ەلىمىزدە 2030 -جىلعا قاراي 236 مىڭنان استام مۇعالىم قاجەت بولادى - دارحان احمەد- زاكي
ورال. KAZINFORM - ق ر عىلىم جانە جوعارى ءبىلىم ۆيتسە- ءمينيسترى دارحان احمەد- زاكي ورال قالاسىندا ماحامبەت وتەمىسوۆ اتىنداعى باتىس قازاقستان ۋنيۆەرسيتەتىندە ءوڭىردىڭ عىلىمي قاۋىمداستىعى وكىلدەرىمەن كەزدەسىپ، قازاقستاندا عىلىم مەن جوعارى ءبىلىم بەرۋدى دامىتۋ ماسەلەلەرى تۋرالى اڭگىمەلەپ بەردى.
دارحان احمەد- زاكي مينيسترلىكتىڭ 2024 -جىلدىڭ ءبىرىنشى جارتىجىلدىعىنداعى جۇمىسىن قورىتىندىلاپ، نەگىزگى جەتىستىكتەرىن جينالعاندار نازارىنا ۇسىندى.
ءوز بايانداماسىندا سونداي- اق جوعارى جانە جوعارى وقۋ ورنىنان كەيىنگى ءبىلىمنىڭ قولجەتىمدىلىگى مەن ساپاسىن ارتتىرۋعا باعىتتالعان مەملەكەتتىك باستامالار تۋرالى ايتتى. ۆيتسە- مينيستر توقتالعان نەگىزگى باعدارلامالاردىڭ قاتارىندا 2023-2029 -جىلدارعا ارنالعان ءتىل ساياساتىن دامىتۋدىڭ تۇجىرىمداماسى، سونداي- اق جوعارى ءبىلىم مەن عىلىمدى دامىتۋدىڭ 2023-2029 -جىلدارعا ارنالعان تۇجىرىمداماسى بار.
قازاقستان رەسپۋبليكاسى پرەزيدەنتىنىڭ تاپسىرماسى اياسىندا جاساندى ينتەللەكتتى ەنگىزۋگە جانە سيفرلىق تەحنولوگيالاردى دامىتۋعا ەرەكشە نازار اۋدارىلدى. دارحان احمەد- زاكيدىڭ پىكىرىنشە، بۇل ەلدىڭ ءبىلىم بەرۋ جانە عىلىم سالاسىن تابىستى دامىتۋ ءۇشىن ماڭىزدى ەلەمەنت بولماق.
ۆيتسە- ءمينيستردىڭ سوزىنە قاراعاندا، بۇگىنگى تاڭدا رەسمي ستاتيستيكاعا سايكەس جوعارى دەموگرافيالىق ءوسىم بايقالادى. 2019 -جىلدان باستاپ 2022 -جىلعا دەيىن بالا تۋۋدىڭ ءوسۋىن ەسكەرگەندە، 2040 -جىلعا قاراي 18 جاستاعى بالالاردىڭ ەكى ەسە ارتۋىن بولجاۋعا بولادى. بۇل مەملەكەتتىڭ ءبىرىنشى ماماندىق الۋعا جۇمسايتىن شىعىستارىنىڭ ءوسۋ سەرپىنىنە الىپ كەلەدى، ويتكەنى ەلدە مەملەكەتتىك بيۋدجەت قاراجاتى ءبىلىم بەرۋ جۇيەسىن قارجىلاندىرۋدىڭ نەگىزگى كوزدەرىنىڭ ءبىرى بولىپ تابىلادى.
مەملەكەت باسشىسىنىڭ 2022 -جىلعى 1- قىركۇيەكتەگى حالىققا جولداۋىندا بەرىلگەن تاپسىرمالارىن ورىنداۋ اياسىندا سارالانعان گرانتتى ەنگىزۋ، ءبىلىم بەرۋ نەسيەسىن بەرۋ تاسىلدەرى ازىرلەندى. بۇل تاسىلدەر 2030 -جىلعا قاراي جوعارى بىلىمگە جىلىنا 150 مىڭنان استام مەكتەپ تۇلەكتەرىنە قول جەتكىزۋگە مۇمكىندىك بەرەدى، ولاردىڭ ۇلگەرىمى، عىلىمي جەتىستىكتەرى مەن الەۋمەتتىك مارتەبەسىن ەسكەرە وتىرىپ، 30 پايىزدان 100 پايىزعا دەيىن گرانت بەرىلەدى.
ۆيتسە- ءمينيستردىڭ مالىمدەۋىنشە، پەداگوگيكالىق كادرلاردى دايارلاۋدىڭ ساپاسىن ارتتىرۋ ءۇش باعىت بويىنشا جۇزەگە اسىرىلادى.
«ءبىرىنشى. استانانى قوسا العاندا وڭىرلەردى ولاردىڭ قاجەتتىلىكتەرىنە سايكەس پەداگوگيكالىق كادرلارمەن قامتاماسىز ەتۋ. بۇگىنگى تاڭدا ەلىمىزدىڭ جوعارى وقۋ ورىندارى الداعى ءتورت جىلدا اعىمداعى سۇرانىستى ەسكەرە وتىرىپ، وقىتۋشىلار دايارلاۋعا دايىن. 2030 -جىلعا قاراي ەلىمىزدە 236 مىڭنان استام مۇعالىم قاجەت بولادى»، - دەدى ۆيتسە- مينيستر.
ونىڭ ايتۋىنشا، قىسقا جانە ۇزاق مەرزىمدى جوسپارلار بار. سونىمەن، بيىلعى جىلى استانا قالاسى ءۇشىن پەداگوگتاردى دايارلاۋ ماقساتىندا اباي اتىنداعى قازاق ۇلتتىق پەداگوگيكالىق جانە ل. گۋميليەۆ اتىنداعى ەۋرازيا ۇلتتىق ۋنيۆەرسيتەتتەرىنىڭ بىرلەسكەن باعدارلامالارىن ىسكە قوسۋ جوسپارلانعان.
ەكىنشىدەن، جاڭا فورماتسياداعى پەداگوگتاردى دايارلاۋ جانە قايتا دايارلاۋ قولعا الىنادى.
بۇگىنگى تاڭدا ۋنيۆەرسيتەتتىڭ ءبىلىم بەرۋ باعدارلامالارى «پەداگوگ» كاسىبي ستاندارتى مەن مەكتەپكە دەيىنگى جانە ورتا ءبىلىم بەرۋدىڭ مەملەكەتتىك ءبىلىم بەرۋ ستاندارتىن ەسكەرە وتىرىپ قۇراستىرىلعان.
«30 جاڭا يننوۆاتسيالىق ءبىلىم بەرۋ باعدارلاماسى ازىرلەندى، ولاردى اۋقىمدى ەتۋ ءۇشىن بيىلعى جىلدىڭ 1- قىركۇيەگىنەن باستاپ رەسپۋبليكا بويىنشا 49 جوعارى وقۋ ورنىنىڭ 1800 وقىتۋشىسى ءبىلىم الۋدا. بۇل باعدارلامالار قازىرگى كوزقاراستان تۇبەگەيلى ەرەكشەلەنەدى. ولاردا ستۋدەنتتەردىڭ عىلىمي-زەرتتەۋ جانە تسيفرلىق قۇزىرەتتىلىكتەرىن دامىتۋعا باسا نازار اۋدارىلعان. ينكليۋزيۆتى پەداگوگيكانىڭ مازمۇنى مەن پاندەردى وقىتۋ ادىستەمەسى جاڭارتىلدى. جىل سوڭىنا دەيىن ارنايى پەداگوگيكا ماماندىعى بويىنشا ماماندار دايارلايتىن 14 جوعارى وقۋ ورنى ينكليۋزيا كابينەتتەرىمەن جانە 25 جوعارى وقۋ ورنى پاندىك كابينەتتەرمەن جابدىقتالادى»، - دەيدى د. احمەد-زاكي.
ۇشىنشىدەن، پەداگوگيكالىق ءبىلىم بەرۋدىڭ ينستيتۋتسيونالدىق ترانسفورماتسياسى باعىتىندا ەرتە كاسىپتىك باعدار بەرۋ جانە كاسىپتىك كەڭەسشىلەردى وقىتۋ بويىنشا جۇمىس باستالدى.
«دايارلاۋ باعدارلامالارى minor مەن ميكروبىلىكتىلىكتەردەن قۇرالعان مودەلدەر جيىنتىعى رەتىندە قايتا قاراستىرىلىپ وتىر. ول كوللەدج بىتىرگەن تۇلەكتەرگە جوعارى وقۋ ورىندارىندا قىسقارتىلعان باعدارلامالار بويىنشا ءبىلىم الۋعا مۇمكىندىك بەرەدى. پەداگوگتاردى وقىتۋدىڭ تاجىريبەگە باعىتتالعان سيپاتى جانە PGCE كۋرستارى ارقىلى پەداگوگتاردى قايتا دايارلاۋ مودەلى كۇشەيتىلەدى»، - دەدى ۆيتسە- مينيستر.
اۆتور
عايساعالي سەيتاق
