ۇلتتىق ونەر مەن كلاسسيكا: استانادا قۇرمانعازى وركەسترىنىڭ كونسەرتى وتەدى
استانا. KAZINFORM - استانادا قۇرمانعازى اتىنداعى قازاق ۇلتتىق حالىق اسپاپتارى وركەسترىنىڭ گاسترولدىك كونسەرتى وتەدى. بۇل تۋرالى بۇگىن وركەستر ديرەكتورى مەدەت قۋانىشيەۆ مالىمدەدى.
استاناداعى كونسەرت مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلىپ وتىر. كونسەرتتىڭ العاشقى بولىمىندە قۇرمانعازى، داۋلەتكەرەي، تاتتىمبەت جانە بيىل 100 جىلدىعى اتالىپ ءوتىپ جاتقان نۇرعيسا تىلەنديەۆتىڭ شىعارمالارى ورىندالادى. سونداي-اق، ەكىنشى دۇنيەجۇزىلىك سوعىس باتىرى ءاليا مولداعۇلوۆاعا ارنالعان تۋىندىلار دا شىرقالماق.
كونسەرتتىڭ ەكىنشى بولىمىندە زاماناۋي شىعارمالار مەن الەمدىك كلاسسيكا نەگىزىندەگى تۋىندىلار ورىندالادى.
وركەستردىڭ باس ديريجەرى، «قۇرمەت» وردەنىنىڭ يەگەرى ابىلاي تىلەپبەرگەننىڭ ايتۋىنشا، بۇل كونسەرت - تەك گاسترولدىك ساپار عانا ەمەس، ۇلتتىق ونەر مەن قازىرگى زامان اراسىنداعى رۋحاني كوپىر بولماق.
بيىل وركەستر ۇجىمى بىرنەشە اۋقىمدى جوبانى جۇزەگە اسىرادى. اتاپ ايتقاندا، 17- ماۋسىمدا شىمكەنت قالاسىندا وتەتىن «وركەسترلەر شەرۋى» جوباسى اياسىندا ۇلكەن مادەني ءىس-شاراعا قاتىسپاق. بۇل - وركەستر ءۇشىن ماڭىزدى جوبالاردىڭ ءبىرى سانالادى.
- كەشەگى كوكشەتاۋداعى كونسەرتىمىز - نەگىزگى ميسسيامىزدىڭ، ياعني حالقىمىزدىڭ عاسىرلار بويى قالىپتاسقان ۇلتتىق مۋزىكاسىن، كۇيلەرىن، حالىق اندەرىن جانە اسپاپتىق تۋىندىلارىن كاسىبي دەڭگەيدە ناسيحاتتاۋدىڭ جارقىن كورىنىسى بولدى. قالا تۇرعىندارى ەرەكشە ىقىلاسپەن قارسى الدى.
سوڭعى بەس جىلدا ءبىز كوپتەگەن ءىرى جوبانى ىسكە اسىردىق. الماتى قالاسىندا قاتارىنان بەس جىل بويى كونسەرتتەرىمىز ءوتىپ كەلەدى. بيىل بۇل ءداستۇر شىمكەنت قالاسىنداعى «قىزعالداقتار» سارايىندا جالعاسادى، - دەدى وركەستر ديرەكتورى مەدەت قۋانىشيەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ۇجىم قۇرامىندا ەلىمىزدىڭ ەڭ ۇزدىك مۋزىكانتتارى ەڭبەك ەتەدى. وركەستر تەك ءداستۇرلى ەمەس، قازىرگى زامان تالابىنا ساي مۋزىكالىق فورماتتاردى دا مەڭگەرىپ كەلەدى. بۇل - ۇلتتىق ونەردىڭ جاڭارىپ، دامىپ جاتقاندىعىنىڭ ناقتى دالەلى.
ايتا كەتسەك، 2024 -جىلى حالقىمىزدىڭ ۇلتتىق كاسىبي مۋزىكا ونەرىنىڭ قاراشاڭىراعى، ۇلت رۋحانياتىنىڭ شىڭى - قازاقتىڭ اسپاپتىق- مۋزىكا مادەنيەتىن الەمگە تانىتىپ جۇرگەن قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ قۇرىلعانىنا 90 جىل تولدى.
