ۇلتتىق پاركتە 305 باس ايۋ بار: جوڭعار الاتاۋىندا جابايى جانۋارلار كوبەيدى
استانا. قازاقپارات - «جوڭعار الاتاۋى» مەملەكەتتىك ۇلتتىق تابيعي پاركىنىڭ قۇرىلعانىنا بيىل 15 جىل تولدى، دەپ حابارلايدى 24KZ.
جەتىسۋ الاتاۋىنداعى 356 مىڭ گەكتاردان اساتىن اۋماق ەرەكشە قورعاۋعا الىنعالى جابايى جانۋارلاردىڭ سانى ارتقان. ارقار، بۇعى، تاۋەشكىلەردى ايتپاعاندا تابيعاتتا سيرەك كەزدەسەتىن بارىستار مەن قوڭىر ايۋلار كوبەيىپ، بەينەكامەراعا ءجيى ىلىگەتىن بولدى. المانىڭ ءتۇپ اتاسى سانالاتىن سيۆەرس اعاشى مەن ورمان قورى دا مولايىپ كەلەدى. سەبەبى تابيعات ساقشىلارى كوشەت ەگۋ جۇمىستارىن تۇراقتى تۇردە جۇرگىزەدى.
«جوڭعار الاتاۋى» ۇلتتىق پاركىنىڭ قىزمەتكەرلەرى 15 جىلدا 1,5 ميلليون سيۆەرس الما اعاشىن ەككەن. ورمان قورىن مولايتۋ ءۇشىن ولار جىل بويى ەڭبەك ەتەدى. مىسالى، قازىر 14 ءتۇرلى تۇقىمنان ءوسىپ شىققان وسكىندەردىڭ ءتۇبىن قوپسىتىپ، كەلەسى جىلدىڭ كوشەتىن دايىنداپ جاتىر.
تيمۋر اۋباكىروۆ، «جوڭعار الاتاۋى» م ۇ ت پ قىزمەتكەرى:
- جىل سايىن ءبىز 25-30 مىڭ دانا سيۆەرس الما اعاشىنىڭ كوشەتىن ءوسىرىپ، تاۋعا ەگەمىز. ورتاشا ەسەپپەن العاندا ولاردىڭ %85- ءى ءوسىپ شىعادى. سول ارقىلى ورمان قورىنىڭ اۋقىمىن ۇلعايتىپ كەلەمىز. ۇلتتىق پارك اۋماعىندا وسىمدىكتىڭ 2 مىڭنان اسا ءتۇرى وسەدى. سۇتقورەكتىلەردىڭ 50، قۇستاردىڭ 170 ءتۇرى مەكەندەيدى.
قورىقشىلار جابايى جانۋارلاردى قارۋ اسىنعان قاسكويلەردەن، ال جاسىل جەلەكتى ورتتەن قورعايدى.
پارك قىزمەتكەرلەرى تابيعاتتا سيرەك كەزدەسەتىن اڭ- قۇستار مەن جابايى جانۋارلاردى ەسەپكە الۋ ءۇشىن «اقىلدى» تەحنولوگيالاردى قولدانادى. فوتوتۇزاقتار بيىك جارتاستارعا، باستاۋ- بۇلاقتاردىڭ جانىنا ورناتىلىپ، بەينەجازبالار مالىمەتتەر قورىنا ەنگىزىلەدى. ۇزاق جىلعى تىركەۋ، قورعاۋ جۇمىستارى بۇگىندە ءوز ناتيجەسىن بەرگەن.
جاناربەك مولداحان، «جوڭعار الاتاۋى» م ۇ ت پ ءبولىم جەتەكشىسى:
- پارك قۇرىلعان جىلى پارك اۋماعىندا بارىستىڭ سانى ساناۋلى عانا بولسا، 2024 -جىلعى جانە 2025 -جىلعى كوكتەمدەگى ساناق بويىنشا بارىستىڭ سانى 30-عا جەتىپ وتىر. سونىمەن قاتار پارك قۇرىلعان جىلى 80 باس تيان-شان ايۋى تىركەلگەن بولسا، 2024 -جىلى 305 باسقا ارتىپ وتىر.
كولەمى جاعىنان ەلدە ءۇشىنشى ورىن الاتىن پاركتە 200-دەن اسا ادام جۇمىس ىستەيدى. ولاردىڭ كوپ جىلعى ەڭبەگى مەن قىراعىلىعىنىڭ ناتيجەسىندە جان-جانۋارلار كوبەيىپ، كورىكتىگى كوز تارتاتىن تۇمسا تابيعاتىمىز ساقتالىپ كەلەدى.
24.kz
