ۇلتتىق قۇندىلىقتار - ەلدىگىمىزدىڭ ايرىقشا نىشانى، بىرەگەيلىگىمىزدىڭ نەگىزى - سەنات ءتوراعاسى

Маулен Ашимбаев
Фото: Фото: пресс-служба Сената

ۇلتتىق بىرەگەيلىكتى ساقتاۋدا تاريحىمىزدى جۇيەلى دارىپتەۋ اسا ماڭىزدى. بۇل تۋرالى سەنات ءتوراعاسى ماۋلەن اشىمبايەۆ ايتتى، دەپ حابارلايدى Kazinform.

«الەمدە قازىر ءارتۇرلى كۇردەلى ۇدەرىستەردىڭ بەلەڭ الىپ تۇرعانىن بىلەسىزدەر. وسى كەزدە ۇلتتىق بىرەگەيلىكتى ساقتاۋ، تاريحي تامىرىمىزدان اجىراماۋ، جالپى ايتقاندا، قازاقى قالىپتان اينىماۋ وزەكتى ماسەلەگە اينالىپ وتىر. بۇل رەتتە، وزدەرىڭىزدەي ازاماتتاردىڭ جاستارعا بەرەتىن ۇلگى- ونەگەسىنىڭ ماڭىزى زور دەپ بىلەمىز. جالپى، ۇلتتىق قۇندىلىقتار - ەلدىگىمىزدىڭ ايرىقشا نىشانى، بىرەگەيلىگىمىزدىڭ نەگىزى. سوندىقتان پرەزيدەنتىمىز قاسىم- جومارت توقايەۆ ۇلتتىق قۇندىلىقتارىمىزدى ساقتاۋعا، دامىتۋعا جانە دارىپتەۋگە ۇلكەن ءمان بەرىپ كەلەدى»، - دەدى م. اشىمبايەۆ سەناتتاعى «ۇلتتىق مۇددە» ديالوگ الاڭى وتىرىسىندا.

وسى ورايدا سەنات ءتوراعاسى مەملەكەت باسشىسى بۇل ماسەلەگە تۇركىستان تورىندە وتكەن ۇلتتىق قۇرىلتايدىڭ ەكىنشى وتىرىسىندا كەڭىنەن توقتالعانىن ەسكە سالدى.

«بۇل رەتتە، ءبىزدىڭ ۇلتتىق قۇندىلىقتارىمىز، ەڭ الدىمەن، تىلىمىزگە، تاريحىمىزعا، مادەنيەتىمىزگە، داستۇرىمىزگە جانە اتا دىنىمىزگە تابان تىرەيتىنى انىق. سوندىقتان ءبىز بىرەگەيلىگىمىزدى ساقتاۋدا وسىلارعا باسىمدىق بەرۋىمىز كەرەك. ءتىل - ۇلتتىق دۇنيەتانىمنىڭ وزەگى. ءتىل بولماسا، ۇلتتىڭ وزىنە ءتان كەلبەتى جويىلادى. قازىرگى كەزدە ەلىمىزدە ءتىلىمىزدى تۇعىرىنا قوندىرۋ باعىتىندا اۋقىمدى جۇمىستار اتقارىلىپ كەلە جاتىر. الداعى ۋاقىتتا ول جۇمىستاردى ودان ءارى جانداندىرۋىمىز قاجەت. سونىمەن قاتار، ۇلتتىق بىرەگەيلىكتى ساقتاۋدا تاريحىمىزدى جۇيەلى دارىپتەۋ دە اسا ماڭىزدى. تاريح - ۇلتتىڭ تاعدىرى. وندا ءبىزدىڭ قيىن دا قيلى جولىمىز ايقىن كورىنىپ جاتىر. ءبىز ودان تاعىلىم الىپ، سول ارقىلى بۇگىنىمىزدى بايىپتاپ، بولاشاعىمىزدى باعدارلايمىز. سول سەبەپتى، تاريحتى ءاردايىم تەرەڭ بىلۋگە، ونى ساقتاۋعا، اسىرەسە، وسكەلەڭ ۇرپاققا كەڭىنەن دارىپتەۋگە مىندەتتىمىز»، - دەدى ماۋلەن اشىمبايەۆ.

بۇل تۇرعىدا ول مەملەكەت باسشىسىنىڭ تاپسىرماسىمەن ءبىر توپ سەناتور اشارشىلىق تاقىرىبى بويىنشا ءبىراز ارحيۆ قۇجاتتارىن جاريالاعانىن اتاپ ءوتتى. قازىرگى دەيتىن جەتى توم جيناق ازىرلەندى. بۇل جۇمىس جالعاسادى.

«مۇنىڭ ءبارى - ۇلتتىق سانانى جاڭعىرتۋدىڭ ءتيىمدى قۇرالدارى. سونداي- اق، مادەنيەتىمىزدى جانە ءداستۇرىمىزدى ساقتاۋعا دا ايرىقشا نازار اۋدارعان ءجون. بۇلار - ءبىزدىڭ ۇلتتىق ەرەكشەلىگىمىزدى ايقىن كورسەتەتىن قۇندىلىقتار»، - دەدى سەنات ءتوراعاسى.

اۆتور

رۋسلان عابباسوۆ

سوڭعى جاڭالىقتار