مەملەكەت باسشىسى: قازاقستاندا زاڭ مەن ءتارتىپ ۇستەمدىك قۇرۋى قاجەت
استانا. KAZINFORM - پرەزيدەنت حالىق مۇددەسى جولىنداعى رەفورمالاردى تابىستى جالعاستىرۋ ءۇشىن ەل ىشىندە بەيبىتشىلىك پەن تۇراقتىلىق بولۋى قاجەت ەكەنىن العا تارتتى، دەپ حابارلايدى اقوردانىڭ باسپا ءسوز قىزمەتى.
بۇدان بولەك، قاسىم-جومارت توقايەۆ ەلىمىزدىڭ ەتنوسارالىق جانە ءدىنارالىق كەلىسىم ساياساتىنا جانە «بىرلىگىمىز - ءارالۋاندىقتا» قاعيداتىنا بەيىل ەكەنىن مالىمدەدى.
- حالىق مۇددەسى جولىنداعى رەفورمالاردى تابىستى جالعاستىرۋ ءۇشىن ەل ىشىندە بەيبىتشىلىك پەن تۇراقتىلىق بولۋى قاجەت. قازاقستانعا جاماندىق تىلەپ، ءىس-ارەكەتى ارقىلى زيان كەلتىرۋگە تىرىساتىن كەز كەلگەن ادام «زاڭ جانە ءتارتىپ» قاعيداتىنا سايكەس جاۋاپقا تارتىلۋعا ءتيىس ءارى سولاي بولادى. ەلىمىزدە زاڭ مەن ءتارتىپ ۇستەمدىك قۇرۋى قاجەت. قازاقستان - بەيبىت مەملەكەت. ءبىز بەيبىتشىلىك پەن قاۋىپسىزدىكتى نىعايتۋعا ۇلەس قوسۋ ءۇشىن كورشىلەس مەملەكەتتەرمەن، سونداي-اق وسىعان مۇددەلى الەمدەگى ءىرى نەمەسە شاعىن ەلدەردىڭ بارلىعىمەن ىنتىماقتاستىقتى نىعايتا بەرەمىز، - دەدى مەملەكەت باسشىسى.
قاسىم-جومارت توقايەۆ Qarmet كومپانياسىنىڭ مىقتى وندىرىستىك بازاسى «حالىقتىق قۇرىلىستا» زور ءرول اتقاراتىنىنا سەنىم ءبىلدىردى.
ء- قازىردىڭ وزىندە قازاقستاننىڭ تەمىرى قۇرىلىستا جانە ونەركاسىپتە كەڭىنەن قولدانىلادى. ونى تۇتىنۋ كولەمى ارتا بەرۋگە ءتيىس. كومبينات ءونىمى ساران قالاسىندا جولاۋشىلار اۆتوبۋسىن شىعارۋعا پايدالانىلادى. جاڭا قۇيۋ-يلەمدەۋ كەشەنى بوي كوتەرىپ جاتىر. مۇندا كەلەشەكتە بولاتتىڭ مۇناي، اتوم جانە ماشينا جاساۋ ونەركاسىبىندە سۇرانىسقا يە وتە ساپالى تۇرلەرى شىعارىلادى، - دەدى پرەزيدەنت.
بۇعان دەيىن مەملەكەت باسشىسى Qarmet كونۆەرتەر سەحىنىڭ جۇمىسىمەن تانىسقانىن جازعانبىز.
