ۇلكەن الماتى اينالما جولىندا تولەم جاساۋ ءتارتىبى وزگەردى

ەنگىزىلگەن وزگەرىستەردىڭ باستى ەرەكشەلىگى - جول ءجۇرۋ اقىسىن ۋاقىتىلى تولەيتىن پايدالانۋشىلار ءۇشىن تولەم مولشەرى بۇرىنعى دەڭگەيدە ساقتالادى.

— تولەمدى ۋاقىتىلى جۇرگىزەتىن پايدالانۋشىلار ءۇشىن جول ءجۇرۋ قۇنى كولىك قۇرالىنىڭ ساناتىنا قاراي 0,07 ا ە ك- تەن (302,75 تەڭگە) 0,22 ا ە ك- كە (951,5 تەڭگە) دەيىنگى مولشەردە ساقتالادى.

سونىمەن قاتار، بۇيرىقپەن نەگىزگى تاريفتەر قايتا قارالدى. ولار كولىك قۇرالىنىڭ ساناتىنا قاراي 0,14 اەك- تەن (605,5 تەڭگە) 0,44 اەك- كە (1903 تەڭگە) دەيىن بەلگىلەنگەن. الايدا بۇل تاريفتەر جول ءجۇرۋ اقىسى تىركەلگەن كۇننەن كەيىن جەتى جۇمىس كۇنى ىشىندە تولەنبەگەن جاعدايدا عانا قولدانىلادى، — دەلىنگەن مينيسترلىك حابارلاماسىندا.

ەنگىزىلگەن وزگەرىستەر تولەم ءتارتىبىن ساقتاۋدى ىنتالاندىرۋعا باعىتتالعان جانە جول ءجۇرۋ اقىسىن ۋاقىتىلى تولەيتىن پايدالانۋشىلارعا اسەر ەتپەيدى.

— جول ءجۇرۋ قۇنىن ەسەپتەۋ ءتارتىبى وزگەرىسسىز قالادى. بۇرىنعىداي تولەم مولشەرى كولىك قۇرالىنىڭ ساناتىنا جانە اقىلى جول ۋچاسكەسىندە ءبىر ساعاتقا دەيىن بولۋىنا قاراي ەسەپتەلەدى. ءجۇرىپ وتكەن قاشىقتىق جول ءجۇرۋ اقىسىنا اسەر ەتپەيدى.

الماتى وبلىسىنىڭ تالعار، قاراساي جانە ىلە اۋداندارىنىڭ تۇرعىندارى ءۇشىن قولدانىستاعى جەڭىلدىكتەر دە ساقتالادى. بۇل ساناتتاعى پايدالانۋشىلار ءۇشىن ايلىق جانە جىلدىق ابونەمەنتتەردىڭ قۇنى وزگەرمەيدى، — دەلىنگەن حابارلامادا.

وزگەرىستەر بۇيرىق العاش رەسمي جاريالانعان كۇننەن كەيىن كۇنتىزبەلىك ون كۇن وتكەن سوڭ، ياعني 2026 -جىلعى 16- تامىزدان باستاپ كۇشىنە ەنەدى.

ايتا كەتەلىك اقىلى اۆتوموبيل جولدارىن كىمدەر تەگىن پايدالانا الاتىنى تۋرالى جازعان ەدىك.