مەملەكەت باسشىسى بەلگيالىقتار كورولىمەن جانە پاتشايىمىمەن بىرگە ۇلتتىق بالالاردى وڭالتۋ ورتالىعىنا باردى
استانا. KAZINFORM - پرەزيدەنت قاسىم-جومارت توقايەۆ كورول فيليپپ جانە پاتشايىم ماتيلدامەن بىرگە استاناداعى ۇلتتىق بالالاردى وڭالتۋ ورتالىعىن ارالاپ كوردى، دەپ حابارلايدى اقوردانىڭ باسپا ءسوز قىزمەتى.
مارتەبەلى مەيماندار دامۋىندا اۋىتقۋى بار بالالارعا كەشەندى كومەك كورسەتۋ تارتىبىمەن تانىستى.
بەلگيا كورولى مەن پاتشايىمىنا ەرەكشە قاجەتتىلىكتەرى بار بالالاردىڭ كوممۋنيكاتيۆتىك داعدىلارىن، تانىم-تۇيسىگىن جانە ءوز بەتىنشە ارەكەت ەتۋ قابىلەتىن شىڭداۋعا باعىتتالعان مەديتسينالىق، پسيحولوگيالىق-پەداگوگيكالىق وڭالتۋدىڭ جانە الەۋمەتتىك بەيىمدەۋدىڭ زاماناۋي ادىستەرى تۋرالى باياندالدى.
جەكە قالپىنا كەلتىرۋ باعدارلامالارىندا روبوتتاندىرىلعان رەابيليتاتسيا تەحنولوگياسى دا قولدانىلادى.
ورتالىق جۇمىسىندا الەۋمەتتىك ينتەگراتسياعا جانە بالالاردىڭ قوعام تىرشىلىگىنەن تىس قالماي، تولىققاندى ءومىر سۇرۋىنە جاعداي جاساۋعا ايرىقشا ءمان بەرىلەدى.
كورول فيليپپ پەن پاتشايىم ماتيلدا بالالارمەن، ولاردىڭ اتا-انالارىمەن جانە مەديتسينا قىزمەتكەرلەرىمەن اڭگىمەلەسىپ، ينتەراكتيۆتى باعدارلاماعا قاتىستى.
بۇدان كەيىن مەيماندار قۇرمەتتى قوناقتار كىتابىنا ەستەلىك جازبا قالدىردى.
ۇلتتىق بالالاردى وڭالتۋ ورتالىعى پسيحونيەۆرولوگيالىق دەرتكە شالدىققان، سويلەۋىندە، كوگنيتيۆتى دامۋىندا جانە مىنەز-قۇلقىندا بۇزىلىستارى بار، سونىڭ ىشىندە سەرەبرالدى سال اۋرىنا دۋشار بولعان جانە اۋتيستىك سپەكترى بۇزىلعان بالالارعا كەشەندى كومەك ۇسىنادى.
جىل سايىن قازاقستاننىڭ بارلىق ايماعىنان 5 مىڭنان استام پاتسيەنتكە وڭالتۋ قىزمەتتەرى كورسەتىلەدى.
