ۇلى بريتانيا، ا ق ش، فرانسيا، گەرمانيا جانە ۋكراينا سىرتقى ىستەر مينيسترلەرىنىڭ كەزدەسۋى وتپەيتىن بولدى
استانا. KAZINFORM - لوندونداعى ۋكراينا بويىنشا كونسۋلتاتسيالار فورماتى تومەندەدى. كەلىسسوز جوعارى لاۋازىمدى تۇلعالار دەڭگەيىندە وتەدى، دەپ حابارلايدى Kazinform مەنشىكتى ءتىلشىسى.
ۇلى بريتانيا، ا ق ش، فرانسيا، گەرمانيا جانە ۋكراينا سىرتقى ىستەر مينيسترلەرى ۋكرايناداعى سوعىستى توقتاتۋ جولدارىن تالقىلاۋ ءۇشىن سارسەنبىگە لوندوندا جوسپارلانعان كەزدەسۋدى كەيىنگە قالدىردى، دەپ جازدى Sky News.
ونىڭ ورنىنا وسى ەلدەردىڭ جوعارى لاۋازىمدى تۇلعالارىنىڭ قاتىسۋىمەن كونسۋلتاتسيالار وتەدى. ۋكراينا سىرتقى ىستەر ءمينيسترى اندرەي سيبيحا بريتاندىق فورين- كەڭسەنىڭ باسشىسى دەۆيد لەمميمەن بولەك كەزدەسۋ وتكىزەدى دەپ كۇتىلىپ وتىر.
وكىلدىك رەيتينگىنىڭ تومەندەۋى دونالد ترامپ كومانداسى تاراپىنان كيەۆ پەن ماسكەۋ اراسىنداعى اتىستى توقتاتۋعا دەلدالدىق جاساۋ قىسىمىنىڭ كۇشەيۋىنە قاراما-قايشى كەلەدى.
Sky News اقپاراتىنا سايكەس، ا ق ش ۇسىنىپ وتىرعان بىتىمگەرشىلىك جوسپارىندا ۋكراينا پرەزيدەنتى ۆلاديمير زەلەنسكي ءبىر كۇن بۇرىن قابىلداماعان قىرىمدى تانۋ ماسەلەسى بار. ۋكراينا اۋماعىنىڭ شامامەن 20 پايىزىن رەسەيدىڭ باقىلاۋىندا قالدىراتىن مايدان شەبىن قاتىرۋ مۇمكىندىگى دە تالقىلانىپ جاتىر. كيەۆ مۇنداي شارتتاردى قاراستىرۋعا دايىن با، جوق پا، ازىرگە بەلگىسىز.
سونىمەن بىرگە ۋكراينانىڭ وداقتاستارى ىقتيمال اۋماقتىق جەڭىلدىكتەر ۋكرايناعا قاۋىپسىزدىك كەپىلدىگىنىڭ بەرىلۋىمەن جانە ەلدى سوعىستان كەيىنگى قالپىنا كەلتىرۋ ۇدەرىسىمەن قاتار جۇرەدى دەپ كۇتەدى.
ا ق ش پرەزيدەنتى بۇعان دەيىن سوعىستى تەز ارادا اياقتاۋ نيەتى تۋرالى مالىمدەگەن، الايدا ەندى رەسەي مەن ۋكراينا كەلىسىمگە قول جەتكىزۋگە كەدەرگى كەلتىرەتىن بولسا، دەلدال بولۋعا قاتىسۋدان باس تارتۋى مۇمكىن ەكەنىن ەسكەرتتى.
ا ق ش مەملەكەتتىك حاتشىسى ماركو رۋبيو لوندونعا دەۆيد لەمميمەن جانە ۋكراينا، فرانسيا جانە گەرمانيانىڭ سىرتقى ىستەر مينيسترلەرىمەن كەزدەسۋى ءۇشىن كەلۋى ءتيىس ەدى، ءبىراق سەيسەنبى كۇنى ساپاردىڭ توقتاتىلعانى جاريالاندى.
Sky News حابارلاۋىنشا، وسىدان كەيىن پاريج مەن بەرلين دە مينيسترلەرىنىڭ ساپارلارىن كەيىنگە قالدىردى. ولاردىڭ ورنىنا سىرتقى ساياساي ۆەدومستۆولاردىڭ جوعارى لاۋازىمدى تۇلعالارى، سونىڭ ىشىندە ا ق ش پرەزيدەنتىنىڭ ۋكراينا بويىنشا ارنايى وكىلى كيت كەللوگ قاتىسادى.
اۆتور
زارينا تۋعانبايەۆا
