ەلوردادا اسىق اتۋدان تۇڭعىش الەم چەمپيوناتى باستالدى
استانا. KAZINFORM - استانادا اسىق اتۋ سپورتىنان الەم چەمپيوناتىنىڭ اشىلۋ ءراسىمى ءوتتى. بۇل تۋرالى ەلوردا اكىمدىگىنىڭ رەسمي سايتى حابارلادى.
«اسپان» سپورت كەشەنىندە وتكەن ءىس-شارانى كوشپەندىلەردىڭ اسىق سپورتى حالىقارالىق فەدەراتسياسى مەن «اسىق اتۋ» رەسپۋبليكالىق فەدەراتسياسى استانا قالاسى اكىمدىگىنىڭ قولداۋىمەن ۇيىمداستىرىپ وتىر.
«قۇرمەتتى قاتىسۋشىلار مەن قوناقتار. بۇگىن اسىق اتۋدان ءبىرىنشى الەم چەمپيوناتى بولىپ جاتىر. ول قازاق جەرىندە ءوتىپ جاتقانى جايدان-جاي ەمەس. بارلىقتارىڭىزعا قاتىسقاندارىڭىزعا راقمەت. سىزدەرگە ساتتىلىك تىلەي وتىرىپ، بۇگىنگى جارىستى اشىق دەپ جاريالايمىن»، - دەدى ءماجىلىس دەپۋتاتى، كوشپەندىلەر اسىق سپورتى حالىقارالىق فەدەراتسياسىنىڭ پرەزيدەنتى ولجاس قۇسپەكوۆ.
ۇيىمداستىرۋشىلاردىڭ ايتۋىنشا، اتالمىش چەمپيونات قازاق حالقىنىڭ ۇلتتىق داستۇرلەرى مەن مادەنيەتىن الەمدىك ارەنادا ىلگەرىلەتۋدەگى ماڭىزدى قادامداردىڭ ءبىرى بولماق.
«بۇگىن - تاريحي كۇن. سەبەبى ەلوردادا اسىق اتۋدان تۇڭعىش الەم چەمپيوناتى ءوتىپ جاتىر. اسىق اتۋ - بۇل قازاق حالقىنىڭ ءداستۇرلى ويىنى. ويىن ەپتىلىككە، مەرگەندىككە، شاپشاڭدىققا، سەرگەكتىككە باۋليدى. ءبىر سوزبەن ايتقاندا، بۇل ويىننىڭ پايداسى مول»، - دەدى اسىق اتۋ فەدەراتسياسىنىڭ اتقارۋشى ديرەكتورى ازامات ماناپوۆ.
بۇگىن اشىلۋ راسىمىندە قاتىسۋشىلار مەن كورەرمەندەرگە اسەرلى كونسەرتتىك باعدارلامالار، ۇلتتىق مۋزىكالىق جانە بي قويىلىمدارى ۇيىمداستىرىلدى. سونداي-اق جينالعاندار اسىق اتۋ ويىنى تۋرالى جان-جاقتى اقپارات الىپ، ونىڭ قىر-سىرىمەن تانىستى.
ۇلتتىق سپورتتىق ءىس-شارانىڭ ماقساتى - اسىق اتۋدى الەمدىك دەڭگەيدە ناسيحاتتاۋ، حالىقارالىق سپورتتىق بايلانىستاردى نىعايتۋ.
ەلوردادا اسىق اتۋدان الەم بويىنشا چەمپيوناتقا 15 ەلدەن ەڭ ۇزدىك سپورتشىلار قاتىسىپ، قازاقتىڭ ۇلتتىق ويىنى اسىق اتۋدا باق سىناپ جاتىر.
جەڭىمپازدار اقشالاي سىياقىمەن جانە كۋبوكتارمەن ماراپاتتالادى.
سپورتتىق جارىسقا قازاقستان، ا ق ش، گرۋزيا، ۆەنگريا، رەسەي فەدەراتسياسى، رۋمىنيا، موڭعوليا، تاجىكستان، تۇركيا، يسپانيا، چەحيا، ءۇندىستان، وزبەكستان سەكىلدى ەلدىڭ سپورتشىلارى كەلدى.
اۆتور
باقىتگۇل اباي قىزى
