مەملەكەت باسشىسى Rhenus Group باسقارما ءتوراعاسىن قابىلدادى
استانا. KAZINFORM - قاسىم-جومارت توقايەۆ پەن توبياس بارتس كولىك-لوگيستيكا سالالارىنداعى ستراتەگيالىق سەرىكتەستىكتى دامىتۋ پەرسپەكتيۆاسىن، سونداي-اق بىرلەسكەن ينفراقۇرىلىمدىق جوبالاردى ىسكە اسىرۋ جايىن تالقىلادى. بۇل تۋرالى اقوردا حابارلادى.
مەملەكەت باسشىسى كومپانيانىڭ قازاقستانداعى كولىك بايلانىسىن نىعايتۋعا ۇزاق جىلدان بەرى ۇلەس قوسىپ كەلە جاتقانىن اتاپ ءوتتى. سونىمەن قاتار ەلىمىز قۇرلىقتىڭ نەگىزگى لوگيستيكالىق حابىنا اينالۋدى ماقسات ەتىپ وتىرعانىن ايتتى.
كەزدەسۋدە ترانسكاسپي حالىقارالىق كولىك باعىتىن دامىتۋعا باسا نازار اۋدارىلدى. قاسىم-جومارت توقايەۆ زاماناۋي ۇلگىدەگى پورتتارى، تەرمينالدارى، تەمىرجولدارى مەن سيفرلىق سەرۆيستەرى بار باسەكەگە قابىلەتتى لوگيستيكالىق باعىتتى بىرلەسە قالىپتاستىرۋعا شاقىردى. سونداي-اق Rhenus Group كومپانيالار توبىنىڭ اقتاۋ پورتىنداعى مۋلتيمودالدى حاب قۇرىلىسىنا قاتىسۋىن قۇپتادى.
توبياس بارتس قازاقستاننىڭ نەگىزگى كولىك-لوگيستيكا تورابى رەتىندە الەۋەتى زور ەكەنىنە توقتالىپ، كومپانيانىڭ بىرلەسكەن جوبالارعا اتسالىسۋعا نيەتتى ەكەنىن جەتكىزدى.
تاراپتار ءوزارا ءتيىمدى ىنتىماقتاستىق باعىتتارىن كەڭەيتۋگە ازىرلىگىن راستادى.
پرەزيدەنت گەرمانيانىڭ ەكونوميكالىق قاۋىمداستىقتارى مەن قارجى ينستيتۋتتارى جەتەكشىلەرىمەن كەزدەسكەن بولاتىن.
