استانادا قولما-قول اقشامەن جولاقى تولەۋ قايتا ەنگىزىلمەك: جولاقى قىمباتتادى

قۇجاتقا سايكەس، قالالىق قوعامدىق كولىكتە جولاقىسىن ەلەكتروندىق جول ءجۇرۋ قۇجاتى نەمەسە ەلەكتروندىق تولەمنىڭ قوسىمشا قىزمەتتەرى ارقىلى قولما-قول اقشاسىز تولەگەن جاعدايدا جولاقىسى 150 تەڭگە.

ال جەدەل قالالىق اۆتوبۋستاردا قولما-قول اقشاسىز تولەم كەزىندە جول ءجۇرۋ قۇنى 300 تەڭگە بولىپ بەلگىلەنگەن.

الەۋمەتتىك ماڭىزى بار تۇراقتى تاسىمال باعىتتارىندا دا ەلەكتروندىق تولەم ارقىلى جول ءجۇرۋ اقىسى 150 تەڭگە بولادى.

ال قولما-قول اقشامەن تولەگەن كەزدە قالالىق اۆتوبۋستا جول ءجۇرۋ قۇنى 300 تەڭگە. جەدەل قالالىق اۆتوبۋستاردا بۇل سوما 400 تەڭگە بولىپ بەلگىلەنگەن.

الەۋمەتتىك ماڭىزى بار تۇراقتى تاسىمال باعىتتارىندا قولما-قول تولەم تاريفى دە 300 تەڭگە بولادى.

قالا ماڭى باعىتتارىندا جولاقىسى جۇرىلگەن قاشىقتىققا قاراي ەسەپتەلەدى. ەلەكتروندىق تولەم كەزىندە ءبىر كيلومەتر ءۇشىن 13 تەڭگە، ال قولما-قول اقشامەن تولەۋ كەزىندە ءبىر كيلومەتر ءۇشىن 19 تەڭگە بەلگىلەنگەن.

سونىمەن قاتار جەڭىلدىك كارتاسىمەن الەۋمەتتىك ماڭىزى بار تۇراقتى تاسىمال باعىتتارىندا جول ءجۇرۋ اقىسى 0 تەڭگە.

ەلەكتروندىق جولاقى تولەۋ جۇيەسى جارامسىز بولعان جاعدايدا ەلەكتروندىق جول ءجۇرۋ قۇجاتى نەمەسە ەلەكتروندىق تولەمنىڭ قوسىمشا قىزمەتتەرى ارقىلى تولەمدى جۇزەگە اسىراتىن جولاۋشى تەگىن جول ءجۇرۋدى پايدالانادى.

وسىلايشا، استانادا قوعامدىق كولىك تاريفتەرى كولىك تۇرىنە، باعىتتىڭ ساناتىنا جانە تولەم تاسىلىنە قاراي سارالانعان.

استانا قالاسى اكىمدىگىنىڭ قاۋلىسى 14 -قازاندا رەسمي جاريالاندى. قۇجات العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

بۇعان دەيىن استانادا قوعامدىق كولىكتە جول ءجۇرۋ اقىسى 150 تەڭگەگە كوتەرىلەتىنىن جازعان ەدىك.