ەلىمىزدە ءزايتۇن مايى وندىرىلەدى

قازاقستان - ءزايتۇن وندىرىسىندەگى حالىقارالىق ورتالىققا اينالۋعا قاۋقارلى. گرۋزيالىق ينۆەستورلار وسىلاي دەپ وتىر. وسىمدىكتىڭ بۇل ءتۇرىن ءوسىرۋ ءۇشىن ەلىمىزدە قاجەتتىنىڭ ءبارى بار. سوندىقتان ءوزارا سەرىكتەستىكتىڭ كەلەشەگى زور.

گرۋزيا فەرمەرلەرىنىڭ ءزايتۇن وسىرۋدە تاجىريبەسى مول. قازىر ەلدە مۇنداي اعاش سانى 200 مىڭنان اسادى. وسىلايشا ولار وسى ءونىمدى ءوندىرۋشى ەل رەتىندە گرەكيا، يتاليا، يسپانيا جانە يندونەزيامەن قاتار ەڭ ۇزدىك بەستىككە كىرىپ وتىر. ساراپشىلار گرۋزيادا وسەتىن ءزايتۇننىڭ ءدامى مەن ساپاسى ەرەكشە ەكەنىن ايتادى.
نيكا ماركوزاشۆيلي، ءزايتۇن وڭدەۋ زاۋىتىنىڭ ديرەكتورى:
- ءزايتۇن - كليمات تالعامايتىن وسىمدىك. گرۋزيا اۋا رايىنا تەز بەيىمدەلىپ كەتتى. ەككەننەن كەيىن 3 جىلدان سوڭ ءونىم بەرە باستايدى. ول ءتىپتى شولەيت جەردە دە وسە بەرەدى. ءبىر اعاشتان 50 كەلى ءزايتۇن جيناۋعا بولادى. ءزايتۇن وسىرەتىن ءبىر القاپتان تۇسەتىن تابىس 15 مىڭ دوللارعا دەيىن جەتەدى. ماقتامەن سالىستىرعاندا تابىس 10 ەسە جوعارى.
گرۋزين كومپانيالارى جەرگىلىكتى ارىپتەستەرىمەن بىرگە قازاقستاندا 10 مىڭ كوشەت وتىرعىزعان. كەلەشەكتە تاعى 50 مىڭ اعاش ەگۋ جوسپاردا بار.
گەورگي سۆانيدزە، ءزايتۇن جونىندەگى حالىقارالىق كەڭەستىڭ پرەزيدەنتى:
- قازاقستاندىق ءزايتۇن مايى ەڭ ۇزدىك ءونىم بولاتىنىنا كۇمانىم جوق. ويتكەنى سىزدەردە جەر قۇنارلى، اۋا رايى قولايلى. قازىردىڭ وزىندە ناتيجە جامان ەمەس. وزگە ەلدەرمەن سالىستىرعاندا، قازاقستاندا اعاشتار جاقسى ءوسىپ جاتىر.
گرۋزيالىق ينۆەستورلار ەكى جىلدان كەيىن قازاقستاندا ماي وڭدەيتىن زاۋىت اشۋعا نيەتتى. سونىمەن قوسا كوسمەتيكا مەن ءيىسسۋلار ءوندىرۋدى جوسپارلاپ وتىر. كەلەشەكتە قازاقستان ءزايتۇن وندىرىسىندەگى حالىقارالىق ورتالىققا اينالىپ، ونىمدەرىن كورشى مەملەكەتتەرگە دە ەكسپورتتاي الاتىن الەۋەتكە يە بولماق.
www.24.kz