ۇلتتىق قوردان بالاعا اقشا اۋدارۋ قانداي جاعدايدا توقتاتىلادى

قارجى مينيسترلىگىنىڭ بيۋدجەتتىك كرەديتتەۋ، ۇلتتىق قور جانە قارجى سەكتورى ماسەلەلەرى جونىندەگى ءوزارا ءىس- قيمىل دەپارتامەنتىنىڭ ديرەكتورى ايبول ارعىنعازين ۇلتتىق قوردان بالا شوتىنا تولەم اۋدارۋ قانداي جاعدايدا توقتاتىلاتىنىن ءتۇسىندىردى، دەپ حابارلايدى Kazinform.

«ۇلتتىق قور تولەمىن اۋدارۋ بالا قايتىس بولعان جاعدايدا توقتاتىلادى. بۇل جاعدايدا مۇراگەرلىك قۇقىعى كۇشىنە ەنەدى. ونداي بالانىڭ مۇراگەرى كىم بولا الاتىنى ازاماتتىق كودەكستىڭ ايرىقشا بولىگىندە كورسەتىلگەن. ياعني، ءار بالانىڭ مۇراگەرى ناقتى جاعدايى بويىنشا انىقتالادى»، - دەدى ول.
مينيسترلىك وكىلى بالادان مۇرا رەتىندە قالعان ۇلتتىق قور اقشاسىن زاڭدى مۇراگەر ءوز قالاۋىنشا پايدالانادى.
«بالانى جوعالتۋ اتا-انا ءۇشىن وتە اۋىر قايعى ەكەنىن تۇسىنەمىز. سوندىقتان ول اقشانى ناقتى ءبىر ماقساتقا پايدالانۋ كەرەك دەگەن تالاپ قويمايمىز. ياعني، اتا-انا بولسىن، زاڭ اياسىنداعى باسقا دا مۇراگەرلىك قۇقىعىنا يە ادام بولسىن، قايتىس بولعان بالادان قالعان ۇلتتىق قور اقشاسىن ءوز قالاۋىنا قاراي پايدالانا الادى. سونداي- اق، بالا قازاقستان ازاماتتىعىنان ايىرىلعان كەزدە ۇلتتىق قور تولەمىن اۋدارۋ توقتاتىلادى»، - دەدى ايبول ارعىنعازين.
اۆتور
ەسىمجان ناقتىباي