ۇلتتىق بانك جۇمىسىنا ءالى دە سۇراقتار بار - پرەزيدەنت ۆاليۋتا باعامى تۋرالى
استانا. KAZINFORM - حالىقتى ۇلتتىق ۆاليۋتانىڭ قۇبىلمالىلىعى الاڭداتىپ وتىر. بۇل تۋرالى پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ايتتى.

ق ر ۇلتتىق بانكىنىڭ ءتوراعاسى تيمۋر سۇيلەيمەنوۆ ءوز بايانداماسىندا اقشا-كرەديت جانە فيسكالدىق ساياسات اراسىنداعى تەڭگەرىمسىزدىكتى جويۋ باعىتىندا ناقتى شارالار ازىرلەنىپ جاتقانىن ايتتى.
− وتكەن جىلى ۆاليۋتا نارىعىنا دوللاردىڭ جاھاندىق نىعايۋى، گەوساياسي شيەلەنىستىڭ ساقتالۋى، نەگىزگى ەكسپورتتىق پوزيتسيالارعا باعالاردىڭ قۇبىلمالىلىعى اسەر ەتتى. ەل ىشىندە ۆاليۋتاعا سۇرانىس ارتتى. اسىرەسە قاراجاتتىڭ شامادان تىس اعىنى ىقپال ەتتى. قازاقستان قور بيرجاسىندا دوللار بويىنشا ساۋدا- ساتتىق كولەمى %50- عا جۋىق ءوستى. ۆاليۋتانىڭ شەكتەۋلى ۇسىنىسى جاعدايىندا تەڭگە باعامى %15,5- كە تومەندەدى، - دەدى ول.
تەڭگە باعامىنىڭ شامادان تىس اۋىتقۋلارىن ازايتۋ ءۇشىن ۆاليۋتالىق ينتەرۆەنسيالار جۇرگىزىلگەن. ۆاليۋتالىق وپەراتسيالاردىڭ نەگىزدىلىگىن باقىلاۋ ماقساتىندا 12 بانك پەن قارجى ۇيىمدارى تەكسەرىلگەن. ەكىنشى دەڭگەيلى بانكتەردىڭ ۆاليۋتالىق وپەراتسيالار بويىنشا ەسەپتىلىك مەرزىمى قىسقارتىلعان.
− قابىلدانعان ءىس-شارالار ناتيجەسىندە ۆاليۋتاعا شەكتەن تىس جانە اجيتواجدى سۇرانىس ازايدى. سىرتقى ورتادا جانە ەل ىشىندە كۇتپەگەن وزگەرىستەر بولماسا، تەڭگە باعامى جاڭا فۋندامەنتالدى دەڭگەيىن تاپتى دەپ ەسەپتەيمىز، - دەدى ت. سۇلەيمەنوۆ.
ءوز كەزەگىندە مەملەكەت باسشىسى قاسىم-جومارت توقايەۆ ۇلتتىق بانك جۇمىسىنا قاتىستى ءالى دە سۇراقتاردىڭ بار ەكەنىن ايتتى.
- ەڭ الدىمەن، حالىقتى ۇلتتىق ۆاليۋتانىڭ قۇبىلمالىلىعى الاڭداتىپ وتىر. ساراپشىلار امەريكالىق دوللاردىڭ نىعايۋىنا بايلانىستى تەڭگە باعامىنا قىسىم بولاتىنىن بولجاپ وتىر. ۆاليۋتانىڭ تۇراقتىلىعىن قامتاماسىز ەتۋ جانە جالپى ينفلياتسيانى تەجەۋ - وتە ماڭىزدى جۇمىس. ءتىپتى بۇل قازىر ۇكىمەتپەن تىعىز ىنتىماقتاستىقتا جۇرگىزىلۋى قاجەت نەگىزگى جۇمىس. بۇرىنعى «ءبىز تاۋەلسىزبىز جانە دەربەسپىز» دەگەن ۇستانىمدار قازىرگى جاعدايدا جۇمىس ىستەمەيدى، سەبەبى جاعداي وزگەشە، - دەدى قاسىم-جومارت توقايەۆ.
بۇعان دەيىن قاسىم-جومارت توقايەۆ ۇكىمەتتىڭ سالىق-بيۋدجەت جۇيەسىن رەفورمالاۋ تۋرالى ۇسىنىسىن ماقۇلداپ، ءبىراق حالىققا ءتۇسىندىرۋ جۇمىستارىن جۇرگىزۋ كەرەگىن باسا ايتقان ەدى.
اۆتور
ايجان سەرىكجان قىزى