ۇلتتىق ناقىشتاعى زەرگەرلىك بۇيىمدارعا قىزىعۋشىلار كوپ - قىزىلوردالىق وقۋشى
قىزىلوردا. KAZINFORM - قىزىلوردالىق وقۋشى التىن يسلاموۆا ۇلتتىق ناقىشتاعى قولونەر بۇيىمدارىن دايىندايدى. ءاربىر جاساعان دۇنيەسى كوزدىڭ جاۋىن الارلىقتاي. كورگەن ادام ونىڭ ەڭبەگىنە جوعارى باعا بەرىپ جاتادى.
مەرەيلى مەرەكە قارساڭىندا جاس قولونەر شەبەرىن اڭگىمەگە تارتىپ، ۇلتتىق قۇندىلىقتار جونىندە وي بولىسكەن ەدىك.
- زەرگەرلىكپەن قاي ۋاقىتتان بەرى اينالىسىپ كەلەسىڭ؟ قىزىعۋشىلىق نەدەن باستالدى؟
- ۇلتتىق ناقىشتاعى قولونەر بۇيىمدارىن جاساۋدى مەن 2022 -جىلدىڭ جاز مەزگىلىندە قولعا الدىم. سول جىلدىڭ شىلدە- تامىز ايلارىندا العاشقى دۇنيەلەردى جاساپ شىقتىم.
قازاق حالقى ەرتەدەن ىرىمعا سەنەدى. اسىرەسە، كوز تيۋ، ءتىل وتۋدەن ساقتانىپ جاتادى. اناشىم مەنىڭ تىزەدەن كەلەتىن ۇزىن شاشىما كوز ءتيىپ كەتپەسىن دەگەن نيەتپەن ماعان فۋرنيتۋرالاردى بىرىكتىرىپ، كىشكەنتاي كولەمدى شولپى جاساپ بەرگەن ەدى. ونى جىپپەن بايلاپ وتە قاراپايىم ەتىپ جاساپ شىعاردى. شولپىنى مەكتەپكە تاعىپ باردىم. سول ساتتە مەكتەپ باسشىلىعى، ۇستازدار جانە مەن سىنىپتاستاردان كوپ جىلى ءسوز ەستىگەنىم ەسىمنەن كەتپەيدى.
- قولونەر بۇيىمدارىن جاساۋ ءىسىن سول كەزدەن باستاپ قولعا الدىڭ با؟ بۇل كەزدە قاي جاستا ەدىڭ؟
- ارينە، سول وقيعا ماعان ەرەكشە اسەر ەتتى. دەسە دە، بىردەن اينالىسىپ كەتە قويعان جوقپىن. جازعى دەمالىس كۇندەرىندە ۋاقىتىمدى بوسقا وتكىزبەي، حوببي رەتىندە اينالىساتىن ءىس ىزدەدىم. سودان كەيىن انامنىڭ شولپىسىن ازداپ ارلەپ، ءوزىم ۇناتقان بولشەكتەردى قوسىپ قايتا جاساپ الۋ تۋرالى وي كەلدى. وسىلايشا قولدا بار قۇرالدى، شىنجىردى جانە تيىندى بىرىكتىردىم. سول ارقىلى ويىمدى جۇزەگە اسىردىم. سول ۋاقىتتا مەنىڭ جاسىم 15-تە بولاتىن.
- العاش ءوز قولىڭمەن جاساعان بۇيىمىڭ قانداي؟ قانشا ۋاقىتتا ىستەدىڭىز ونى؟
- العاشقى جاساعان بۇيىمىم شاشىما ارنالعان شولپى ەدى. راس، العاشقىدا ءوزىم قولونەر بۇيىمدارىن قالاي جاساۋ كەرەك ەكەنىن بىلمەيتىن ەدىم. قاجەتتى ۇساق بولىكتەر قولىمدا جوق ەدى. سوعان قاراماستان قىزدىڭ كوركىنە اينالعان، قوس بۇرىمنىڭ كوركىن اشاتىن ۇلتتىق بۇيىمعا دەگەن قىزىعۋشىلىعىم باسىم بولدى. شىن نيەتىڭمەن ىستەگىڭ كەلگەن جۇمىسقا بارلىعى تابىلادى. وعان ۋاقىت تا جەتەدى، كوڭىل ءبولىپ جاساساڭ الىنبايتىن قامال جوق.
العاشقى بۇيىمدارىما قانشا ۋاقىت جۇمساعانىم قازىر ەسىمدە جوق. الايدا قازىر قولىم ۇيرەنىپ، وسى سالانىڭ قىر-سىرىن مەڭگەرىپ كەلەمىن. قازىر وعان كوپ ۋاقىت جۇمساي بەرمەيمىن. تاپسىرىستى ۋاقىتىندا ورىنداۋعا تىرىسامىن.
- زەرگەرلىك بۇيىمدارعا قاجەتتى دۇنيەلەردى قايدان الاسىڭ؟
- شولپى، سىرعا، القا جانە وزگە بۇيىمدارعا قاجەت جابدىقتار قىزىلوردانىڭ وزىنەن تابىلادى. كەيبىر زاتتاردى الماتىدان الدىرامىن. ءاربىر بولشەكتى بىرتىندەپ بىرىكتىرىپ شىعامىن. ولاردى تاستارمەن قوسىپ، شىنجىر جالعاپ جاسايمىن. بۇل بۇيىمنىڭ قيىندىعى مەن كولەمىنە قاراي 1 ساعاتقا دەيىن ۋاقىتتى قاجەت ەتەدى.
- سەن جاساعان قولونەر بۇيىمدارىن كىمدەر الادى؟ ولاردىڭ قاتارىندا سىنىپتاستارىڭ جانە وزگە دە نازىك جاندىلار بار شىعار.
- البەتتە، بارلىق نازىك جاندىلاردىڭ اتا-بابا ونەرىنە دەگەن قىزىعۋشىلىعى ەرەكشە. قازاق ارۋلارى ۇزىن بۇرىم، شولپى- سىرعاسىمەن كەلبەتىنە كورىك قوسادى. تۇسەدى. شولپىمدى كورگەن ۇلكەن ريزاشىلىعىن ءبىلدىرىپ جاتادى. جىلى ءسوز ايتىپ، باتاسىن بەرەدى. دوس قىزىمنىڭ تۋعان كۇنىنە سىيلىق رەتىندە كوزدىڭ جاۋىن الاتىن، تالعامىنا ساي كەلەتىن شولپى تابىستاعان ەدىم. ونىڭ سول ساتتە قۋانعانىم كورىپ، ءوزىم ەرەكشە سەزىمگە بولەنە ءتۇستىم. مەن جاساعان بۇيىمداردى ۇيدەگى قىزدار دا تاعىپ جۇرەدى. ولارعا سىيعا تارتقاندى ۇناتامىن. مەكتەپ قابىرعاسىندا جاساعان جۇمىستارىما كوزى ءتۇسىپ، ساتىپ العان وقۋشىلار بار. مەكتەپتە «بەگىم انا» اتتى ۇلتتىق ونەردى دارىپتەيتىن شاڭىراق بار. كىشى سىنىپتا ءبىلىم الىپ جۇرگەن قىزدار وزدەرىنىڭ ۇلتتىق ناقىشتاعى بۇيىمدارعا قىزىعۋشىلىعى ەرەكشە ەكەنىن ايتىپ جۇرەدى. ايتپاقشى، كەزىندە سايىستا، قىز سىنى بايقاۋىندا، مەرەكەلەردە شاشباۋ، شولپى سياقتى بۇيىمدار تابا الماي قينالاتىن ەدىك.
- ءوزىڭ ءبىلىم الاتىن ءبىلىم وشاعىندا قولونەر بۇيىمدارىن جاساۋ مەن دامىتۋعا قانداي دەڭگەيدە نازار اۋدارىلعان؟
- ءوزىم ءبىلىم الاتىن قىزىلوردا قالاسىنداعى نازاربايەۆ زياتكەرلىك مەكتەبىندە قولونەرگە، ۇلتتىق قۇندىلىقتاردى جاس ۇرپاق بويىنا سىڭىرۋگە بارىنشا قولداۋ كورسەتىلىپ كەلەدى. وعان لايىقتى قولايلى ورتا تۋعىزدى. مەكتەپ قاۋىمداستىعى تۇگەلدەي مەن جاساعان بۇيىمداردى جوعارى باعالايدى. ماعان جىلى لەبىزىن ءبىلدىرىپ جاتادى. شاشىمنىڭ ۇزىندىعىنا راقمەتىن ايتادى. ۇلكەندەر قازاق تاريحىندا شاشتىڭ ۇزىن بولۋى جونىندە قىزىق اڭگىمەلەر ايتادى. مەنىڭشە، وسىنداي قولداۋ ماعان قولايلى ورتا تۋعىزىپ، ۇلتتىق اشەكەي- بۇيىمداردى دامىتۋعا جول اشقان ءتارىزدى.
- قازىر زەرگەرلىك بۇيىممەن حوببي رەتىندە اينالىسىپ ءجۇرسىڭ عوي. بولاشاقتا وسى ونەرگە قاتىستى ارمان-ماقساتىڭ، جوسپارىڭ بار ما؟
- ارينە، قولداۋشىلار مەن قىزىعۋشىلىق تانىتاتىندار سانى ءوسىپ جاتسا، وسىنداي بۇيىمداردى نەگە دامىتپاسقا؟ ءتىپتى وسە كەلە بۇل حوببي ۇلكەن كاسىپكە ۇلاسىپ كەتۋى دە عاجاپ ەمەس. قازاقى ناقىشتاعى ۇلتتىق اشەكەيلەر دەگەن اتپەن الەمدىك نارىققا باسەكەگە قابىلەتتى دۇنيە رەتىندە دارىپتەلىپ جاتسا قانداي عانيبەت. ونى الداعى ۋاقىتتا كورە جاتامىز.
- وزگە قانداي زەرگەرلەردى بىلەسىڭ؟ مۇمكىن زەرگەرلىك بۇيىمدار دۇكەنىن باقىلاپ جۇرگەن شىعارسىڭ؟
- جالپى، بۇل سالا ءوزىنىڭ باستاۋىن ۇزاق ۋاقىت بۇرىن العان جانە اشەكەي-بۇيىم باعىتىندا وسى جۇمىستىڭ قىر-سىرىن مەڭگەرىپ العان مايتالمانداردى باقىلايمىن. ولاردى جوعارى باعالايمىن. ەشقايسىسىن ءبولىپ- جارمايمىن.
- اڭگىمەڭە راقمەت.
اۆتور
ءادىلجان ۇمبەت
