لومونوسوۆ كوشەسى «ەگەمەن قازاقستان» گازەتى» كوشەسىنە اينالدى: ساۋىتبەك ابدراحمانوۆتىڭ مەنەدجەرلىك قىرى

اقمولا وبلىسى سەلينوگراد اۋدانىنىڭ اكىمى باسىلىمعا بوساتىپ بەرگەن لومونوسوۆ كوشەسى، 45-ۇيدە ورنالاسقان ەكى قاباتتى كونە عيماراتىن رەداكسيا ءوز كۇشىمەن قانشا جاماپ-جاسقاسا دا، الماتىداعى باۋىر باسقان گوگول كوشەسىندەگى الىپ ەڭسەلى عيماراتتان كەيىن كوزگە مۇلدەم قوراش كورىنەتىن ەدى... رەداكسيا ماڭى دا قاپتاعان ۇسقىنسىز ەكى قاباتتى ەسكى باراك ۇيلەر بولاتىن... ءبىراق كوڭىل ورتايعان جوق، ەل گازەتى جاڭا استانا - ەلدىڭ تورىنە ورنىقتى.

جەتپىس جىل قىزمەتىن الاتاۋ باۋرايىنداعى اسەم شاھاردا جالعاستىرعان «س ق» - «ەگەمەن» ۇجىمى تىڭ استاناسى اتانعان سەلينوگراد كەزەڭىندە سالىنىپ، قالىپتاسقان اۋدانعا قونىستانىپ، ەكى قاباتتى عيماراتقا قىسىلىپ- قىمتىرىلىپ ورنالاسىپ، ۇيرەنىسىپ، قىزمەتكەرلەر تۇرمىس جاعدايىن تۇزەپ، سۇرىقسىزداۋ، سۋىقتاۋ قالاعا ەندى-ەندى باۋىر باسا باستاعان ساتتە قۇرىلتايشى باستاماسىمەن «ەگەمەن قازاقستاندا» قۇرىلىمدىق وزگەرىستەر جاسالدى.

بۇرىن مەملەكەتتىك قازىنالىق كاسىپورىن - رەداكسيانى باس رەداكتور باسقاراتىن بولسا، ەندى مەملەكەتتىك اشىق اكسيونەرلىك قوعامعا اينالعان قۇرىلىمدى باسقارما ءتوراعاسى - پرەزيدەنت باسقارادى. اكسيونەرلىك قوعام رەتىندە ۇجىمعا قارجى-شارۋاشىلىق سالاسىندا دەربەستىك، ءوزىن-ءوزى قامتاماسىز ەتۋ مىندەتى، ۇلكەن مۇمكىندىك جانە جاۋاپكەرشىلىك جۇكتەلىپ وتىر. بۇكىل قارجى-شارۋاشىلىق، كادر جانە ءىس قاعازدارىمەن ەكى ەسەپشى عانا اينالىسىپ كەلگەن مەكەمە ءۇشىن بۇل ءوزى قاتپارى قالىڭ، بەيمالىم جاڭا الەم ەدى.

2000 -جىلدىڭ سوڭىندا وسىنداي تاعدىرشەشتى، جاۋاپتى كەزەڭدە «ەگەمەن قازاقستان» گازەتى اكسيونەرلىك قوعامى باسشىلىعىنا ەلىمىزدەگى ۇلكەن مەكەمە -رەسپۋبليكالىق تەلەراديو كورپوراتسيا ءتوراعاسىنىڭ ءبىرىنشى ورىنباسارى قىزمەتىن اتقارىپ جۇرگەن ساۋىتبەك ابدراحمانوۆ كەلدى. قالام ۇستاعان قاۋىمعا ەسىمى كەڭىنەن تانىس، وسى «س ق» - نىڭ قارا قازانىندا ونداعان جىل قايناپ، شىڭدالعان، ودان ءارى ورتالىق كوميتەتكە اۋىسقان، تاۋەلسىزدىك تۇسىندا پرەزيدەنت اكىمشىلىگىندە جاۋاپتى قىزمەتتەر اتقارعان، مادەنيەت ءمينيسترىنىڭ ءبىرىنشى ورىنباسارى بولعان، باسىلىمنىڭ تۇراقتى اۆتورى ساۋىتبەك ابدراحمانوۆتى ۇجىم جاتىرقاي قويعان جوق.

ءبىر نازار اۋداراتىن ماسەلە - جەتپىس جىلدان استام ەلدىڭ باستى رەسمي ءارى پارتيالىق باسىلىمى بولعاندىقتان، «ەگەمەن» ۇجىمى ماقالا جازىپ، قالاماقى الىپ، گازەت شىعارۋدان وزگە ەشقانداي قىزمەت اتقارماعان. ءتىپتى جالاقى، قالاماقى، ءىسساپار قارجىسىن دا ءوز كاسساسىنان ەمەس، بارشا گازەت-جۋرنالدى قولتىعىنا قىسقان الىپ قۇرىلىم - «ءداۋىر» باسپاسىنان الاتىن. جۇزدەن استام قىزمەتكەرى بار رەداكسيادا ءتىپتى ەسەپشى، زاڭگەر دەگەن شتات تا بولمايتىن. بالانسىندا دا ءوز عيماراتى، تەحنيكاسى بولعان ەمەس. 200-300 مىڭ دانامەن تارايتىن، ياعني قازىناعا قىرۋار قارجى قۇيىپ جاتقان باسىلىم قىزمەتكەرلەرى «ءداۋىردىڭ» ەسەپشىسىنە كىرىپتار ەدى. ياعني رەداكسيالار سول زامان تالابىنا ساي تازا يدەولوگيالىق مەكەمەلەرگە اينالعان.

تاۋەلسىزدىك العان سوڭ رەداكسيالار «ءداۋىردىڭ» تۇزاعىنان قۇتىلىپ، مينيسترلىك قاراۋىنا كوشكەنىمەن، ءالى دە ەكونوميكالىق تۇرعىدا دەربەس، قۋاتتى، ايبارلى مەكەمەگە اينالا قويعان جوق ەدى. مىنە، وسىنداي ساتتە ساۋىتبەك ابدراحمانوۆ «ەگەمەن قازاقستان» ر گ» ا ا ق تىزگىنىن ۇستادى. ياعني ۇلكەن ۇجىم باسشىسىنا جۋرناليست، قالامگەر، ساياساتكەر رەتىندە ۇلتتىق باسىلىمدى ءمىنسىز، ۇزدىكسىز شىعارۋ مىندەتىنە قوسا، زامان تالابىنا سايكەس ەكونوميكالىق مەنەدجمەنتپەن دە اينالىسۋ جۇكتەلدى. ەكونوميكالىق-شارۋاشىلىق بلوك جاساقتالدى. بۇرىن مۇلدەم بولماعان ەكونوميست، زاڭگەر سياقتى ماماندار تارتىلىپ، جارناما مەنەدجەرى، ەسەپشىلەر قاتارى ارتتى.

مەن باس رەداكتوردىڭ ورىنباسارى رەتىندە ءبىرازدان بەرى گازەتتەگى ەكونوميكا مەن قۇقىق تاقىرىپتارىنداعى ماتەريالدارعا جاۋاپتى بولعاندىقتان، سىرتتاي ەكونوميكالىق ءبىلىم العان ەدىم. وسى ەسكەرىلدى مە، جاڭا باسشىمىز سىرتتان ەشكىمدى تارتپاي، وسى سالاعا جەتەكشىلىك جاساپ، وڭ ناتيجەگە قول جەتكىزۋدى تاپسىردى. ءسويتىپ، العاشىندا باسقارما ءتوراعاسى - پرەزيدەنت كەڭەسشىسى، سوڭىرا ديرەكتور، كەيىننەن ءتوراعا ورىنباسارى - ۆيتسە- پرەزيدەنت رەتىندە ون بەس جىلداي ارىپتەستەرىممەن بىرگە اكسيونەرلىك قوعامنىڭ ماتەريالدىق-تەحنيكالىق بازاسىن نىعايتىپ، عيماراتتارىن كوبەيتىپ، جارعىلىق قورىن ۇلعايتىپ، تابىستى مەكەمەگە اينالدىرۋعا ۇلەس قوسقانىمدى، ءبىراز ۋاقىت قالامدى قايلاعا ايىرباستاساق تا، جۋرناليستىك عۇمىربايانىمداعى جارقىن ساتتەر رەتىندە ەسكە الامىن. ساۋكەڭ ماعان عانا ەمەس، قاناتتاس ەكى ورىنباسارى - ەرجۇمان سمايىل مەن جانبولات اۋپبايەۆقا دا دەربەستىك، جەكە جاۋاپكەرشىلىك مىندەتىن جۇكتەدى. ۇساق-تۇيەككە ارالاسقان جوق. ۇجىمنىڭ ۇيىمشىل، بەرەكەلى بولۋىنا، وڭ ناتيجەگە قول جەتكىزۋىنە وسىنداي سەنىم مەن سىيلاستىق اتموسفەراسى دا اسەر ەتكەنى ءسوزسىز.

سونىمەن رەداكسيا ءبىرجولا كوشىپ كەلدى، كوپ ۇزاماي جاڭا باسشى تاعايىندالدى. جاڭا مىندەتتەر بەلگىلەندى. ارينە، الماتىدان كەيىن ارقانىڭ قىسى كىمگە ۇناي قويسىن؟ ونىڭ ۇستىنە رەداكسيا ماڭىنا كوز سالساڭ، كوڭىل قۇلازيدى. تىڭ يگەرۋ باستالعاندا ۋاقىتشا تۇرعىزىلعان ەكى قاباتتى اعاش باراكتار. ودان ءارى ىرگەتاسى جەرگە ءسىڭىپ كەتكەن ۇيلەر جانىندا جىلۋ بەرەتىن الىپ قۇبىرلار. سول قۇبىر ۇستىندە ماڭگىپ، ومىردەن كۇدەرىن ءۇزىپ، جىلىنىپ وتىرعان ءۇيسىز-كۇيسىز تاعدىرلار. «جۋكوۆكا» دەپ اتالاتىن (لومونوسوۆقا قاپتالداس جاتقان كەلەسى كوشە اۆياتسيانىڭ اتاسى ن. جۋكوۆسكي اتىندا ەكەن، كەيىن بەيسەكبايەۆ بولدى) بۇل ايماقتا ايقاي-شۋ، داۋ-داماي باسىلا قويمايدى. ويتكەنى تۇندە ىشىمدىك پەن ەسىرتكى ساتاتىن ۇيلەر وسىندا ەكەن.

بۇل ءوزى - شاھاردىڭ ءدال كىندىك تۇسى، اباي مەن كەنەسارى كوشەلەرىنىڭ ورتاسىندا. ءبىز كوشىپ كەلگەن سوڭ قازىر اللەياعا اينالعان گۇلزارعا شامدار مەن ورىندىقتار قويىلدى. اي سايىن سونىڭ ءبارى قيراپ قالاتىن. بۇل جەرگە جارىق تۇسكەنىن، ءتارتىپ ورناعانىن قالامايتىندار كوپ ەدى ول كەزدە. كوز الدىمىزدا بىرتىندەپ وزگەردى وسى ايماق. ونىڭ وزگەرۋىنە ساۋىتبەك ابدراحمانوۆ جەتەكشىلىك ەتكەن «ەگەمەن قازاقستاندىقتار» دا وزىندىك ۇلكەن ۇلەس قوستى.

قانشاما رەت بوياپ، ارلەسەك تە («ەسكىنى جاماپ، ەس كەتتى» دەپ قازاق تەگىن ايتپاعان عوي)، تىڭ يگەرۋ جاڭا باستالعان كەزدە، 1954 -جىلى سالىنعان رەداكسيا كەڭسەسى ءبىز ورنالاسا سالا اپاتتى جاعدايعا جەتتى. ءتىپتى جاۋاپتى حاتشى جانات ەلشىبەكتىڭ بولمەسىندەگى جارىلعان قابىرعادان دالا كورىنىپ تۇراتىن. ياعني عيماراتتىڭ ورتاسىنان قاق ءبولىنىپ قالۋ قاۋپى ءتوندى، قىزمەتكەرلەر وتىرعان بولمەلەردىڭ توبەسىنەن سىلاق قۇلاي باستادى. مۇنداي جاعدايدا جۇمىس ىستەۋ قاۋىپتى ەدى. مەن قۇجاتتاردى الىپ شۇعىل قالالىق ساۋلەت جانە قۇرىلىس دەپارتامەنتىنە بارىپ، كۇردەلى جوندەۋ جۇرگىزۋگە رۇقسات كەرەك ەكەنىن ايتتىم. قابىلداعان كەكسە ايەل كىسى بەتىمە قاراپ:

- ازامات، 1954 -جىلى سالىنعان، جارتى عاسىر تۇرعان عيمارات جوندەۋگە جاتپايدى، ونى تەز ارادا ءسۇرىپ تاستاۋ كەرەك، - دەدى.

بولعان جايدى باسشىمىز ساۋكەڭە ايتىپ كەلدىم. ول كىسى ءبىراز ءۇنسىز وتىردى دا:

- ال ەندى نە ىستەيمىز؟ - دەدى.

- نە ىستەيمىز، جاڭا عيمارات سالامىز.

ءسويتىپ، تاۋەكەل دەپ كىرىسكەن قۇرىلىس ەپوپەياسى ءبىراز جىلعا سوزىلدى. قۇرىلىسقا قارجى تارتۋ، جەر الۋ سياقتى ماڭىزدى مىندەتتەردى اكسيونەرلىك قوعام باسشىسى پرەزيدەنتكە، پارلامەنت دەپۋتاتتارىنا، مينيستر مەن قالا اكىمىنە كىرىپ، حات جازىپ ءجۇرىپ، مۇزجارعىشتاي الىپ شىقتى. ارينە، جوعارىدان تاپسىرما، نۇسقاۋ تۇسكەنىمەن، قۇرىلتايشىمىز - مينيسترلىك بالانسىمىزدا ەسكى دە بولسا عيماراتى بار بىزگە قۇرىلىس سالۋعا قارجى بولە المايتىنى بەلگىلى. سوندىقتان ەلدىڭ ەكى جەتەكشى باسىلىمىنا بىردەي شامادا قارجى جارعىلىق قوردى ارتتىرۋعا دەپ بەرىلدى.

ءبىز وسى اقشامەن تاۋەكەل دەپ جاڭا كەڭسە عيماراتىن باستادىق، ال «كازاحستانسكايا پراۆدا» مەكەمەسى سول قارجىعا بەس-التى جاڭا شەتەلدىك كولىك الدى. كولىكتەر كوپ ۇزاماي توزدى، ءبىزدىڭ عيماراتتار جاڭا زامانعا قاراي وزدى... جىلدار وتە اقىرى كورشىلەرىمىز ءبىزدىڭ عيماراتىمىزعا كەلىپ ورنىعىپ تىندى. قازىر ەكى رەداكسيا بىرگە. ءار ءسوزىن استارلاپ ايتاتىن ساۋكەڭنىڭ سول تۇستاعى «كازاحستانسكايا پراۆدانىڭ» «ەگەمەن قازاقستانعا» ءوز ەركىمەن قوسىلۋىنا قول جەتتى» دەگەن ءازىلى ءبىراز جۇرتقا بەلگىلى.

سەگىز قاباتتى عيمارات گازەتتىڭ توقسان جىلدىق مەرەيتويى قارساڭىندا پايدالانۋعا بەرىلدى. ونىڭ اشىلۋىنا پرەزيدەنت نۇرسۇلتان نازاربايەۆ كەلىپ قاتىستى. سونىڭ الدىندا ءبىزدىڭ رەداكسيا ورنالاسقان لومونوسوۆ كوشەسى «ەگەمەن قازاقستان» گازەتى» كوشەسىنە اينالدى.

ساۋىتبەك ابدراحمانوۆ رەداكسياعا عيمارات تۇرعىزۋمەن توقتاپ قالمادى. ونىڭ اڭگىمەسىن ەندى وزىنەن تىڭداڭىز. سول تۇستا ءماجىلىس ءتوراعاسى قىزمەتىن اتقارعان اسىل ازاماتىمىز ورال مۇحامەدجانوۆ تۋرالى جازعان «ورالۋ» اتتى ماقالاسىندا بىلاي دەيدى:

«ءىرى سويلەپ، كەسەك تۋرايتىن، الدى كەڭ ازامات ەدى. سول قاسيەتىنىڭ ءبىر شاراپاتىن كەزىندە قازاق باسپا ءسوزىنىڭ قارا شاڭىراعى دا كورە الدى. باس گازەتتىڭ 90 جىلدىعى قارساڭىندا ەلباسىنا ارنايى حات جازىپ، رەداكسياعا كوپقاباتتى جاڭا عيمارات سالۋعا قارجى بولىنەتىن بولىپ، سول اقشانى بيۋدجەت جوباسىن ناقتىلاۋ كەزىندە قوستىرۋدىڭ قامىمەن ماجىلىسكە جەتتىم. ورال بايعونىس ۇلى كومەكتەسەتىنىن ايتتى. سۇرالاتىن قارجىنى نەگىزدەپ، ءوزىنىڭ اتىنا جازبا ءتۇسىرۋىم كەرەكتىگىن ءتۇسىندىردى. ارادا ءبىر اپتاداي وتكەندە كەرەكتى قاعازدى جازىپ، الدىنا قايتا باردىم. بۇل جولى سۇراعانىمىز وتكەن جولعىدان قوماقتىلاۋ ەدى... جازباحاتىمدى وقىپ وتىردى دا، ورەكەڭ: «وي، سەن ءجۇز ميلليون تەڭگەگە كوبەيتىپ قويىپسىڭ عوي...»، دەدى. تۇپكى ماماندىعى ەكونوميست ەمەس پە، انا جولعى سومانى ەسىندە ساقتاپ قالعان ەكەن. «ورەكە، تالاي جىلدان بەرى جولداس بولىپ كەلەمىز، ءسىز بەن ءبىزدىڭ ارامىزدا ءجۇز ميلليون جۇرمەي مە، نەمەنە؟»، دەدىم تاۋەكەلگە باسىپ.

شىنى كەرەك، مۇنىم تابان استىندا سۋىرىپ سالىپ ايتىلعان ءسوز ەمەس ەدى، وزگەرتىلگەن اقشانى كوپسىنىپ جاتسا دەپ ساقتاعان «زاگوتوۆكام» بولاتىن. ورال بايعونىس ۇلى كۇلىپ جىبەردى دە، ورنىنان تۇرىپ، قولىمدى الدى. «ءسوز تاپقانعا قولقا جوق... شەشەمىز. بولدىرتەمىز»، دەدى كەسىمدى ۇنمەن. سونان كەيىن عانا «ول قوسىمشا اقشانى قايتپەكسىڭ؟»، دەپ سۇرادى. «رەداكسيانىڭ ەكى قاباتتى ەسكى ءۇيىن سۇرگىزىپ تاستاپ، سول جەرگە قىزمەتكەرلەرگە جاتاقحانا سالماقشى ەدىم». «وندا دۇرىس ەكەن». سولاي دەدى دە، تاپ سول ارادا ءماجىلىستىڭ بيۋدجەتكە جاۋاپتى كوميتەتىنىڭ ءتوراعاسى كەنجەعالي ساعاديەۆكە تەلەفوندادى. جاڭاعى ءسوزىمدى رازىلىقپەن كۇلىپ ايتىپ ەدى، انا جاقتان كەنجەكەڭنىڭ: «ونداي سوزدەن ساداعا كەتپەيمىز بە؟ كەلسىن قازىر» دەگەن داۋىسى ەستىلىپ جاتتى. ارادا ءبىر جارىم جىلداي عانا ۋاقىت وتكەندە ءبىز كوپقاباتتى رەداكسيا عيماراتىن دا، ونىڭ جانىنان ءتورت قاباتتى جاتاقحانانى دا تۇرعىزىپ ۇلگەردىك... جاقسىدان شاراپات دەگەن سول».

ءيا، تاۋىپ ايتقان ءبىراۋىز سوزىمەن قىرۋار قارجىنىڭ ماسەلەسىن شەشكەن باسشىمىزدىڭ ارقاسىندا باس وفيس جانىنداعى رەداكسيانىڭ ەسكى عيماراتىن سىرىپ تاستاپ، ەكى جاتاقحانانى تۇرعىزدىق. مۇنىڭ الدىندا «جاستار» شاعىن اۋدانىندا بەس قاباتتى ءبىر پودەزدى تۇرعىن ءۇي سالساق، كەڭسە عيماراتىمەن قاتار ءدال ىرگەدەن توعىز قاباتتى «ەگەمەن» تۇرعىن ءۇي كەشەنى دە پايدالانۋعا بەرىلدى.

سول كەزدەگى قالا اكىمى ءومىرزاق شوكەيەۆتەن قۇرىلىس سالاتىن جەرگە رۇقسات الۋ، بولاشاق ءۇيدىڭ ورنىنداعى جەتى گاراجدى كوشىرۋگە قاتىستى تۋىنداعان داۋدى شەشۋ، اۋلاسىنا جاڭا ءۇي تۇسەتىنىنە، كەم قويعاندا ءبىر جىل بويىندا مازاسى كەتەتىندەرىنە نازالانىپ، تالاي جينالىس اشقان كورشى ءۇي تۇرعىندارىنىڭ اۋلالارىن اسفالتتاپ، بالالار وينايتىن اتتراكسيون قويىپ بەرىپ تىنىشتاندىرۋ، «ءبىز جەر الىپ بەرمەسەك، سىزدەر ءۇي سالا المايتىن ەدىڭىزدەر، شارتىمىزعا كەلىسپەسەڭىزدەر باسقانى تابامىز» دەپ، قۇرىلىس جۇرگىزەتىن كومپانيانى «ەگەمەن قازاقستاندىقتارعا» بولىنەتىن 18 پاتەردىڭ قۇنىن تومەندەتۋگە كوندىرۋ... ايتۋعا عانا وڭاي. وسىنىڭ بارىنە ساۋكەڭنىڭ بەدەلى دە، ديپلوماتياسى دا جەتتى.

پاتەرسىز نەمەسە سىرتتا پاتەر جالداعان بىردە-ءبىر قىزمەتكەر قالعان جوق. پاتەر بەرە الماعاندارىمىزعا ەكى بولمەلى جايلى جاتاقحانا ۇسىندىق. اينالا وزگەرە باستادى. رەنوۆاتسيا باعدارلاماسىنا سايكەس باراك ۇيلەردىڭ مۇرتى بۇزىلدى. اراق ساتاتىن ۇيلەر كولىك جوندەيتىن شاعىن شەبەرحاناعا اينالدى. بۇرىنعى باراكتار ورنىنا «قالامگەرلەر» اللەياسى سالىنىپ، الاش ارىستارىنىڭ ەسكەرتكىشى قويىلدى. ەندى، مىنە، سوعان قاپتالداسىپ «جۋرناليستەر اللەياسى» اشىلدى. كەشەگى «جۋكوۆكانى» كوزى كورگەندەر ءۇشىن بۇل شىنايى قۋانىش ەمەس پە؟ ومىرىمىزدە وسىنداي ناقتى وزگەرىستەر بولعانى، وعان ءوزىمىز دە ازدى-كوپتى ۇلەس قوسقانىمىز - ءبىر مارتەبە.

اكسيونەرلىك قوعامنىڭ الەۋەتى قۇرىلىس سالۋمەن، بىتكەن عيماراتتاردى بالانسقا الىپ، جارعىلىق قوردى كوبەيتۋمەن شەكتەلمەيتىنى بەلگىلى. باستى ءونىم - گازەت تارتىمدىلىعىن ارتتىرۋ ءۇشىن ە. سمايىل كەزىندە باستالعان «ەتجەڭدى «ەگەمەن» جوباسى جەمىستى جالعاستى. «سىرەسكەن «س ق» دەگەن اتى بار، رەسمي ماتەريالداردان كوز اشپايتىن باسىلىم ءۇشىن بۇل اسا قاجەت قادام ەدى. ول تابىستى بولدى. جىل سايىن وزىق ماقالالاردى توپتاستىرىپ، كىتاپ شىعارىپ وتىردىق. ءار توقسان سايىن جوسپار ءتۇزىلىپ، كۇندەلىكتى نومىرگە دە ەلىمىزدەگى ايتۋلى تۇلعالاردىڭ ماقالالارى جاريالانىپ تۇردى.

گازەت جاڭالىعى ەسكىرمەۋ ءۇشىن وقىرمانعا دەر كەزىندە جەتىپ وتىرۋ كەرەك. سوندىقتان العاشقىدا شىعىنعا باتساق تا، گازەتتىڭ بارلىق وبلىس ورتالىقتارىندا باسىلۋىنا قول جەتكىزدىك (وبلىس ورتالىقتارىندا قازاق باسىلىمدارى ساتىلاتىن «ەگەمەننىڭ» دۇڭگىرشەكتەرىن ورناتۋ جوباسىن سوڭىنا جەتكىزە الماعانىمىز وكىنىشتى). «قازپوشتامەن»، جەرگىلىكتى بيلىكپەن تىعىز قارىم-قاتىناس ورناتۋ وقىرمانعا گازەتتىڭ كەشىكپەي جەتۋىنە مۇمكىندىك تۋعىزدى. ساۋىتبەك ابدراحمانوۆ ءوزى باس بولىپ، رەداكسيا قىزمەتكەرلەرى كۇزدە ايماقتارعا شىعىپ، وقىرماندارمەن ەمەن- جارقىن كەزدەسۋلەر وتكىزۋدى بەرىك داستۇرگە اينالدىردى. وسىنىڭ ءبارى گازەت تارالىمىن 38 مىڭنان 212 مىڭعا دەيىن ءوسىردى.

جىل سايىن مينيسترلىكتەن مەم تاپسىرىس ورىنداۋ ءۇشىن بولىنەتىن قارجى گازەت قاعازىن ساتىپ الۋدان ارتىلمايدى. قاعاز رەسەيدە شىعارىلادى، تاسۋشى دا مونوپوليست، سوندىقتان جىل سايىن قىمباتتايدى. ال مەم تاپسىرىس قارجىسى وسپەيدى. باسپاحانالارعا تولەنەتىن قارجى، جالاقى، سىياقى، كوممۋنالدىق شىعىنداردى جابۋ - ءوز مىندەتىمىز. گازەتكە جازىلىمنان تۇسەتىن جانە جارنامادان، اقىلى ماتەريالداردان جينالاتىن قارجى كولەمىنىڭ ءوسۋى اكسيونەرلىك قوعامنىڭ ەكونوميكالىق جاعدايىن جاقسارتتى. ەندى بىزگە جارناما بەرۋشىلەر كوبەيدى. نەگە؟ سەبەبى، ولار «ەگەمەن قازاقستاننىڭ» ەلدەگى تارالىمى ەڭ كوپ باسىلىم ەكەنىن ءبىلىپ وتىردى.

جارناماسىن 200 مىڭنان استام دانامەن تاراتىپ بەرەتىن گازەت كىمگە ۇناماسىن؟ سودان دا تابىسىمىز ارتتى. قىزمەتكەرلەر جالاقىسى جوعارىلادى، ال سىياقى توقسان سايىن جانە مەرەكەلەردە بەرىلىپ تۇردى. ءتىپتى قىزمەتكەرلەرگە ءتۇرلى الەۋمەتتىك مۇقتاجدىقتار ءۇشىن اق تاراپىنان ءوسىمسىز نەسيە دە بەرىلەتىن. قىسقاسى، بىلىكتى مەنەدجەر ساۋىتبەك ابدراحمانوۆ قارا شاڭىراقتا ۇزدىكسىز 15 -جىل باسشىلىق ەتىپ (اراسىندا ءبىر جىلداي اقپارات ءمينيسترى قىزمەتىن اتقاردى)، پارلامەنت ءماجىلىسىنىڭ دەپۋتاتى بولىپ سايلانىپ، اكسيونەرلىك قوعام تىزگىنىن ماعان ۇستاتقاندا گازەت تيراجى 212 مىڭ، جىل سايىنعى تازا تابىس 60-70 ميلليون تەڭگە ارالىعىندا بولاتىن.

وسى ايتىلعان اڭگىمە ساۋىتبەك ابدراحمانوۆتى اتاقتى جۋرناليست، مادەنيەتتانۋشى، ادەبيەتتانۋشى عانا ەمەس، ب ا ق- تىڭ كورنەكتى مەنەدجەرى رەتىندە دە تانىتا الادى دەپ ويلايمىن. مەرەيتوي تۇسىندا ءبىز ونىڭ كوپ ايتىلا بەرمەيتىن وسى قىرىنا باسا نازار اۋدارۋدى ءجون كوردىك.

ەركىن قىدىر، قازاقستاننىڭ ەڭبەك سىڭىرگەن قايراتكەرى، پرەزيدەنت سىيلىعىنىڭ لاۋرەاتى

«ەگەمەن قازاقستان» گازەتى