لوندوندا حالىقارالىق داۋلار اپتالىعى ءوتتى
استانا. قازاقپارات - اتالعان شارا دۇنيەجۇزىندەگى زاڭگەرلەر مەن كومپانيا وكىلدەرىنىڭ باسىن قوستى، دەپ حابارلايدى 24kz.

«استانا» حالىقارالىق قارجى ورتالىعىنىڭ سوتى جانە حالىقارالىق تورەلىك ورتالىعى سالا ۇزدىگى رەتىندە اپتالىققا قاتىستى.
حالىقارالىق داۋلار اپتالىعى بيىل 100-دەن استام يۋريسديكسيانىڭ باسىن بىرىكتىردى. ماڭىزدى ءىس-شاراعا قاتىسۋ ءۇشىن لوندونعا الەمنىڭ تۇكپىر-تۇكپىرىنەن 7000-نان استام زاڭ ساراپشىسى كەلدى. سالا ماماندارى 150-دەي شاراعا قاتىسىپ، كۇرمەۋلى ماسەلەلەر بويىنشا پىكىر تالاستىردى، ارىپتەستىكتەر ورناتىپ، تاجىريبە الماستى.
ارتەم دۋدكو، لوندونداعى حالىقارالىق داۋلار اپتالىعىنىڭ ۇيىمداستىرۋشىسى:
- بۇگىنگى وتە ماڭىزدى شاراعا لاتىن امەريكاسى، ازيا، افريكا جانە البەتتە قازاقستاننان كەلگەن زاڭگەرلەر قاتىسىپ جاتىر. يلەگەنىمىز ءبىر تەرىنىڭ پۇشپاعى - ءبىز حالىقارالىق داۋلاردى شەشەمىز، سوت تورەلىگىنە قول جەتكىزۋدى قامتاماسىز ەتەمىز. بۇگىنگى پلاتفورما پىكىر الماسىپ، وي بولىسۋگە ارنالىپ وتىر.
حاۆار كۋرەشي، Mcnair International وكىلى:
- قازاقستان بيلىگى «استانا» حالىقارالىق قارجى ورتالىعىن دامىتۋدا زور جەتىستىكتەرگە جەتتى. ءبىز ورتالىق سوتىنىڭ باسشىسى لورد مەلدون بەرنەتتپەن پىكىر الماسقانىمىزعا قۋانىشتىمىز. ويتكەنى ول كىسىدەن ۇيرەنەرىمىز كوپ.
ورتالىقتىڭ ت م د مەملەكەتتەرىنە عانا ەمەس، حالىقارالىق دەڭگەيدەگى بيزنەس قاۋىمداستىققا دا ءبىراز كومەگى ءتيىپ جاتىر. «استانا» حالىقارالىق قارجى ورتالىعىنىڭ سوتى مەن حالىقارالىق تورەلىك ورتالىعى 6 جىلدان استام ۋاقىتتان بەرى جۇمىس ىستەپ كەلەدى. ولار وسى ارالىقتا 2600-دەن استام داۋلى ءىس قاراپ، 28 ەلدىڭ ينۆەستورىنىڭ سۇرانىسىن %100 قاناعاتتاندىردى. كومپانيالاردىڭ باسىم كوپشىلىگى ەۋرازيا مەملەكەتتەرىنەن. ارالارىندا قىتاي، بىرىككەن اراب امىرلىكتەرى، ءۇندىستان سياقتى ەلىمىزدىڭ باستى ساۋدا سەرىكتەستەرى دە بار.
كريستوفەر كەمپبەلل-حولت، ا ح ق و سوتىنىڭ تىركەۋشىسى جانە اپپارات باسشىسى:
- قازاقستان مەن ەۋرازيا ەلدەرىنىڭ يگىلىگى ءۇشىن جاساپ جاتقان جۇمىسىمىز تۋرالى ايتىپ بەردىك. حالىقارالىق دەڭگەيدە جوعارى ستاندارتتارعا جاۋاپ بەرەتىن ۇيىمعا اينالىپ جاتقانىمىزدى قۋانا حابارلادىق. وسىنى تۇسىنگەن ينۆەستورلار قازاقستانمەن جۇمىس ىستەۋگە قۇلشىنىس تانىتۋدا. ولار تاۋەلسىز سوت تورەلىگىنە سەنىم ارتادى.
گۇلنۇر نۇركەيەۆا، حالىقارالىق «گراتا» زاڭ فيرماسىنىڭ باسقارۋشى سەرىكتەسى:
- قارجى ورتالىعىنىڭ سوتىندا 3 ءىس بويىنشا تىڭدالىمعا قاتىستىم. ونىڭ ىشىندە قازاقستانداعى مينيسترلىكتەرگە دە قارسى ىستەر بولدى. شەتەلدىك ينۆەستورلاردىڭ مۇددەلەرىن ءساتتى قورعاپ شىقتىق. ەگەر بۇرىن كومپانيالار لوندون، پاريج، سينگاپۋرداعى اربيتراجداردا ادىلدىك ىزدەسە، قازىر استاناداعى قارجى ورتالىعىنىڭ سوتىندا وتىرىپ-اق مۇددەلەرىن قورعاي الادى.
داۋلاردى شەشۋ اپتالىعىنىڭ بيىلعى تاقىرىبى: «جاھاندىق سىن-قاتەرلەر مەن مۇمكىندىكتەر ءۇشىن بىرىگۋ». بۇل بىلتىرعى «وزگەرمەلى الەمگە بەيىمدەلۋ» تاقىرىبىنىڭ جالعاسى ىسپەتتەس. قاتىسۋشىلار وتكەن جىلى داۋلاردى شەشۋ الەمىندە قانداي جەتىستىكتەرگە قول جەتكىزگەنىن، سونداي-اق كەلەسى جىلدان نە كۇتەتىنىن ورتاعا سالدى. اۆتورى: عالىمجان قارامان ۇلى