مەملەكەت باسشىسى ازەربايجان پرەزيدەنتى يلحام اليەۆپەن كەزدەسۋ وتكىزدى
استانا. KAZINFORM - قاسىم-جومارت توقايەۆ ازياداعى ءوزارا ءىس-قيمىل جانە سەنىم شارالارى كەڭەسىنىڭ سامميتىنە قاتىسۋعا شاقىرعانى جانە قوناقجايلىق كورسەتكەنى ءۇشىن يلحام اليەۆكە العىس ايتىپ، سامميتتىڭ جوعارى دەڭگەيدە ۇيىمداستىرىلعانىن اتاپ ءوتتى، دەپ حابارلايدى اقوردانىڭ باسپا ءسوز قىزمەتى.
قازاقستان پرەزيدەنتى ازەربايجان كەڭەسكە ءتوراعالىق ەتكەن كەزەڭدە ناقتى باستامالاردى ىلگەرىلەتۋگە جانە ۇيىمنىڭ حالىقارالىق بەدەلىن كۇشەيتۋگە سۇبەلى ۇلەس قوسقانىنا نازار اۋداردى.
كەزدەسۋ بارىسىندا مەملەكەتتەر باسشىلارى وڭىردەگى بىرەگەي جوبا - ترانسكاسپي تالشىقتى-وپتيكالىق بايلانىس جەلىسىن ىسكە قوسۋدىڭ ماڭىزىنا توقتالدى. تەڭىز تابانىمەن جۇرگىزىلگەن جەلى ەكى ەلدىڭ سيفرلىق بايلانىسىن كۇشەيتىپ، ەۋروپا مەن ازيا اراسىندا تاعى ءبىر سيفرلىق ءدالىزدىڭ پايدا بولۋىنا ىقپال ەتەدى. وسىلايشا، تۇتاس ءوڭىر تىڭ مۇمكىندىكتەرگە قول جەتكىزەدى.
پرەزيدەنتتەر ساۋدا-ەكونوميكالىق قارىم-قاتىناستىڭ قارقىنى ارتىپ كەلە جاتقانىن مالىمدەپ، ءوزارا تاۋار اينالىمىن 1 ميلليارد دوللارعا جەتكىزۋگە نيەتتى ەكەنىن راستادى.
بۇدان بولەك، قازاقستاننىڭ ەنەرگيا رەسۋرستارىن ازەربايجان ارقىلى تاسىمالداۋ اۋقىمىن ۇلعايتۋ، سونداي-اق ونەركاسىپ، ەنەرگەتيكا، كولىك، لوگيستيكا جانە اۋىل شارۋاشىلىعى سالالارىندا بىرلەسكەن جوبالاردى جۇزەگە اسىرۋ ماسەلەلەرىن تالقىلادى.
تاراپتار مادەني-گۋمانيتارلىق ىقپالداستىق نىعايىپ، ءبىلىم بەرۋ، تۋريزم سالالارىنداعى ارىپتەستىك كەڭەيە تۇسكەنىن جانە پارلامەنتارالىق ىنتىماقتاستىق جاندانىپ كەلە جاتقانىن جەتكىزدى.
كەزدەسۋ سوڭىندا قاسىم-جومارت توقايەۆ پەن يلحام اليەۆ قازاق-ازەربايجان ستراتەگيالىق سەرىكتەستىگىن ودان ءارى تەرەڭدەتۋگە، سونداي-اق ەكىجاقتى كۇن ءتارتىبىنىڭ بارلىق باعىتى بويىنشا قول جەتكىزىلگەن ۋاعدالاستىقتاردى دايەكتى تۇردە ىسكە اسىرۋعا بەيىل ەكەنىن راستادى.
ايتا كەتەيىك، وسىعان دەيىن قاسىم-جومارت توقايەۆ ا و س ش ك- ءنى بىرەگەي حالىقارالىق فورۋم دەپ اتادى.
