ەلوردادا بەلسەندى زەينەتكەرلەر كوپ

استانا. قازاقپارات - ەلوردادا زەينەتكەرلەر اراسىندا بەلسەندى ۇزاق ءومىر ءسۇرۋ ورتالىقتارىنا دەگەن قىزىعۋشىلىق ارتتى. قازىر مۇنداي مەكەمەلەردە 23 مىڭنان استام ادام تىركەلگەن. قارتتار ورتالىقتا جانىنا جاقىن ىسپەن اينالىسىپ، دەنساۋلىعىن نىعايتادى، جاڭا دوستار تابادى، دەپ حابارلايدى 24KZ.

Белсенді ұзақ өмір сүру орталықтарында зейнеткерлерге қандай қызметтер тегін көрсетіледі
Фото: Алматы әкімдігі

ەلوردا تۇرعىنى روزا بايماعامبەتوۆا شەت تىلىنەن ساباق بەردى. جاقىندا زەينەتكە شىققان ول ۇيدە وتىرىپ قالماي، بەلسەندى ۇزاق ءومىر ءسۇرۋ ورتالىعىنا بارا باستادى. بۇرىننان قالاعان ءىسى لاتىن-امەريكالىق بي ەدى. قازىر روزا اپاي توبىمەن بىرگە ءتۇرلى بايقاۋعا قاتىسىپ، جۇلدەلى ورىندار الىپ ءجۇر.

 روزا بايماعامبەتوۆا، قالا تۇرعىنى:

 - بي بيلەۋدى ارماندايتىنمىن. سول ارمانىم زەينەتكە شىققاندا ورىندالدى. كىم ويلاعان دەيسىز؟! وسى ورتالىق پەن ونداعى قىزمەتكەرلەردىڭ قولداۋىنىڭ ارقاسىندا ومىرگە دەگەن قۇلشىنىسىم ارتا ءتۇستى. زەينەتكەرلەردى نازاردان تىس قالدىرماي، وسىنداي مۇمكىندىك جاساپ وتىرعاندارىنا راقمەت. مەنىڭشە، مۇنداي ورتالىقتار ەلىمىزدىڭ بارلىق وڭىرىندە جۇمىس ىستەۋى كەرەك.

استاناداعى بەلسەندى ۇزاق ءومىر ءسۇرۋ ورتالىقتارىنا كۇن سايىن 2,5 مىڭنان استام زەينەتكەر كەلەدى. مۇندا ولار سپورتپەن شۇعىلدانىپ، كومپيۋتەردى مەڭگەرەدى جانە شەت تىلدەرىن ۇيرەنەدى. سونداي-اق ءان ايتىپ، بي بيلەپ، مۋزىكالىق اسپاپتاردا ويناپ، شىعارماشىلىق قابىلەتتەرىن دامىتا الادى. قارتتاردىڭ دەنساۋلىعىن نىعايتۋعا دا ەرەكشە كوڭىل بولىنەدى. ساباق كەستەسىندە يوگا، پيلاتەس، ەمدىك جانە وڭالتۋ جاتتىعۋلارى بار.

 ەلميرا جارىلعاپوۆا، يوگا جاتتىقتىرۋشىسى:

- يوگاعا دەگەن قىزىعۋشىلىق جوعارى. بىزدە كۇتۋ ءتىزىمى بار. وندا 50-گە جۋىق ادام كەزەكتە تۇر. قاتىسۋشىلار ساباققا كەلىپ، ناتيجەسىن كورىپ ءجۇر. بۋىندارى نىعايىپ، بۇلشىقەتتەرى جۇمىس ىستەيدى. يوگا ادامعا جاعىمدى اسەر ەتەدى. دەنساۋلىق جاقسارادى، ادامنىڭ كوڭىل كۇيى مەن وي سەرگەكتىگىنە وڭ ىقپال ەتەدى. جارتى جىلدا كەلۋشىلەردىڭ دەنساۋلىعى ايتارلىقتاي جاقسارادى. كۋرستى اياقتاعان كەزدە ءبارىنىڭ جۇزىنەن قۋانىش بايقايمىن.

مامانداردىڭ ايتۋىنشا، ەگدە جاستاعى ادامدار ءۇشىن دەنە شىنىقتىرۋمەن قاتار، قوعامدا بەلسەندى بولۋ دا ماڭىزدى. ولار ءۇشىن جۇرتپەن ارالاسىپ، تاجىريبە الماسقان ماڭىزدى.

 اسەل قۇسايىنوۆا، قالا اكىمدىگى جانىنداعى بەلسەندى ۇزاق ءومىر ءسۇرۋ ورتالىعىنىڭ جەتەكشى مامانى:

 - اي سايىن كەلۋشىلەر سانى شامامەن 100 ادامعا كوبەيەدى. ولار ورتالىقتارعا تىركەلىپ، تەگىن الەۋمەتتىك قىزمەت الادى. كوبىسى ءبىز تۋرالى تۋىستارىنان، بالالارىنان، كورشىلەرىنەن نەمەسە ورتالىققا كەلىپ جۇرگەن وزگە زەينەتكەرلەردەن ەستيدى. اي سايىن ەمحانالاردى ارالايمىز. زەينەتكەرلەردى ورتالىققا كەلۋگە شاقىرامىز. مۇندا كەلگەندەر جاڭا قۇربىلارمەن تانىسادى. ەر ادامدار دا دوس تابادى. ءتىپتى جۇپ بولىپ كەتەتىندەر دە بار.

 ورتالىقتا 90 جاستان اسقان ادامدار دا ساباققا قاتىسادى. قارتتاردا كوپشىلىكپەن ارالاسۋ جانە جاڭا دۇنيەلەردى ۇيرەنۋگە دەگەن ىنتا بار.