مەملەكەت باسشىسى باس پروكۋرور بەرىك اسىلوۆتى قابىلدادى

بەرىك اسىلوۆ كريمينوگەندىك احۋالدى باقىلاۋ، سونداي-اق قىلمىستىڭ الدىن الۋ باعىتىندا قابىلدانعان شارالار جونىندە باياندادى.

بيىلعى 9-ايدا قىلمىستىق قۇقىق بۇزۋشىلىقتار سانى 14,6 پايىزعا، سونىڭ ىشىندە قوعامدىق ورىندارداعى قۇقىقبۇزۋشىلىق 22,3 پايىزعا، كوشەدەگى زاڭعا قايشى ارەكەتتەر 20,1 پايىزعا ازايعان.

قۇقىق قورعاۋ ورگاندارىمەن جانە مۇددەلى قۇرىلىمدارمەن بىرلەسىپ، ينتەرنەت-الاياقتىققا، ەسىرتكى قىلمىسىنا جانە باسقا دا قاۋىپتى قىلمىس تۇرلەرىنە قارسى كۇرەس بويىنشا جان-جاقتى شارالار قابىلداندى.

بۇگىنگى تاڭدا جالپى سوماسى 1,3 تريلليون تەڭگە بولاتىن اكتيۆتەر قايتارىلعانى جونىندە مالىمدەدى. وسى قاراجات ەسەبىنەن 466 الەۋمەتتىك ينفراقۇرىلىمنىڭ قۇرىلىسى مەن رەكونسترۋكتسياسى قارجىلاندىرىلدى، ونىڭ 378 ى اياقتالدى.

اتاپ ايتقاندا، التى وبلىستا ءىرى مەديتسينا نىساندارى، استانا قالاسىندا ق. مۇڭايتپاسوۆ اتىنداعى فۋتبول ستاديونى پايدالانۋعا بەرىلدى. سونىمەن قاتار بالقاش، پاۆلودار جانە ارقالىق اۋەجايلارىن جاڭعىرتۋ جۇمىستارى اياقتالدى.

اكتيۆتەردى قايتارۋ، ەكستراديتسيالاۋ جانە قىلمىس جاساعان ادامداردى بەرۋ ماسەلەلەرى بويىنشا حالىقارالىق ىنتىماقتاستىق دامىپ كەلەدى.

باس پروكۋراتۋرا 39 يۋريسديكتسيامەن 92 ەكىجاقتى كەلىسىمگە قول قويدى. قازاقستانعا 50 ادام ەكستراديتسيالاندى، ال شەت مەملەكەتتەرگە 123 ادام بەرىلدى.

مەملەكەت باسشىسىنىڭ 2025 -جىلعى 17-جەلتوقسانداعى جارلىعىن ورىنداۋ ماقساتىندا ينۆەستورلاردى قورعاۋدىڭ جۇيەلى مودەلى جولعا قويىلعانىن ايتتى.

جىل باسىنان بەرى 2886 ينۆەستورعا كومەك كورسەتىلدى. پروكۋرورلار 3,5 مىڭ ينۆەستيتسيالىق جوبانىڭ ىسكە اسۋىن قاداعالاپ وتىر. ۇلتتىق تسيفرلىق ينۆەستيتسيالىق پلاتفورمانى «سيفرلىق قاداعالاۋ» جۇيەسىمەن ينتەگراتسيالاۋ تۇيتكىلدى ماسەلەلەردى ۋاقتىلى انىقتاۋعا مۇمكىندىك بەرەدى.

الەۋمەتتىك-ەكونوميكالىق سالادا 413 مىڭ ازاماتتىڭ كونستيتۋتسيالىق قۇقى قالپىنا كەلتىرىلگەنىن اتاپ ءوتتى. سونىڭ ىشىندە 200 مىڭنان استام جۇمىسكەردىڭ ەڭبەك قۇقىعى قورعالدى. ەڭبەكاقى بويىنشا 2,5 ميلليارد تەڭگە، اليمەنت بويىنشا 7,9 ميلليارد تەڭگە بەرەشەك ءوندىرىلدى.

پروكۋرورلار مەملەكەت قارجىسىن جۇمساۋ كەزىندە سوماسى 535 ميلليارد تەڭگە زاڭ بۇزۋشىلىققا توسقاۋىل قويدى. بيۋدجەتكە 66,4 ميلليارد تەڭگە قايتارىلدى.

كەزدەسۋ بارىسىندا «زاڭ مەن ءتارتىپ» يدەولوگياسىن، اسىرەسە، جاستار اراسىندا ىلگەرىلەتۋ، سونداي-اق قاداعالاۋ قىزمەتىنە سيفرلىق تەحنولوگيالاردى جانە جاساندى ينتەللەكتىنى ەنگىزۋ ماسەلەلەرىنە ايرىقشا نازار اۋدارىلدى.

پرەزيدەنت بارلىق سالادا زاڭدىلىقتى قامتاماسىز ەتۋ، زاڭ ۇستەمدىگى مەن قوعامدىق قاۋىپسىزدىكتى نىعايتۋ، سونىڭ ىشىندە ەلەكتورالدىق كەزەڭدە قۇقىقتىق ءتارتىپتى ساقتاۋ شارالارىن ۇيلەستىرۋ جۇمىستارىن جالعاستىرۋدى تاپسىردى؛

سونداي-اق ادىلەتتى قازاقستاننىڭ كونستيتۋتسيالىق قۇندىلىقتارىن مۇلتىكسىز ساقتاۋ قاجەتتىگى اتاپ ءوتىلدى.