ەلوردا ىرگەسىندەگى جىبەك جولى اۋىلىنا گاز بەرىلدى

استانا. قازاقپارات - ەلوردا ىرگەسىندەگى جىبەك جولى اۋىلى كوگىلدىر وتىنعا قوسىلدى، دەپ حابارلايدى 24kz.

اۋىل ىشىندە جۇرگىزىلگەن گاز قۇبىرىنىڭ ۇزىندىعى 250 شاقىرىمعا جۋىقتايدى. ەلدى مەكەندەردى تابيعي گازعا قوسۋ مەملەكەت باسشىسىنىڭ باستاماسىمەن جۇزەگە اسىپ جاتىر. ءبىر عانا جىبەك جولى اۋىلىندا 7000 اۋلانى قامتۋ كوزدەلگەن. اقمولا وبلىسىنداعى جىبەك جولى اۋىلىندا ۇلكەن قۋانىش. جەرگىلىكتى حالىق كوپتەن كۇتكەن كوگىلدىر وتىنعا قول جەتكىزدى.

مارات احمەتجانوۆ، اقمولا وبلىسىنىڭ اكىمى:

- پرەزيدەنتتىڭ جولداۋىندا ايتىلعان تاپسىرماعا سايكەس حالىقتىڭ الەۋمەتتىك جاعدايىن كوتەرۋ، ءومىر ءسۇرۋ ساپاسىن جاقسارتۋ ماقساتىندا ۇلتتىق QazaqGaz كومپانياسىمەن بىرىگىپ، وسى جىبەك جولى اۋىلىنا كوگىلدىر وتىن، تابيعي گازدى قولجەتىمدى قىلىپ وتىرمىز. ارشالى اۋدانىندا 16 ەلدى مەكەن وسى تابيعي گازعا قوسىلىپ وتىر. مىنە، جىبەك جولى 17- ءشى.

جىبەك جولى - ارشالى اۋدانىنداعى ءىرى اۋىلداردىڭ ءبىرى. مۇندا باس- اياعى 7000 اۋلاعا گاز جەتكىزۋ كوزدەلگەن. ۇيىنە كوگىلدىر وتىن جەتكەندەردىڭ العاشقىسى - ەلۆيرا قالدىبايەۆا. كوپبالالى انانىڭ قۋانىشىندا شەك جوق.

ەلۆيرا قالدىبايەۆا، جىبەك جولى اۋىلىنىڭ تۇرعىنى:

- جىبەك جولى بويىنشا ءبىرىنشى مەنىڭ ۇيىمە كىرىپ جاتىر. كوردىڭىزدەر كوزدەرىڭىزبەن، بارلىق گاز جانىپ تۇر. كەشەدەن بەرى ءۇيدى دە جىلىتىپ جاتىرمىز گازبەن. جىلدا 12 توننا كومىر الاتىنمىن.

جىبەك جولى حالقىنىڭ باسىم بولىگى جۇمىس بابىمەن ەلورداعا قاتىنايدى. تۇرعىلىقتى مەكەنجايىندا تىركەلمەگەندەر كوپ. بۇل كەلىپ تۇرعان گازدى ۇيگە جەتكىزۋگە كەدەرگى كەلتىرۋى مۇمكىن. سول سەبەپتى جەرگىلىكتى اكىمدىكتە ارنايى قىزمەت كورسەتۋ ورتالىعى ىسكە قوسىلدى. ونداعى ماماندار تۇرعىندارعا ءۇيدى مەنشىكتەۋگە، مەكەنجايى بويىنشا تىركەلۋگە، گاز قوسۋعا تەحنيكالىق قۇجاتتاردى الۋعا كومەكتەسەدى.

سانجار جاركەشوۆ، «QazaqGaz» ۇ ك» ا ق باسقارما ءتوراعاسى:

- قازاقستان بويىنشا اكىمدىكتەردىڭ ءرولى وتە ۇلكەن. ويتكەنى ولاردىڭ وزدەرىنىڭ بيۋدجەتىمەن جانە دە مەردىگەر كومپانيالارمەن بىرگە جۇمىس اتقارىپ، وسىنداي ىشكى گاز قۇبىرىن سالادى. ءبىز ۇلتتىق كومپانيا رەتىندە ءوزىمىزدىڭ ۇلكەن قىسىمداعى ماگيسترالدىق گاز قۇبىرلارىن سالامىز. سوسىن اكىمدىكتەرمەن بىرگە جۇمىستانىپ، ەلدى مەكەندەرگە گاز بەرەمىز. سوسىن وسى نىساندار ءبىزدىڭ بالانسقا بەرىلەدى. ءبىز سەرۆيستىك جۇمىس اتقارامىز.

قازىرگى ۋاقىتتا مەملەكەت باسشىسىنىڭ تاپسىرماسى بويىنشا گازداندىرۋ كولەمى قازاقستاندا ارتىپ جاتىر. كوگىلدىر وتىن جىل سوڭىنا دەيىن جىبەك جولى اۋىلىنداعى 2000 اۋلاعا جەتكىزىلەدى.

ارشالى اۋدانىنىڭ اكىمدىگى الەۋمەتتىك وسال توپتاعى ازاماتتارعا گاز قۇبىرىن ورناتۋ ءۇشىن 100 اەك- كە دەيىن ءبىر رەتتىك الەۋمەتتىك كومەك ۇسىنباق.