ۇلتتىق قوردان الاتىن ترانسفەرت 2 تريلليون تەڭگەدەن كوپ بولۋى مۇمكىن
استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ ۇكىمەت وتىرىسىندا سالىق رەفورماسى بيۋدجەت كىرىسىنە وڭ اسەر ەتپەسە، ۇلتتىق قوردىڭ قاراجاتى ورتايا بەرەتىنىن ايتتى.
«ۇلتتىق قور پارامەترلەرىنىڭ بولجامى بيىل جانە كەلەسى جىلداعى ترانسفەرتتەردى تارتۋ تۋرالى شەشىمدەرگە نەگىزدەلگەن. ناتيجەسىندە ۇلتتىق قوردىڭ تازا ۆاليۋتالىق اكتيۆتەرى 2025 -جىلى 53,8 ميلليارد دوللار دەڭگەيىندە باعالانادى. ال 2027 -جىلى 74 ميلليارد دوللارعا دەيىن وسەدى. بۇل سوماعا وبليگاتسيالىق نەسيەلەردىڭ، «قازاتومونەركاسىپتىڭ» اكسيالارىن ساتىپ الۋ كىرەدى. 2025 -جىلى 5,4 تريلليون تەڭگە سوماسىندا قاراجات تارتۋ جوسپارلانىپ وتىر. ال كەيىنگى بولجام جاسالعان جىلدارى ترانسفەرتتەر كولەمى تاريحي كولەمنەن ەداۋىر تومەن بولادى. اتاپ ايتقاندا، 2026-2027 -جىلدار ترانسفەرتتەر سوماسى تەك 2 تريلليون تەڭگە بولادى»، - دەدى ول.
تيمۋر سۇلەيمەنوۆ ۇكىمەتتىڭ ۇلتتىق قور اقشاسىنا بايلانىستى جوسپارى وسىنداي بولعانىمەن، ونىڭ ورىندالماي قالۋى مۇمكىن ەكەنىن ايتادى.
«اتالعان جىلداردا نىسانالى ترانسفەرت كوزدەلمەگەن. ءبىز، ارينە، ۇلتتىق قوردان قاراجات تارتۋدى ازايتۋ شارالارىن قولدايمىز. سونىمەن بىرگە، ەگەر، سالىق رەفورماسى اياسىندا رەسپۋبليكالىق بيۋدجەتتىڭ كىرىسىن ەداۋىر ارتتىرۋعا باعىتتالعان ەلەۋلى جانە جۇيەلى شارالار ىسكە اسىرىلماسا، 2026-27 -جىلدارى ۇلتتىق قوردان قوسىمشا قاراجات الۋدى تالاپ ەتەتىن تاۋەكەل بار، جوق ەمەس»، - دەدى ۇلتتىق بانك باسشىسى.
اۆتور
ەسىمجان ناقتىباي
