ەلىمىزدە دارىندى بالالاردى قولداۋعا ارنالعان جاڭا جوبالار جۇزەگە اسىرىلماق
استانا. قازاقپارات - 2025 -جىلى قازاقستاندا دارىندى بالالاردى قولداۋعا ارنالعان بىرنەشە باستاما كوتەرىلىپ، جۇزەگە اسىپ جاتىر. بۇل جونىندە ورتالىق كوممۋنيكاتسيالار الاڭىنداعى بريفينگتە وقۋ-اعارتۋ مينيسترلىگىنىڭ وكىلدەرى باياندادى.
بۇل تۋرالى وقۋ-اعارتۋ مينيسترلىگى ءمالىم ەتتى.
- مەملەكەت باسشىسىنىڭ تاپسىرماسىنا سايكەس الماتىدا دارىندى بالالار مەن تالانتتى جاستاردى قولداۋعا ارنالعان «ۇركەر» ءبىلىم بەرۋ ورتالىعى سالىنادى. ورتالىقتىڭ نەگىزگى ماقساتى - ەلىمىزدىڭ دارىندى وقۋشىلارى مەن جاستارعا تەڭ مۇمكىندىك بەرىپ، ولاردىڭ عىلىم، ونەر، سپورت، تەحنولوگيا جانە كاسىپكەرلىك سالالارىنداعى الەۋەتىن دامىتۋ ارقىلى قازاقستاننىڭ ينتەللەكتۋالدىق، مادەني جانە يننوۆاتسيالىق وركەندەۋىنە ۇلەس قوساتىن جاڭا كوشباسشىلار بۋىنىن قالىپتاستىرۋ، - دەلىنگەن حابارلامادا.
وعان قوسا، وقۋ-اعارتۋ مينيسترلىگىنە قاراستى «دارىن» رەسپۋبليكالىق عىلىمي- پراكتيكالىق ورتالىعى دارىندى وقۋشىلار مەن پەداگوگتەردى قولداۋعا باعىتتالعان SMART Daryn ۇلتتىق سيفرلىق پلاتفورماسىن ىسكە قوستى. جاڭا جوبا - وقۋشىلاردىڭ شىعارماشىلىق جانە زياتكەرلىك الەۋەتىن دامىتۋعا، پەداگوگتەردىڭ كاسىبي بىلىكتىلىگىن ارتتىرۋعا، سونداي-اق ءبىلىم بەرۋ پروتسەسىنە زاماناۋي سيفرلىق تەحنولوگيالاردى ەنگىزۋگە ارنالعان ماڭىزدى قادام. ەندى اتالعان پلاتورما ارقىلى وقۋشىلار ينتەللەكتۋالدى سايىستارعا تىركەلىپ، ونىڭ ىرىكتەۋ كەزەڭىنەن وتە الادى.
سونداي-اق، قازاقستان رەسپۋبليكاسى پرەزيدەنتىنىڭ 2025-2029 -جىلدارعا ارنالعان ءبىلىم بەرۋ جۇيەسىنە جاساندى ينتەللەكتىنى ەنگىزۋ جونىندەگى جولداۋىن ىسكە اسىرۋ اياسىندا جاڭا باستاما - AEROO Space AI Competition ينجەنەرلىك جارىسى باستاۋ الادى. بۇل جارىس ينجەنەرلىك جانە باعدارلامالىق شەشىمدەردى جاساندى ينتەللەكت تەحنولوگيالارىمەن بىرىكتىرۋگە باعىتتالعان. قاتىسۋشىلار زاماناۋي ينجەنەرلىك تاسىلدەر مەن سيفرلىق تەحنولوگيالاردى قولدانا وتىرىپ، وزدەرىنىڭ نانوسپۋتنيكتەرىن ازىرلەپ، ۇشىرۋ مۇمكىندىگىنە يە بولادى.
ەسكە سالا كەتەيىك، 2022 -جىلدان بەرى حالىقارالىق ينتەللەكتۋالدىق سايىستاردىڭ جەڭىمپازدارى مەن ولاردىڭ جەتەكشىلەرى ءبىر رەتتىك اقشالاي سىياقى الادى. ءارى ءبىلىم دودالارىندا كوك تۋىمىزدى جەلبىرەتىپ جۇرگەن جەتكىنشەكتەرگە «بولاشاق» باعدارلاماسى ارقىلى شەتەلدىك ۇزدىك ج و و- لاردا ءبىلىم الۋ مۇمكىندىگى بەرىلدى. دارىندى بالالاردى قولداپ، ولاردىڭ قابىلەتتەرىن دامىتۋ ءۇشىن مەملەكەت تاراپىنان جاسالىپ جاتقان مۇنداي قادامدار ينتەللەكتۋالدى ۇرپاق تاربيەلەپ، بالالاردىڭ باسەكەگە قابىلەتتىلىگىن ارتتىرۋعا جاعداي جاسايدى.
ال وقۋشىلارعا قانداي مەديتسينالىق كومەك تەگىن كورسەتىلەتىنىن مىنا سىلتەمەدەن وقي الاسىز.
