مەملەكەتتەر اراسىنداعى سەرىكتەستىكتىڭ الەۋەتى زور ەكەنىنە سەنىمدىمىن - پرەزيدەنت
استانا. KAZINFORM - اۋەجاي زالىندا ەكى ەل باسشىلارى از-كەم اڭگىمەلەستى. مەملەكەت باسشىسى ەكىجاقتى قارىم-قاتىناستى دامىتۋ تۇرعىسىنان ومان سۇلتانىنىڭ ساپارى تاريحي مانگە يە ەكەنىن اتاپ ءوتتى. بۇل تۋرالى اقوردا ءمالىم ەتتى.
- ومان سۇلتاندىعى ەكونوميكاسىن ىلگەرىلەتۋدە زور تابىسقا جەتكەن، حالىقارالىق ارەنادا وتە بەلسەندى ءارى كونسترۋكتيۆتى دانەكەر مەملەكەت رەتىندە بەلگىلى. ەلىڭىزدىڭ ءوز ايماعىندا، ودان تىسقارى جەرلەردە، سونىڭ ىشىندە قازاقستاندا دا بەدەلى بيىك. مەملەكەتتەرىمىز اراسىنداعى سەرىكتەستىكتىڭ الەۋەتى زور ەكەنىنە سەنىمدىمىن. الدىمىزدا ىنتىماقتاستىق اياسىن مەيلىنشە كەڭەيتۋ مىندەتى تۇر، - دەدى پرەزيدەنت.
ومان سۇلتانى حايسام بەن تاريق ءال سايد قوناقجايلىق تانىتقانى ءۇشىن قاسىم-جومارت توقايەۆقا العىس ايتىپ، ەرتەڭگى كەلىسسوزدەردىڭ مازمۇندى ءارى جەمىستى وتەتىنىنە سەنىم ءبىلدىردى.
ساپار اياسىندا جوعارى دەڭگەيدە كەلىسسوزدەر جۇرگىزۋ، ءبىرقاتار ماڭىزدى قۇجاتقا قول قويۋ، سونداي-اق مەملەكەتتەر باسشىلارىنىڭ قازاق-ومان بيزنەس فورۋمىنا قاتىسۋى جوسپارلانعان.
ايتا كەتەيىك، پرەزيدەنت قاسىم-جومارت توقايەۆ استانا اۋەجايىندا ەلىمىزگە مەملەكەتتىك ساپارمەن كەلگەن ومان سۇلتانى حايسام بەن تاريق ءال سايدتى كۇتىپ الدى.
5-6-قازان كۇندەرى پرەزيدەنت قاسىم-جومارت توقايەۆتىڭ شاقىرۋىمەن قازاقستانعا ومان سۇلتانى حايسام بەن تاريق ءال سايد مەملەكەتتىك ساپارمەن كەلە جاتقانىن جازعان ەدىك.
جوعارى دەڭگەيدە وتەتىن كەلىسسوزدەر بارىسىندا تاراپتار ساياسي ديالوگتى نىعايتۋ، سونداي-اق ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىقتى كەڭەيتۋ پەرسپەكتيۆاسىن تالقىلايدى دەپ جوسپارلانعان.
سونىمەن قاتار مەملەكەتتەر باسشىلارى قازاق-ومان بيزنەس فورۋمىنا قاتىسادى.
