ۇلى بريتانيا گازا سەكتورىنداعى پالەستينالىقتاردى كوشىرۋ تۋرالى ۇسىنىستى قابىلدامادى
ۇلى بريتانيا سىرتقى ىستەر مينيسترلىگى پالەستينالىقتاردى گازا سەكتورىنان تىس جەرلەرگە كوشىرۋ تۋرالى كەز كەلگەن ۇسىنىستى ءۇزىلدى- كەسىلدى قابىلدامايتىنىن مالىمدەدى، دەپ حابارلايدى Kazinform ءتىلشىسى.
«گازا سەكتورى وككۋپاتسيالانعان پالەستينا تەرريتورياسى جانە بولاشاق پالەستينا مەملەكەتىنىڭ بولىگى بولادى. ۇلى بريتانيا پالەستينالىقتاردى گازا سەكتورىنان تىس جەرلەرگە ورنالاستىرۋ تۋرالى كەز كەلگەن ۇسىنىستى ءۇزىلدى-كەسىلدى قابىلدامايدى»، - دەدى سارسەنبىدە ۇلى بريتانيا سىرتقى ىستەر مينيسترلىگىنىڭ وكىلى.
«ءبىز وداقتاستارىمىز بەن سەرىكتەستەرىمىزدىڭ گازا سەكتورى تۇرعىندارىنىڭ ول ايماقتان ءماجبۇرلى تۇردە كوشىرىلۋىنە الاڭداۋشىلىعىن بولىسەمىز»، - دەپ قوستى ول.
ايتا كەتەيىك، 3-قاڭتاردا يزرايلدىڭ Times of Israel گازەتى ۇكىمەتتىك دەرەككوزدەرگە سىلتەمە جاساپ، يزرايلدىڭ گازا سەكتورىنان پالەستينالىقتاردى باسقا ەلدەرگە «ەرىكتى تۇردە» قونىستاندىرۋمەن اينالىسىپ جاتقانىن حابارلادى.
اۆتور
ەركەجان سماعۇلوۆا
