ەلىمىزدە استىقتى تەرەڭ وڭدەۋ بويىنشا ءۇش جوبا ىسكە اسىرىلادى

استانا. KAZINFORM - ۇكىمەتتەگى كەڭەستە ۆيتسە-پرەمەر سەرىك جۇمانعارين قازاقستانداعى استىقتى تەرەڭ وڭدەۋدى دامىتۋ جانە وسى سالاداعى جوبالاردى ىسكە اسىراتىن ينۆەستورلاردىڭ جاعدايىن تىڭدادى.

بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.

بۇگىنگى تاڭدا قازاقستاندا استىقتى تەرەڭ وڭدەۋ بويىنشا ءۇش زاۋىت جۇمىس ىستەيدى. ىسكە اسىرۋ ساتىسىندا تاعى 4 جوبا بار. جەتىسۋداعى «جاركەنت كراحمال زاۋىتى» ج ش س جىلدىق قۋاتى 150 مىڭ توننا جۇگەرىنى قايتا وڭدەيدى؛ الماتى وبلىسىنداعى «ازيا- اگروفۋد» ج ش س (60 مىڭ توننا جۇگەرى، كراحمال، كراحمال سىرنەسى جانە كراحمال ءشارباتىن) جانە س ق و- داعى «بيووپەرەيشن» ج ش س-250 مىڭ توننا بيداي (كراحمال، گليۋتەن، بيوەتانول، اۋىل شارۋاشىلىعى جانۋارلارىنا ارنالعان جەم) وندىرەدى.

«2023 -جىلى قازاقستاندا بارلىعى 111 مىڭ توننا كراحمال ونىمدەرى ءوندىرىلدى. بۇل 27,7 مىڭ توننا جۇگەرى كراحمالى، 2022 -جىلى بۇل كورسەتكىش 15,5 مىڭ توننانى قۇرادى؛ 21,1 مىڭ توننا بيداي كراحمالى، 2022 -جىلعى كورسەتكىش 19,7 مىڭ توننا بولدى؛ 51,8 مىڭ توننا كراحمال سىرنەسى، 2022 -جىلعى كورسەتكىش - 57,3 مىڭ توننا؛ 10,1 مىڭ توننا گليۋتەن، 2022 -جىلى بۇل كورسەتكىش 10,7 مىڭ توننانى قۇرادى»، - دەپ مالىمدەدى اۋىل شارۋاشىلىعى ۆيتسە- ءمينيسترى ازات سۇلتانوۆ.

2023 -جىلى استىقتان وڭدەلگەن ءونىم ەكسپورتىنىڭ كولەمى ەداۋىر ءوستى: جۇگەرى كراحمالى - 11,5 مىڭ توننا (2022 -جىلى 9,3 مىڭ توننا) ، بيداي كراحمالى - 15,7 مىڭ توننا (2022 -جىلى 10,6 مىڭ توننا) ، گليۋتەن - 6,9 مىڭ توننا (2022 -جىلى 7,7 مىڭ توننا) ، كراحمال سىرنەسى - 19,4 مىڭ توننا (2022 -جىلى 16 مىڭ توننا). وتكەن جىلعى يمپورت 265 توننا بيداي كراحمالىن، 4,2 مىڭ توننا جۇگەرى كراحمالىن، 8,1 مىڭ توننا كراحمال سىرنەسىن، 76,1 توننا گليۋتەندى قۇرادى.

2028 -جىلعا دەيىن استىقتى تەرەڭ وڭدەۋ بويىنشا تاعى ءۇش جوبانى ىسكە اسىرۋ جوسپارلانۋدا. قازاقستاندىق «Qostanai Grain Industry» ج ش س قوستاناي وبلىسىندا جىلدىق قۋاتى 415 مىڭ توننا استىقتى تەرەڭ وڭدەۋ جوباسىن باستادى. كاسىپورىن ليزين، گليۋتەن، بيوەتانول، كومىرقىشقىل گازىن شىعاراتىن بولادى. پايدالانۋعا بەرۋ مەرزىمى - 2027 -جىل، 650 جۇمىس ورنىن اشۋ جوسپارلانۋدا. تۇركىستان وبلىسىندا «قازكراحمال» ج ش س كراحمال ونىمدەرىن ءوندىرۋ ءۇشىن جۇگەرىنى وڭدەۋدى جوسپارلاۋدا. قايتا وڭدەۋ قۋاتى - جىلىنا 100-150 مىڭ توننا. پايدالانۋعا بەرۋ مەرزىمى - 2026 -جىل. 500 جۇمىس ورنىن اشۋ كوزدەلۋدە.

تۇركيالىق Tiryaki Agro كومپانياسى كاتارلىق Hassad Food كومپانياسىمەن بىرلەسىپ استانادا قۋاتى جىلىنا 240 مىڭ توننا استىقتى تەرەڭ وڭدەۋ بويىنشا جوبانى باستادى. كراحمال، گليۋتەن، گليۋكوزا- فرۋكتوزا ءشارباتى تۇرىندەگى سوڭعى ونىمدەردى الەمدىك نارىقتارعا ەكسپورتتاۋ جوسپارلانۋدا. پايدالانۋعا بەرۋ مەرزىمى - 2026 -جىل. 250 جۇمىس ورنىن اشۋ كوزدەلىپ وتىر.

قازىرگى ساتتە جالپى قۋاتى جىلىنا 2 ميلليون توننادان اساتىن بيداي مەن جۇگەرىنى تەرەڭ وڭدەۋ بويىنشا تاعى ءتورت ينۆەستيتسيالىق جوبا بويىنشا كەلىسسوزدەر جۇرگىزىلىپ، پىسىقتالىپ جاتقانى ايتىلدى.

ۆيتسە- مينيستر ازات سۇلتانوۆتىڭ ايتۋىنشا، قازاقستاندا وندىرىلەتىن استىق كولەمى بارلىق قولدانىستاعى جانە جاڭا قۋاتتاردى جۇكتەۋ ءۇشىن جەتكىلىكتى.

مەملەكەت تاراپىنان استىقتى تەرەڭ قايتا وڭدەۋ جونىندەگى جوبالارعا، ياعني تەحنولوگيالىق كۇردەلىلىگى جوعارى زاماناۋي كاسىپورىندار، اۋقىمدى ينۆەستيتسيالىق قولداۋ كورسەتىلۋدە. جۇمىس ىستەپ تۇرعان وندىرىستەردى سالۋ جانە كەڭەيتۋ كەزىندەگى ينۆەستيتسيالىق سۋبسيديالار، نەگىزگى جانە اينالىم قاراجاتتارىنا كرەديت بەرۋ كەزىندە پايىزدىق مولشەرلەمەنى ارزانداتۋ، سالىقتىق پرەفەرەنتسيالار قاراستىرىلعان.

سەرىك جۇمانعارين استىقتى تەرەڭ وڭدەۋ بويىنشا جوبالاردى ىسكە اسىراتىن كاسىپورىنداردىڭ باسشىلارىن تىڭداپ، مەملەكەت تاراپىنان بارلىق قاجەتتى قولداۋ كورسەتىلەتىنىن اتاپ ءوتتى. جوبانىڭ ءاربىر كەزەڭىن ۋاقتىلى ىسكە اسىرۋدىڭ ماڭىزىن ەسكەرە وتىرىپ، ۆيتسە- پرەمەر اي سايىن جوبا جەتەكشىلەرىمەن كەزدەسۋلەر وتكىزۋدى تاپسىردى.

اۆتور

اينۇر تۋماكبايەۆا