گۇلميرا ساتىبالدىنىڭ ءىسى: جابىرلەنۋشى ايىپتالۋشىمەن بىرلەسكەن جوبالارى تۋرالى ايتتى
الماتى. KAZINFORM - الماتىدا گۇلميرا ساتىبالدىعا قاتىستى سوت پروتسەسى جالعاسىپ جاتىر. جابىرلەنۋشى قاسىم ءجۇنىسوۆ ايىپتالۋشىنىڭ كورسەتكەن كومەگى تۋرالى ايتتى.
ايتۋىنشا، گۇلميرا ساتىبالدى مەن اعاسىنىڭ كومپانياسى مەملەكەتتىك نىساندار سالعان. قاسىم ءجۇنىسوۆ 2011 -جىلى اعاسى اباي ءجۇنىسوۆتىڭ شاقىرۋىمەن Baur Kazakhstan كومپانياسىنا جۇمىسقا ورنالاسقان.
«اباي ماعان ءوز قاراجاتىنا سەرىكتەستىك قۇرعانىن، ونىڭ ۇلەسكەرى ءۇش ادام بولاتىنىن ايتتى. سونداي-اق ول ماعان گۇلميرا ساتىبالدىنىڭ بىزگە اكىمشىلىك رەسۋرسپەن كومەكتەسەتىنىن جەتكىزدى. ءبىز وعان سەندىك، سەبەبى ول قايرات ساتىبالدىمەن جانە ق ر تۇڭعىش پرەزيدەنتىنىڭ وتباسىمەن جاقسى قارىم-قاتىناستا بولدى. بىرگە جۇمىس ىستەگەندە بىزگە جاقسى كومەكتەستى. ءبىزدىڭ ءبىرىنشى جوبامىز 1200 ورىندىق مەكتەپ بولدى. ءبىز جوبانى ەكى جىلدا ءساتتى اياقتادىق. ەكىنشى جوبامىز - ەكى ن ز م مەكتەبى (نازاربايەۆ زياتكەرلىك مەكتەپتەرى). ونىڭ قارجىسى بىرىنشىسىندە - 4,5 ميلليارد تەڭگە، ەكىنشى مەكتەپ بويىنشا - 3,7 ميلليارد تەڭگە. سونداي-اق مۇز ايدىنى - 24 ميلليارد تەڭگە. بۇل جوبالاردا قيىندىقتار بولعان جوق. ءبىز ونى ۋاقىتىندا اياقتادىق. مۇز ايدىنىنا قاتىستى نازاربايەۆتىڭ ءوزى كەلىپ، قابىلدادى. سونداي-اق، 2015 -جىلى قالقامانداعى ن ز م- ءنىڭ اشىلۋىنا باۋىرجان بايبەك (الماتى قالاسىنىڭ ەكس- اكىمى) كەلگەن. ەكەۋمىزدىڭ سۋرەتتەرىمىز بار»، - دەدى ول.
جابىرلەنۋشى قاسىم ءجۇنىسوۆتىڭ ادۆوكاتى ولجاس كاربوزين قىلمىستىق ءىس ماتەريالدارىنا جوعارىدا اتالعان نىسانداردى اشۋ كەزىندە تۇسىرىلگەن فوتولاردى ەنگىزۋدى سۇرادى.
ادۆوكات راشيد تەڭىزبايەۆ الماتىنىڭ بۇرىنعى اكىمى باۋىرجان بايبەك پەن ق ر تۇڭعىش پرەزيدەنت نۇرسۇلتان نازاربايەۆپەن بىرگە تۇسىرىلگەن سۋرەتتەردە اعايىندى جۇنىسوۆتەر، گۇلميرا ساتىبالدى، باتىربەكوۆ، قابەنوۆتار دا بار ەكەنىن ءتۇسىندىردى.
ونىڭ ايتۋىنشا، بۇل فوتوسۋرەتتەر جوبالار بويىنشا زاڭ بۇزۋشىلىقتار مەن قۇقىقتىق داۋلاردىڭ جوقتىعىن راستايدى.
«زاڭ بۇزۋشىلىقتار، سوت داۋلارى، قارىزدار، كەلەڭسىزدىكتەر بولسا، پرەزيدەنت كەلىپ قابىلداماس ەدى»، - دەيدى ادۆوكات.
جابىرلەنۋشى بۇل فوتوسۋرەتتەرمەن جوبالاردىڭ ۋاقىتىندا اياقتالعانىن دالەلدەگىلەرى كەلەتىنىن ايتتى. قورعاۋشى تاراپ تا ءوتىنىشتى قاناعاتتاندىرۋدى سۇرادى، سۋديا ونى قاناعاتتاندىردى.
بۇعان دەيىن جابىرلەنۋشى، ولاردى شىندىق دەتەكتورىمەن تەرگەۋ جۇرگىزگەنىن جەتكىزگەن ەدى.
الدىنعى سوت وتىرىسىندا كاسىپكەر اباي ءجۇنىسوۆتىڭ اعاسى التاي ءجۇنىسوۆتىڭ سويلەگەن بولاتىن.
ەسكە سالايىق، الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدىعا قاتىستى سوت وتىرىسى ءوتىپ جاتىر. ونىمەن بىرگە ونىڭ كومەكشىسى ءارى جۇرگىزۋشىسى ءمادي باتىرشايەۆ تا وتىر.
اۆتور
الما مۇقانوۆا
