ەلىمىزدە 5 مىڭ شاقىرىم اۆتوجول جاڭارتىلادى

 Елімізде 5 мың шақырым автожол жаңартылады
Фото: primeminister.kz

استانا. KAZINFORM - مەملەكەت باسشىسىنىڭ تاپسىرمالارىن ورىنداۋ جانە ەكونوميكالىق ءوسىمدى قامتاماسىز ەتۋ جونىندەگى ق ر ۇكىمەتىنىڭ جوسپارىن ىسكە اسىرۋ ءۇشىن «قازاقستاننىڭ دامۋ بانكى» ا ق جالپى ۇزىندىعى 5 مىڭ شاقىرىمنان اساتىن رەسپۋبليكالىق ماڭىزى بار اۆتوجولداردى قالپىنا كەلتىرۋ جونىندەگى ينۆەستيتسيالىق جوبانى قارجىلاندىرادى.

 بۇل تۋرالى ۇكىمەتتىڭ باسپا ءسوز قىزمەتى حابارلادى.

450 ميلليارد تەڭگە مولشەرىندەگى ۇزاقمەرزىمدى نەسيە قاراجاتى «قازاۆتوجول» ۇ ك» ا ق- عا ءتيىستى كەلىسىم شەڭبەرىندە بولىنەتىن بولادى. بۇل شارالاردى 2024-2027 -جىلدار ارالىعىندا ىسكە اسىرۋ جوسپارلانىپ وتىر.

ينۆەستيتسيالىق جوبا قازاقستاننىڭ بارلىق اۋماعىندا ىسكە اسىرىلادى. وبلىس ورتالىقتارىن اباي، اقمولا، اقتوبە، الماتى، اتىراۋ، شىعىس قازاقستان، جامبىل، جەتىسۋ، باتىس قازاقستان، قاراعاندى، قوستاناي، قىزىلوردا، ماڭعىستاۋ، پاۆلودار، سولتۇستىك قازاقستان، تۇركىستان جانە ۇلىتاۋ وبلىستارىنىڭ ەلدى مەكەندەرىمەن بايلانىستىراتىن جولداردى دا، رەسپۋبليكالىق ماڭىزى بار تراسسالاردى دا قالپىنا كەلتىرۋ جوسپارلانىپ وتىر.

سونىمەن قاتار سۋ وتكىزگىش قۇبىرلاردىڭ اپاتتى كوپىرلەرى قايتا جاڭارتىلادى. سونداي-اق جولداردىڭ قالپىنا كەلتىرىلگەن ۋچاسكەلەرىندە كولىك قۇرالدارىنىڭ سالماعى مەن كولەمىنە قاتىستى پارامەترلەرىن ولشەۋدىڭ اۆتوماتتاندىرىلعان جۇيەسىن ىسكە قوسۋ كوزدەلگەن.

جالپى، جوبانى ىسكە اسىرۋ اۆتوموبيل جولدارىنىڭ تەحنيكالىق سيپاتتاماسىن جاقسارتۋ ارقىلى وڭىرلەردىڭ كولىكتىك- لوگيستيكالىق الەۋەتىن اشۋعا ەلەۋلى ۇلەس قوسادى. كولىك ماگيسترالدارىنىڭ وتكىزۋ قابىلەتى مەن جايلىلىعى ارتادى. جول بويىنداعى ەلدى مەكەندەردىڭ ودان ءارى دامۋىنا دا سەرپىن بەرىلمەك. حالىقتىڭ ىسكەرلىك بەلسەندىلىگى ارتادى. كولىك قىزمەتتەرىن اقپاراتتاندىرۋ پروتسەسى جەدەلدەتىلەدى. كولىك تاسىمالدارىنا قارجىلىق جانە ۋاقىتشا شىعىندار قىسقارادى. بۇل ءوز كەزەگىندە ەلدىڭ اگرارلىق جانە ونەركاسىپتىك سەكتورلارىنىڭ دامۋىنا وڭ اسەر ەتەدى.

سوڭعى جاڭالىقتار