ەلدىڭ سولتۇستىگىن گازداندىرۋ ءۇشىن «سارى ارقا» قۇبىرىنىڭ 2,3-كەزەڭدەرى سالىنادى
استانا. KAZINFORM - ەلىمىزدىڭ سولتۇستىگىن گازداندىرۋ ءۇشىن «سارى ارقا» قۇبىرىنىڭ 2,3-كەزەڭدەرى سالىنباق. بۇل جايىندا پرەمەر-مينيستر ولجاس بەكتەنوۆتىڭ سەنات دەپۋتاتتارىنىڭ ساۋالىنا بەرگەن جاۋابىندا ايتىلعان.
«اقمولا جانە سولتۇستىك قازاقستان وبلىستارىن گازداندىرۋ ءۇشىن «سارىارقا» ماگيسترالدى گاز قۇبىرىنىڭ 2,3-كەزەڭدەرىن (188,5 ميلليارت تەڭگە) سالۋ جوسپارلانىپ وتىر. اتالعان جوبالاردى جۇزەگە اسىرۋ «بەينەۋ-بوزوي-شىمكەنت» ماگيستارلدى گاز قۇبىرىنىڭ قۋاتىن ۇلعايتقاننان كەيىن عانا مۇمكىن بولادى، وسىعان بايلانىستى «سارى ارقا» بارلىق كەزەڭدەرىن جانە «بەينەۋ- بوزوي- شىمكەنت» ەكىنشى جەلىسىن ءبىر ۋاقىتتا سالۋ كوزدەلەدى»، - دەيدى ۇكىمەت باسشىسى جاۋابىندا.
پرەمەر-مينيستر جاۋابىنا قوسىمشا بەرىلگەن انىقتامادا ب ب ش 2-جەلىسىن سالۋ ءۇشىن تەحنيكالىق-ەكونوميكالىق نەگىزدەمە ازىرلەنىپ جاتقانى ايتىلادى.
قۇرىلىستى اياقتاۋدىڭ بولجامدى مەرزىمى - 2026-جىلدىڭ سوڭى.
«ءوز كەزەگىندە سولتۇستىك-شىعىس وڭىرلەردى گازداندىرۋدىڭ مەرزىمدەرى ق ر- نى گازداندىرۋدىڭ 2023-2030جىلدارعا ارنالعان باس سحەماسىندا ونى كەلەسى ناقتىلاۋ كەزىندە ەسكەرىلەتىن بولادى. ۇكىمەت سولتۇستىك وڭىرلەردى گازداندىرۋدىڭ بالامالى نۇسقاسىن قاتار پىسىقتاپ جاتقانىن اتاپ وتكەن ءجون. اتاپ ايتقاندا، الەۋەتتى ينۆەستورلارمەن گاز قۇبىرىنىڭ باعىتتارىن، قۇرىلىس جانە گاز جەتكىزۋ شارتتارىن تالقىلاۋ بويىنشا كەلىسسوز ءجۇرىپ جاتىر»، - دەدى ولجاس بەكتەنوۆ.
اۆتور
مارلان جيەمباي
