ۇلى بريتانيا، فرانسيا جانە گەرمانيا يراننان يزرايلگە شابۋىل جاساماۋدى ءوتىندى
استانا. KAZINFORM - ەۋروپانىڭ ءۇش مەملەكەتى يران مەن ونىڭ وداقتاستارىن يزرايلگە شابۋىل جاساۋدان باس تارتۋدى ءوتىندى. ويتكەنى، مۇنداي شابۋىل شيەلەنىستى ودان ارى ۋشىقتىرىپ، سوعىستى توقتاتۋ جانە تۇتقىنداردى بوساتۋ مۇمكىندىگىنە قاتەر توندىرەدى.
بۇل جايىندا Kazinform اگەنتتىگىنىڭ مەنشىكتى ارسەن وتەشوۆ حابارلادى.
فرانسيا پرەزيدەنتى ەممانۋەل ماكرون، گەرمانيا كانسلەرى ولاف شولتس جانە ۇلى بريتانيا پرەمەر-ءمينيسترى كير ستارمەردىڭ بىرلەسكەن مالىمدەمەسىن بۇگىن بريتان ۇكىمەتى جاريا ەتتى.
ەۋروپالىق ءۇش مەملەكەت كوشباسشىلارى سوعىستى دەرەۋ توقتاتىپ، پالەستيندىك حاماس توبىنىڭ قولىنا وتىرعان بارلىق تۇتقىندى بوساتۋ كەرەكتىگىن مالىمدەدى.
مالىمدەمەدە گازا تۇرعىندارى «شۇعىل ءارى كەدەرگىسىز كومەك جەتكىزۋگە جانە ونى تاراتۋعا» مۇقتاج ەكەنى اتاپ كورسەتىلەدى.
«ءبىز ايماقتاعى شيەلەنىستىڭ كۇشەيۋىنە قاتتى الاڭدايمىز جانە دەەسكالاتسيا مەن ايماقتىق تۇراقتىلىقتى قولداۋعا ءبىر كىسىدەي ۇمتىلامىز. وسى تۇرعىدا جانە اتاپ ايتقاندا، ءبىز يران مەن ونىڭ وداقتاستارىن ايماقتىق شيەلەنىستى ودان ءارى ۋشىقتىراتىن جانە سوعىستى توقتاتۋ مەن كەپىلگە الىنعانداردى بوساتۋ تۋرالى كەلىسسوزدەر جۇرگىزۋ مۇمكىندىگىنە قاۋىپ توندىرەتىن شابۋىلداردان باس تارتۋعا شاقىرامىز»، - دەلىنگەن مالىمدەمەدە.
بۇل رەتتە اڭگىمە وسى اپتانىڭ سوڭىندا قايتا جاندانۋى ءتيىس يزرايل مەن حاماس اراسىنداعى كەلىسىم تۋرالى كەلىسسوزدەر جايىندا بولىپ وتىر.
ەلدەر ەگەر شابۋىل جاسالسا، وندا يران «بەيبىتشىلىك پەن تۇراقتىلىققا باستايتىن وسىناۋ مۇمكىندىككە قاۋىپ توندىرەتىن ارەكەتتەرى ءۇشىن جاۋاپ بەرەدى» دەپ ەسكەرتەدى.
«تاياۋ شىعىستاعى جاعدايدىڭ ودان ارى ۋشىققانىنان ءبىر دە ءبىر ەل نەمەسە مەملەكەت پايدا تاپپايدى»، - دەپ اتالىپ وتىلگەن مالىمدەمەدە.
سونىمەن قاتار، مەملەكەت باسشىلارى مىسىر، قاتار جانە امەريكا قۇراما شتاتتارىنىڭ سوعىستى توقتاتۋ جانە كەپىلگە الىنعانداردى بوساتۋ تۋرالى كەلىسىمگە كەلۋدەگى دەلدالدىق ارەكەتتەرىنە قولداۋ ءبىلدىردى.
اۆتور
مارلان جيەمباي
