ۇلەسكەرلىك قۇرىلىس: 51 پروبلەمالى نىسان بار

استانا. KAZINFORM – ق ر ونەركاسىپ جانە قۇرىلىس مينيسترلىگى ەلىمىزدە ۇلەستىك قۇرىلىس بويىنشا پروبلەمالى نىساندار قاي قالالاردا كوپ تىركەلگەنىن ءمالىم ەتتى.

«قازىر ۇلەستىك قاتىسۋى بار 11 وڭىردە 51 پروبلەمالى وبەكت بار. بۇل تۇرعىدا استانا قالاسىندا – 9، الماتى قالاسىندا – 4، قاراعاندى وبلىسىندا – 3، اقتوبە وبلىسىندا – 11، اقمولا وبلىسىندا – 4، اتىراۋ وبلىسىندا – 6، ماڭعىستاۋ وبلىسىندا – 6، سولتۇستىك قازاقستان وبلىسىندا – 1، شىعىس قازاقستان وبلىسىندا – 3، پاۆلودار وبلىسىندا – 1، سونداي- اق الماتى وبلىسىندا 3 نىسان تىركەلگەن»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ۇلەستىك قۇرىلىستا جاڭا پروبلەمالى نىساندار جانە زاڭنامانى اينالىپ ءوتۋ ءۇشىن جاسالاتىن شارتتاردىڭ تۋىنداۋىنا جول بەرمەۋ ماقساتىندا ونەركاسىپ جانە قۇرىلىس مينيسترلىگى مەملەكەتتىك رەتتەۋدى كۇشەيتۋ جونىندە مىناداي تۇزەتۋلەر ازىرلەدى:

- الدىن الا شارتتار جاساسۋعا تىيىم سالۋ؛

- ۇلەسكەرلەردىڭ اقشاسىن زاڭسىز تارتقانى ءۇشىن قۇرىلىستى ودان ءارى توقتاتا تۇرىپ، ايىپپۇل سانكسيالارىن (300-دەن 2000 اەك- كە دەيىن) ۇلعايتۋ؛

- ۇلەسكەرلەردىڭ اقشاسىن تارتۋعا رۇقساتى جوق جارناماعا تىيىم سالۋ؛

- «تۇرعىن ءۇي قۇرىلىسىنا ۇلەستىك قاتىسۋ تۋرالى» ق ر زاڭىن رەتتەۋ سالاسىندا «از قاباتتى قۇرىلىس» ۇعىمىن ەنگىزۋ؛

- ۇلەسكەرلەردى قولداۋ ورتالىعىنىڭ جۇمىس ىستەۋىن قامتاماسىز ەتۋ.

«اتالعان تۇزەتۋلەر پاكەتى تۇرعىن ءۇي قۇرىلىسىنداعى ۇلەستىك قۇرىلىستىڭ جاڭا پروبلەمالى وبەكتىلەرىنىڭ پايدا بولۋ قاۋپىن ازايتۋعا كومەكتەسەدى»، - دەپ اتالىپ وتكەن ۆەدومستۆو اقپاراتىندا.

وسىعان دەيىن ۇلەستىك قۇرىلىستاعى ماسەلەلەردى شەشۋ جانە پروبلەمالىق وبەكتىلەردىڭ تاۋەكەلدەرىن ازايتۋ ماقساتىندا قۇرىلىس سالۋشى مەن ساتىپ الۋشى اراسىندا شارت جاساسۋ پروتسەسىن سيفرلاندىرۋ جۇمىستارى جۇرگىزىلدى.

بىلتىر قازاقستان تۇرعىن ءۇي كومپانياسى ەلدەگى ۇلەستىك باسپانالاردىڭ كولەڭكەلى نارىعىنا زەرتتەۋ جۇرگىزىپ، ۇلەستىك تۇرعىن ءۇي كەشەندەرىنىڭ شامامەن %68- ى زاڭسىز سالىناتىنىن انىقتاعانى حابارلاندى.

اۆتور

رۋسلان عابباسوۆ