«ۇلتتىق قور - بالالارعا»: ەرتەڭ ءار بالاعا 129 دوللار اۋدارىلادى
استانا. KAZINFORM - ءبىرىڭعاي جيناقتاۋشى زەينەتاقى قورى «ۇلتتىق قور - بالالارعا» جوباسى اياسىندا بيىل ءار بالاعا نەشە تەڭگە اۋدارىلاتىنىن ەسەپتەپ بولدى. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ءمالىم ەتتى.

- بىلتىر 6 ميلليون 918 مىڭ بالا «ۇلتتىق قور - بالالارعا» جوباسىنىڭ قاتىسۋشىسى بولدى. ونىڭ ءارقايسىسىنا 100 دوللاردان ءسال اساتىن اقشا اۋدارىلدى. بيىلعى ينۆەستيتسيالىق تابىس جامان ەمەس. ورتاشا (كەيىنگى 18 جىلدىڭ ورتاشا تابىستىلىعى - رەد. ) ينۆەستيتسيالىق تابىستىڭ تەڭ جارتىسى بالالاردىڭ شوتىنا اۋدارىلادى. بۇل جاڭالىقتى قۋانا وتىرىپ بولىسەمىن. ويتكەنى، مەنىڭ دە باعدارلاماعا قاتىساتىن بالالارىم بار. بيىل 6 ميلليون 921 مىڭ 35 بالا قاتىسادى. ب ج ز ق ەندى عانا ەسەپتەپ بولدى. ءار بالاعا 129 دوللار 32 سەنتتەن اۋدارىلادى، - دەدى تيمۋر سۇلەيمەنوۆ.
ۇلتتىق بانك مالىمەتى بويىنشا بالالارعا تيەسىلى اقشا ەرتەڭ اۋدارىلا باستايدى.
ەسكە سالساق، بيىل كوپ جىلعا سوزىلعان ستاتي ىسىنە نۇكتە قويىلىپ، قازاقستاننىڭ ۇلتتىق قورىنا 80 ميلليون دوللار قايتارىلعان بولاتىن.
اۆتور
ەسىمجان ناقتىباي