ەلدىڭ اقىلى جولدارىندا قاي ەلدىڭ كولىكتەرى كوپ

قازاقستاننىڭ اقىلى جولدارىن پايدالاناتىن شەتەلدىك كولىكتەر سانى ارتىپ كەلەدى. «قازاۆتوجول» ۇ ك» ا ق مالىمەتىنشە، 2026 -جىلدىڭ باسىنان بەرى رەسپۋبليكالىق ماڭىزى بار اقىلى جولدارمەن 503 مىڭنان استام شەتەلدىك كولىك جۇرگەن. ولاردىڭ قاتارىندا رەسەي، قىتاي، ورتالىق ازيا، كاۆكاز جانە ەۋروپا ەلدەرىنىڭ اۆتوكولىكتەرى بار.

ەڭ كوپ كولىك رەسەيدەن كەلگەن. جىل باسىنان بەرى قازاقستاننىڭ اقىلى جولدارىن 209 مىڭعا جۋىق رەسەيلىك اۆتوكولىك پايدالانعان. ودان كەيىن قىرعىزستان — 98,6 مىڭ، وزبەكستان — 97,1 مىڭ جانە قىتاي — 23,7 مىڭ كولىكپەن كوش باستاپ تۇر.

اسىرەسە قىتايدان كەلەتىن كولىكتەر سانىنىڭ ءوسۋى بايقالادى. 2025 -جىلى قازاقستاننىڭ اقىلى جولدارىمەن وسى ەلدىڭ 11,6 مىڭ اۆتوكولىگى جۇرسە، 2026 -جىلى ولاردىڭ سانى 23,7 مىڭعا جەتكەن. بۇل قىتاي مەن قازاقستان اراسىنداعى اۆتوموبيل قاتىناسىنىڭ جاندانىپ كەلە جاتقانىن كورسەتەدى.

جىل باسىنان بەرى اقىلى جولداردا شەتەلدىك كولىكتەردىڭ 23,6 ميلليوننان استام ءوتۋى تىركەلگەن. بۇل كورسەتكىش بويىنشا وزبەكستان الدا تۇر — 7,4 ميلليون رەت. ودان كەيىن رەسەي — 6,1 ميلليون، قىرعىزستان — 3,9 ميلليون رەت تىركەلگەن. اتالعان كورسەتكىشتەر جەكە اۆتوكولىكتەردىڭ سانىن ەمەس، ولاردىڭ اقىلى جولدارمەن ءجۇرىپ وتكەن جاعدايلارىن بىلدىرەدى.

قازاقستان جولدارىن كورشىلەس مەملەكەتتەرمەن قاتار تۇركيا، بەلارۋس، گرۋزيا، ارمەنيا، موڭعوليا، پولشا، ليتۆا، وڭتۇستىك كورەيا جانە باسقا دا ەلدەردىڭ كولىكتەرى پايدالانادى. بۇل ەلىمىزدىڭ ازيا مەن ەۋروپانى جالعايتىن حالىقارالىق اۆتوموبيل قاتىناسىنداعى ماڭىزىن كورسەتەدى.

شەتەلدىك كولىكتەردىڭ كوبەيۋى ەل ەكونوميكاسىنا دا قوسىمشا مۇمكىندىك بەرەدى. حالىقارالىق تاسىمالدىڭ دامۋى جول بويىنداعى جانارماي قۇيۋ بەكەتتەرىنە، تاماقتانۋ ورىندارىنا، قوناقۇيلەرگە، تەحنيكالىق قىزمەت كورسەتۋ ورتالىقتارىنا جانە لوگيستيكالىق كاسىپورىندارعا سۇرانىستى ارتتىرادى. وسىلايشا حالىقارالىق كولىك قاتىناسى جول بويىنداعى كاسىپكەرلىكتىڭ دامۋىنا دا ىقپال ەتەدى.

ايتا كەتەلىك اقىلى جولدا اقشانى قالاي ۇنەمدەۋگە بولاتىنى تۋرالى جازعان ەدىك.