رەتىندە حالىقارالىق پراكتيكادا اتاۋلى الەۋمەتتىك كومەكتى بەلگىلەۋدە قولدانىلىپ جاتىر. بىزدە كەزەڭ- كەزەڭمەن وسى مەحانيزمدى ەنگىزەتىن بولامىز»، - دەدى ۇكىمەت باسشىسىنىڭ ورىنباسارى.

اۆتور

رۋسلان عابباسوۆ