ەلىمىزدە ازاماتتارعا قۇقىقتىق كەڭەس بەرەتىن جاساندى ينتەللەكت ازىرلەنەدى

استانا. KAZINFORM - ەلىمىزدە ازاماتتارعا قۇقىقتىق كەڭەس بەرەتىن جاساندى ينتەللەكت ازىرلەنىپ جاتىر. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ادىلەت ۆيتسە-ءمينيسترى بەكبولات مولدابەكوۆ ءمالىم ەتتى.

- قازاقستان ۋنيۆەرسيتەتتەرىمەن جۇمىس توبىن قۇردىق. قازاق ۇلتتىق تەحنيكالىق ۋنيۆەرسيتەتىندە (ساتبايەۆ ۋنيۆەرسيتەتى) «قۇقىقتىق كەڭەس بەرۋ بويىنشا جاساندى ينتەللەكت» گرانتى بار. كەلەسى ءۇش جىلدا ساتبايەۆ ۋنيۆەرسيتەتى ادامدارعا جاساندى ينتەللەكت كومەگىمەن كەڭەس الۋعا جاردەمدەسەتىن جاساندى ينتەللەكت ازىرلەيدى. ارىپتەستەرىمىزبەن مەموراندۋم جاساسامىز. ءال-فارابي اتىنداعى قازاق ۇلتتىق ۋنيۆەرسيتەتىندە سۋپەركومپيۋتەر بار. ولارمەن دە اتالعان سۋپەركومپيۋتەردە قازاقستان ىشىندە جاساندى ينتەللەكتىنىڭ بارلىق مودۋلىن ىسكە قوسا الۋ ءۇشىن مەموراندۋم جاساستىق، - دەدى ۆيتسە-مينيستر.

ونىڭ ايتۋىنشا، بۇل جۇمىسقا قاراعاندى ۋنيۆەرسيتەتى دە قاتىسادى. بۇل جوعارى وقۋ ورنىندا «سۋديالارعا شەشىم قابىلداۋعا قولداۋ كورسەتۋگە ارنالعان جاساندى ينتەللەكت» گرانتى بار. اتالعان جۇيە ستۋدەنتتەردىڭ ءبىلىم الۋىنا جاردەمدەسىپ، ادۆوكاتتار ءۇشىن سوت شەشىمدەرىن ساراپتاۋدا پايدالى بولماق. مۇنان بولەك، قازاقستان نارىعىندا جۇمىس ىستەيتىن كومپانيالارمەن دە ىنتىماقتاستىق جولعا قويىلىپ جاتىر. Zan Komegi موبيلدى قوسىمشاسى ارقىلى 24/7 رەجيمدە ازاماتتارعا قۇقىقتىق كەڭەس بەرۋگە ارنالعان جاساندى ينتەللەكت ەلەمەنتتەرى بار چات-بوت تا ازىرلەنگەن. قازىرگى ۋاقىتتا ول سىناقتان ءوتىپ جاتىر.

بەكبولات مولدابەكوۆ بۇل جۇمىستار حالىقتىڭ قۇقىقتىق ساۋاتتىلىعىن ارتتىرۋ ماقساتىندا جۇرگىزىلىپ جاتقانىن ايتادى. الداعى ۋاقىتتا ساتبايەۆ ۋنيۆەرسيتەتىندە حالىققا قىزمەت كورسەتۋ ورتالىعى سياقتى «زاڭگەرلىك كلينيكا» اشىلماق. ازاماتتار ودان ءتۇرلى ماسەلەگە قاتىستى كەڭەس الا الادى.

اۆتور

مارلان جيەمباي