ەلورداداعى قىزىلوردا وبلىسىنىڭ ونەر كۇندەرى «ءجاميلا» سپەكتاكلىمەن اشىلدى
استانادا قىزىلوردا وبلىسىنىڭ مادەنيەت جانە ونەر كۇندەرى وتۋدە. ونەر مەرەكەسى استانا قالالىق جاستار تەاترى ساحناسىندا ن. بەكەجانوۆ اتىنداعى قازاق اكادەميالىق مۋزىكالىق دراما تەاترى قويعان «ءجاميلا» دراماسىمەن اشىلدى.
بۇل تۋرالى Kazinform قىزىلوردا وبلىسى اكىمىنىڭ باسپا ءسوز قىزمەتىنە سىلتەمە جاساپ حابارلايدى.
ش. ايتماتوۆتىڭ بۇل دراماسىندا قالىپتاسقان ءداستۇر مەن ءوز تاعدىر تاقتاسىنداعى تاڭداۋعا قارسى تۇرعان جاس ايەلدىڭ ناۋبەتكە تولى ماحابباتى بەينەلەنەدى. ءجاميلانىڭ ومىرىندەگى باستى سىناق تا وسى بولاتىن.
ن. بەكەجانوۆ اتىنداعى قازاق مۋزىكالىق دراما تەاترىنىڭ ارتىستەرى ساحنالاعان قويىلىمدى زيالى قاۋىم وكىلدەرى باستاعان مارتەبەلى مەيماندار مەن ەلوردالىق تۇرعىندار تاماشالادى.
ەرتەڭ مەملەكەت جانە قوعام قايراتكەرى ت. جۇرگەنوۆتىڭ 125 جىلدىعى اياسىندا ر.وتاربايەۆتىڭ «ناركوم جۇرگەنوۆ» سپەكتاكلى ساحنالانباق. بۇل سپەكتاكل كەڭەس زامانىندا حالىق اعارتۋ كوميسسارى قىزمەتىندە ءجۇرىپ، ۇلتتىڭ رۋحىن وياتۋعا ولشەۋسىز ۇلەس قوسقان كورنەكتى مەملەكەت جانە قوعام قايراتكەرى تەمىربەك قارا ۇلى جۇرگەنوۆتىڭ قيلى تاعدىرىن باياندايدى.
مۇنان بولەك، ەرتەڭ ەلوردا تورىندە «سىر ءوڭىرى - تۇركى وركەنيەتىنىڭ التىن بەسىگى» اتتى كورمە اشىلادى. كورمە سىر ءوڭىرىنىڭ تاريحىن باياندايتىن 3 بولىمنەن تۇرادى. ەجەلگى ساق داۋىرىنەن باستاپ بۇگىنگى كۇنگە دەيىن ايماقتىڭ الەۋمەتتىك- مادەني دامۋى مەن جەتىستىكتەرىن سۋرەتتەيتىن كورمەگە سىعاناق قالاشىعىنان تابىلعان بىرەگەي ارحەولوگيالىق جادىگەرلەر جانە ەلىمىزدىڭ تاريحىنا عىلىمي جاڭالىق بولىپ ەنەتىن «شىرىك- رابات ساق جاۋىنگەرى»، «سىعاناق حانشايىمى» رەكونسترۋكسيالارى العاش رەت قويىلادى.
سىر ءوڭىرىنىڭ ونەر كۇندەرى «بەيبىتشىلىك جانە كەلىسىم سارايىندا» وتەتىن استانا قالاسىنىڭ 25 جىلدىعىنا ارنالعان «سۇلۋ سىردان ارۋ استاناعا» اتتى قىزىلوردا وبلىسى ونەر شەبەرلەرىنىڭ گالا كونسەرتىمەن قورىتىندىلانباق.
اۆتور
ايدار وسپاناليەۆ
