ۇلى بريتانيانىڭ بەس كومپانياسى قازاقستانداعى كەن ورىندارىن زەرتتەپ جاتىر

استانا. KAZINFORM – ۇلى بريتانيانىڭ قازاقستانداعى ەلشىلىگىنىڭ ساۋدا جانە ينۆەستيتسيا ماسەلەلەرى جونىندەگى ديرەكتورى بەت ماككەندريك بەس بىردەي بريتانيالىق كومپانيانىڭ قازاق جەرىندە گەولوگيالىق زەرتتەۋ جۇرگىزىپ جاتقانىن ايتتى.

2023 -جىلدىڭ ناۋرىزىندا قازاقستان مەن ۇلى بريتانيا سيرەك مينەرالدار سالاسىنداعى ستراتەگيالىق سەرىكتەستىك جونىندەگى ءوزارا تۇسىنىستىك تۋرالى مەموراندۋمعا قول قويعان بولاتىن. ارادا ءبىر جىل وتكەن وسى سەرىكتەستىكتىڭ جول كارتاسىنا قول قويىلدى.

«ول كەلىسىمنىڭ ءۇش نەگىزگى باعىتى بار. ءبىرىنشىسى ينۆەستيتسيالىق جوبالاردى بىرلەسىپ قاراۋدى كوزدەيدى. بۇل تۇرعىدا ەلشىلىك Kazakh Invest كومپانياسىمەن تىعىز بايلانىستا جۇمىس ىستەپ وتىر.

ەكىنشى باعىت - بريتان گەولوگيالىق قىزمەتى قازاقستاننىڭ ۇلتتىق گەولوگيا قىزمەتىمەن بىرگە گەولوگيالىق دەرەكتەردى سيفرلاندىرۋ باعىتىندا جۇمىس ىستەپ جاتىر. بۇل شەتەلدىك ينۆەستورلاردىڭ مۇنداعى رەسۋرستار تۋرالى مالىمەتتە ونلاين فورماتتا وڭاي الۋىنا مۇمكىندىك بەرەدى.

ءۇشىنشى باعىت - ءبىلىم بەرۋ سالاسنىداعى ارىپتەستىك. قازاقستاننىڭ ساتپايەۆ اتىنداعى جانە شىعىس قازاقستان تەحنيكالىق ۋنيۆەرسيتەتى سياقتى تاۋ-كەن ونەركاسىبىنە باعىتتالعان ۋنيۆەرسيتەتتەرى مەن ۇلى بريتانيانىڭ وسى سالاداعى ۇزدىك وقۋ ورىندارى پايدالى قازبالار باعىتىندا تاجىريبە الماسىپ، ءوزارا اكادەميالىق بايلانىس ورناتۋ تۋرالى كەلىسىمگە قول قويادى دەپ جوسپارلانعان»، - دەدى ول.

ەلشىلىك وكىلى وسى بىرلەسكەن جۇمىستاردىڭ ارقاسىندا قازاقستاننىڭ ينۆەستيتسيالىق تارتىمدىلىعى ارتادى دەپ وتىر.

«بەس بريتانيالىق تاۋ-كەن كومپانياسى زەرتتەۋ جۇرگىزىپ جاتىر. دەرەكتەردى سيفرلاندىرۋ ارقىلى گەولوگيالىق بارلاۋ جۇرگىزەتىن كومپانيالاردىڭ كوبىرەك كەلۋىنە جول اشقىمىز كەلەدى. ءبىر كەن ورنىن زەرتتەپ، بارلاپ، جۇمىسقا قوسقانعا دەيىن 15-20 جىل ۋاقىت كەتۋى مۇمكىن.

بىزدە ۆولفرام، ۋران، پالاديي سياقتى اسا ماڭىزدى سانالاتىن پايدالى قازبالاردىڭ ءتىزىمى بار. وعان قوسا بۇكىل الەم قازاقستانداعى مىس پەن نيكەلدىڭ، كوبالتتىڭ قورى تۋرالى بىلەدى»، - دەيدى بەت ماككەندريك.

اۆتور

ەسىمجان ناقتىباي