مەملەكەت باسشىسى قاۋىپسىزدىك كەڭەسىنىڭ شۇعىل وتىرىسىن وتكىزدى
استانا. KAZINFORM - پرەزيدەنت قاسىم-جومارت توقايەۆتىڭ توراعالىعىمەن قاۋىپسىزدىك كەڭەسىنىڭ كولىك-ترانزيت سالاسىن دامىتۋ ماسەلەسىنە ارنالعان شۇعىل وتىرىسى ءوتتى. بۇل تۋرالى اقوردا حابارلادى.
جيىندا حالىقارالىق كولىك دالىزدەرىن دامىتۋ پەرسپەكتيۆاسى جانە ەلىمىزدىڭ ترانزيت الەۋەتىن نىعايتۋ شارالارى قارالدى.
پرەمەر-ءمينيستردىڭ ورىنباسارى - كولىك ءمينيسترى اسەل جاناسوۆا، قارجى ءمينيسترى ءمادي تاكيەۆ جانە ۇكىمەتتىڭ وزگە دە مۇشەلەرى سالانىڭ قازىرگى احۋالى، جۇزەگە اسىرىلىپ جاتقان جوبالار مەن الداعى دامۋ باعىتتارى تۋرالى بايانداما جاسادى.
قاۋىپسىزدىك كەڭەسىنىڭ ءتوراعاسى الەمدە كولىك-لوگيستيكا بايلانىستارىنىڭ جاڭا جۇيەسى قارقىندى تۇردە قالىپتاسىپ كەلە جاتقانىن اتاپ ءوتتى.
مەملەكەت باسشىسى حالىققا ارناعان جولداۋىندا ەلىمىزدىڭ ترانزيت الەۋەتىن نىعايتۋدىڭ نەگىزگى باعىتتارى ايقىندالعانىنا نازار اۋدارىپ، قازاقستان حالىقارالىق كولىك قۇرىلىمىندا پرواكتيۆتى پوزيتسيا ۇستانۋى كەرەك ەكەنىن ايتتى.
ەلىمىزدىڭ گەوگرافيالىق تۇرعىدان ۇتىمدى ورنالاسۋى ءبىرقاتار ارتىقشىلىق بەرەدى. الايدا مەملەكەتتىڭ باسەكەگە قابىلەتتىلىگى تاسىمالدىڭ جىلدامدىعىنا جانە سەنىمدىلىگىنە، ونىڭ شارتتارى مەن مەرزىمدەرىنىڭ الدىن الا ايقىن بولۋىنا، سونداي-اق تاريفتەردىڭ تيىمدىلىگىنە بايلانىستى.
ەڭ الدىمەن، ترانزيتتىك جۇكتەردى وتكىزۋ مۇمكىندىگىن ارتتىرىپ، وتاندىق اۋە تاسىمالداۋشىلارعا جاعداي جاساۋ جانە تەڭىز كولىگىن دامىتۋ كەرەك.
ايتا كەتەيىك، قاسىم-جومارت توقايەۆ مەملەكەتتىك كومپانيالارداعى جەمقورلىقتى ازايتۋعا 24-قاراشاعا دەيىن ۋاقىت بەردى.
