گۇلميرا ساتىبالدى ءىسى: جابىرلەنۋشىنىڭ باۋىرى بارلىق مۇلكىن قالاي بەرگەنىن ايتتى
الماتى. KAZINFORM - الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدىعا قاتىستى سوت وتىرىسى جالعاسىپ جاتىر. وعان كاسىپكەردى زاڭسىز تۇرمەگە قاماپ، اسا ءىرى كولەمدە اقشا بوپسالادى دەگەن ايىپ تاعىلدى.

سوت وتىرىسىندا تاعى ءبىر جابىرلەنۋشى، كاسىپكەر اباي ءجۇنىسوۆتىڭ اعاسى التاي ءجۇنىسوۆ ءسوز الدى.
التاي ءجۇنىسوۆ 2019 -جىلى 14 -اقپاندا ءىنىسىن گۇلميرا ساتىبالدى مەن ونىڭ كومەكشىلەرى اناسىنىڭ ۇيىنەن كۇشتەپ الىپ كەتكەنىن ەستىگەن. سونداي-اق ول بىرنەشە كۇننەن كەيىن اباي ءجۇنىسوۆتىڭ زاڭسىز ۇستالعانىن جانە كومپانيا قارجىسىن جىمقىردى دەپ ايىپتالعانىن بىلگەنىن اتاپ ءوتتى.

«وسىدان كەيىن Baur Kazakhstan اق- نىڭ زاڭگەرى دىنمۇحامەد ءجۇمادىلدا ماعان تەلەفون سوعىپ، گۇلميرا ساتىبالدى اعامىزدىڭ بوستاندىققا شىققانىن قالاساق، مۇلكىمىزدى كەپىلگە قويۋدى تالاپ ەتىپ وتىرعانىن ايتتى. باۋىرىم ەكەۋمىز اقىلداستىق، ويتكەنى بۇل جەردە مەنىڭ مۇلكىم عانا ەمەس، اعام مەن انام تۋرالى دا ءسوز بولدى. ۇيلەر مەن كولىكتەردىڭ قۇجاتتارى جايىندا اڭگىمە ءوربىدى. ءبىز جاعدايدىڭ ۋشىعاتىنىن بىلمەگەندىكتەن، شارتپەن كەلىسۋ تۋرالى شەشىم قابىلدادىق»، - دەدى ول.
كەيىن التاي ءجۇنىسوۆ كۇيەۋ بالاسىمەن بىرگە كومپانيا كەڭسەسىندە گۇلميرا ساتىبالدىمەن كەزدەسىپ، ءمان- جايدى بىلۋگە تىرىستى. ءبىراق، ونىڭ ايتۋىنشا، ول ولاردى تىڭداماي، اباي ءجۇنىسوۆتى اقشا ۇرلادى دەپ ايىپتاۋدى جالعاستىرىپ، بارلىق مۇلىكتى قايتا جازۋدى تالاپ ەتكەن.
«جاعداي سونشالىقتى ۋشىعادى دەپ ويلامادىق. ءبىز ونىمەن 20 جىلدان استام ۋاقىت ارالاسقاندىقتان، ول ۋاقىت وتە ويىنان باس تارتادى دەپ ويلادىق. ويتكەنى، ارامىزدا دوستىق جانە تۋىستىق قارىم-قاتىناس بولدى»، - دەپ قوستى ول.
بىرنەشە كۇننەن كەيىن التاي جۇنىسوۆكە بەلگىلى ءبىر كازيميروۆ (لومبارد يەسى - اۆتوردىڭ ەسكەرتپەسى) تەلەفون سوعىپ، الماتىداعى جاروكوۆ كوشەسىندە ورنالاسقان نوتاريۋسقا كەلۋىن سۇرايدى.
«قالقامان ىقشاماۋدانىنداعى ءۇيىم بالامنىڭ اتىنا تىركەلگەندىكتەن، وتباسىم -ايەلىم مەن ۇلىممەن كەلدىم. بۇعان دەيىن Baur Kazakhstan زاڭگەرى مۇنى اعامىزدىڭ بوستاندىعى ءۇشىن جاساۋىمىز كەرەك ەكەنىن جانە ءبارى شەشىلگەنىن ايتقان بولاتىن. ءبىز نوتاريۋسقا كەلگەندە ءبارىن دايىنداپ قويىپتى. بۇرىن مەنىڭ ءۇيىم 100 ميلليون تەڭگەگە باعالانعان، ءبىراق نەسيەلىك كەلىسىم- شارت 50 ميلليونعا جاسالعان. بىزگە قول قويۋ عانا قالدى. سودان كازيميروۆ قولما-قول 50 ميلليون تەڭگە اكەلىپ، Baur Kazakhstan پرەزيدەنتى قابەنوۆتى شاقىرىپ، اقشاسىن بەردى. مەن ونى قولىما ۇستامادىم. پروتسەسس تەز ءوتتى. ودان اقشانى العانى تۋرالى قولحات جازىپ بەرۋىن ءوتىندىم. اقشانى گۇلميرا ساتىبالدىعا بەرەتىنىن ايتىپ، قولحات بەردى»، - دەيدى التاي ءجۇنىسوۆ.
پروكۋروردىڭ ءماجبۇرلى مامىلە جاسالعاننان كەيىن قۇقىق قورعاۋ ورگاندارىنا نەگە جۇگىنبەدىڭدەر دەگەن سۇراعىنا التاي ءجۇنىسوۆ بۇل ادامدارمەن تۋىستىق بايلانىس بولعانىندىقتان ارىزدانباعانىن ايتتى.
«مۇنداي جاعداي بولادى دەپ ويلامادىق. گۇلميرا ساتىبالدىعا جاۋلىعىمىز بولعان جوق. ونىڭ ايتقانىنىڭ ءبارىن ورىنداساق، ياعني بار دۇنيە-مۇلكىمىزدى جازىپ بەرسەك، اعامىزدى بوساتىپ، ءبارى تەز بىتەدى دەپ ويلادىق، ءبىراق ءبارى كەرىسىنشە بولدى. ءبىزدى اعامنىڭ ۇيىنە كىرگىزبەدى»، - دەدى ول.
سونداي-اق ول گۇلميرا ساتىبالدىنىڭ قوقان-لوققىلارىنىڭ اۋىر بولعانى سونشا، اعاسى ءوز-وزىنە قول جۇمساعىسى كەلگەن.
ەسكە سالايىق، الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدىعا قاتىستى سوت وتىرىسى ءوتىپ جاتىر. ونىمەن بىرگە ونىڭ كومەكشىسى ءارى جۇرگىزۋشىسى ءمادي باتىرشايەۆ تا وتىر.
اۆتور
الما مۇقانوۆا