لەنين، چاپايەۆ: س ق و- دا 350-گە جۋىق اۋىل-كوشە اتاۋى اۋىستىرۋدى قاجەت ەتەدى
پەتروپاۆل. KAZINFORM - سولتۇستىك قازاقستان وبلىسىندا يدەولوگيالىق تۇرعىدا ەسكىرگەن 350-گە جۋىق اۋىل-كوشە اتاۋى اۋىستىرۋدى قاجەت ەتەدى.

س ق و مادەنيەت، تىلدەردى دامىتۋ جانە ارحيۆ ءىسى باسقارماسى وتكەن جىلدى قورىتىندىلاپ، 2025 -جىلعا جوسپاردى بەكىتتى.
ۆەدومستۆو باسشىسى سانات اۋباكىروۆتىڭ ايتۋىنشا، وبلىستا اتاۋى اۋىستىرىلۋى ءتيىس 33 ەلدى مەكەن، 14 اۋىلدىق وكرۋگ جانە 300 كوشە بار. ەسكىرگەن اتاۋلاردان قۇتىلۋ ءۇشىن 2025 -جىلعا ارنالعان جول كارتاسى ازىرلەنگەن.
- بيىل 4 اۋىلدىق وكرۋگتىڭ، 4 ەلدى مەكەننىڭ جانە 128 كوشەنىڭ اتاۋىن وزگەرتۋ ۇسىنىلدى. سونداي-اق «بىرلىك» شاعىن اۋدانىندا – 28، «ورمان» شاعىن اۋدانىندا 7 جاڭا كوشەگە رەسپۋبليكالىق ونوماستيكالىق كوميسسيا بەكىتكەن «ءداستۇرلى اتاۋلار»، «جەر-سۋ اتاۋلارى» تىزىمىنەن الىندى، - دەيدى سانات اۋباكىروۆ.
«تاريحي تۇلعالار» رەسپۋبليكالىق تىزىلىمىندە 697 ەسىم، سونىڭ ىشىندە 39-ى – س ق و- دان بار. وبلىستىق ونوماستيكالىق كوميسسيا قاراۋىنا ەلدى مەكەن مەن كوشە اتاۋلارىن اۋىستىرۋعا قاتىستى - 9, 4 نىسانعا جانە 4 مەكتەپكە اتاۋ بەرۋ جونىندە ۇسىنىس تۇسكەن.
- پەتروپاۆلداعى № 28 ورتا ءبىلىم بەرەتىن مەكتەپكە قانىش ساتپايەۆتىڭ، جامبىل اۋدانى بلاگوۆەشەنكا ورتا مەكتەبىنە مارات كەنجەگۋزيننىڭ، شال اقىن اۋدانى سەميپولكا ورتا مەكتەبىنە ەكىنشى دۇنيەجۇزىلىك سوعىس ارداگەرى پاۆەل گونچاردىڭ، تيميريازيەۆ اۋدانى اقسۋات ورتا مەكتەبىنە نۇرجان قالياسقاروۆتىڭ ەسىمىن بەرۋ جونىندە ۇسىنىس بار. جەڭىستىڭ 80 جىلدىعىنا وراي مادەنيەت جانە اقپارات مينيسترلىگىنەن سوعىس باتىرلارىنىڭ ەسىمدەرىن كوشە جانە ءبىلىم وردالارىنا بەرۋ تۋرالى تاپسىرما ءتۇستى. اۋداندارعا ءتيىستى حات جىبەرىلدى، ۇسىنىس ايدىڭ ورتاسىنا دەيىن ءتۇسۋى كەرەك، - دەيدى باسقارما باسشىسى.
بۇعان دەيىن س ق و بيىل 3144 قونىس اۋدارۋشىنى قابىلدايتىنىن جازعان ەدىك.
اۆتور
اقەركە داۋرەنبەك قىزى