ەلوردالىق 473 جەكە تۇلعا بانكروت دەپ تانىلدى

ەلوردادا 473 جەكە تۇلعا بانكروت مارتەبەسىن الدى. بۇل تۋرالى استانا قالالىق مەملەكەتتىك كىرىستەر دەپارتامەنتى بەرەشەكتەرمەن جۇمىس باسقارماسىنىڭ باسشىسى يسابەك زاۋىتبەك ۇلى ايتتى، دەپ حابارلايدى Kazinform.

«وزدەرىڭىز بىلەتىندەي، 2023 -جىلعى 3 - ناۋرىزدان باستاپ ەلىمىزدە جەكە تۇلعالاردىڭ بانكروتتىعى بويىنشا وتىنىشتەردى قابىلداۋ باستالدى. سول ساتتەن باستاپ استانا قالاسى بويىنشا 4383 ءوتىنىش ءتۇستى. ونىڭ ىشىندە 473 جەكە تۇلعاعا قاتىستى ءراسىم اياقتالدى. ياعني، ولارعا «بانكروت» مارتەبەسى بەرىلىپ، بەرەشەكتەرى ەسەپتەن شىعارىلدى. 3282 ءوتىنىش قاراۋ بارىسىندا باس تارتىلدى. 28 ءوتىنىشتى ازاماتتاردىڭ وزدەرى كەرى قايتارىپ الدى جانە 600 ءوتىنىش بۇگىنگى تاڭدا قارالىپ جاتىر»، - دەدى ول استانا قالالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، پروتسەدۋرا سوتتان تىس بانكروتتىق، سوت جانە تولەم قابىلەتتىلىگىن قالپىنا كەلتىرۋ راسىمدەرىنەن تۇرادى.

«سوتتان تىس بانكروتتىقتى تەك بانكتەر، ميكروقارجى ۇيىمدارى جانە كوللەكتورلىق اگەنتتىكتەر الدىنداعى قارىزدار بويىنشا قولدانۋعا بولادى. ونىڭ شارتتارى بار. بىرىنشىدەن، بورىشكەردىڭ قارىزى 5 ميلليون 520 مىڭ تەڭگەدەن اسپاۋى ءتيىس. ەكىنشىدەن، سوڭعى 12 اي ىشىندە قارىزىن تولەمەۋى كەرەك. ۇشىنشىدەن، قانداي دا ءبىر ورتالىق مۇلكىنىڭ بولماۋى مىندەتتى. تورتىنشىدەن، بانكتەرمەن رەتتەۋ ءىس- شارالارى جۇرگىزىلۋى ءتيىس»، - دەدى يسابەك زاۋىتبەك ۇلى.

باسقارما باسشىسى 6 اي ىشىندە اتاۋلى الەۋمەتتىك كومەك الۋشىلار مەن 5 جىلدان استام بەرەشەگى وتەلمەيتىن ازاماتتار ءۇشىن ەرەكشە جاعدايلار قاراستىرىلعانىن ايتادى. سوتتان تىس بانكروتتىق «ەلەكتروندىق ۇكىمەت» پورتالىندا باستالادى. سودان كەيىن اقپاراتتىق جۇيە ارقىلى بورىشكەردىڭ كىرىس كريتەرييلەرىنە سايكەستىگى تۇرعىسىنان مەملەكەتتىك ورگانداردىڭ دەرەكتەرىمەن اۆتوماتتى تۇردە سالىستىرۋ جۇرگىزىلەدى.

ەكىنشى ءراسىم - سوت بانكروتتىعى. بۇل ءراسىم بارلىق كرەديتور الدىنداعى 1600 اەك- تەن استام بورىش بويىنشا جۇزەگە اسىرىلادى. ءوتىنىشتى بورىشكەر ازاماتتىق ىستەر جونىندەگى اۋدانارالىق سوتقا جازباشا تۇردە نەمەسە ەلەكتروندىق قۇجات نىسانىندا بەرەدى. پروتسەدۋرا 6 ايدان 12 ايعا دەيىن سوزىلادى. سوت گەيدار اليەۆ 6 مەكەنجايىندا ورنالاسقان.

«ەگەر جالعىز تۇرعىن ءۇي كەپىل نىساناسى بولىپ تابىلسا، وندا كرەديتور ونى سوت بانكروتتىعى بارىسىندا الىپ قويۋعا قۇقىلى. ەگەر جالعىز تۇرعىن ءۇي كەپىل بولماسا، نەسيە بەرۋشىلەر ونى تالاپ ەتە المايدى»، - دەدى ول.

ونىڭ اتاپ وتۋىنشە، ءۇشىنشى ءراسىم - سوتتا قارىزداردى ءبولىپ تولەۋ مۇمكىندىگىن كوزدەيتىن تولەم قابىلەتتىلىگىن قالپىنا كەلتىرۋ. بۇل ءراسىمنىڭ ارتىقشىلىعى - ادام «بانكروت» مارتەبەسىن الا المايدى. سوندىقتان وعان بانكروت ءۇشىن قاراستىرىلعان سالدارلار قولدانىلمايدى.

اۆتور

مارلان جيەمباي