ەلدى جاسىل ايماققا اينالدىرۋ مىندەتى تۇر

استانا. قازاقپارات - ناۋرىز - جەر-دۇنيە جاسارىپ، جاڭاراتىن ۋاقىت. ياعني، بابالارىمىز ەرتەدەن كوكتەمدە اۋىل ماڭىنا اعاش ەگۋ پارىز دەپ بىلگەن. ءيا، قازىر اعاش ەگۋگە ايرىقشا كوڭىل ءبولىنىپ وتىر. ماسەلەن، پرەزيدەنت ەلدە 2025 -جىلعا دەيىن 2 ميلليارد اعاش ەگۋ تۋرالى تاپسىرما بەردى.

بۇگىندە بۇل جۇمىس قالاي ءجۇرىپ جاتىر؟ پرەزيدەنتتىڭ اعاش ەگۋ تۋرالى تاپسىرما بەرۋى تەگىن ەمەس. سەبەبى جەردىڭ كوركى - اعاش. بۇل ەكولوگيالىق ماسەلەنى شەشۋدە ۇلكەن ماڭىزعا يە. بوران مەن داۋىلدان قورعان بولعان ورمان مەملەكەت باسشىسى 5 جىل ىشىندە 2 ميلليارد اعاش ەگۋ تۋرالى تاپسىرما بەرگەن ەدى. پرەزيدەنت تاپسىرماسىن ورىنداۋدا «جاسىل ايماق» كاسىپورنىنا زور مىندەت جۇكتەلىپ وتىر.

استانانى اياز بەن بوراننان، شاڭ مەن داۋىلدان قورعايتىن «جاسىل بەلدەۋدى» كۇتىپ- باپتاۋ، اۋماعىن كەڭەيتۋدە مەكەمەنىڭ ءرولى ەرەكشە. قازىر رەسپۋبليكالىق كاسىپورىنعا قاراستى اۋماق 87 مىڭ گەكتاردان اسادى. ونىڭ

46600 گەكتارىندا ورمان ءوسىپ تۇر. «جاسىل ايماقتىڭ» كوزدەگەنى - وسى القاپتى جىل ساناپ ۇلعايتۋ. كاسىپورىن جىلىنا 3 مىڭ گەكتار جەرگە دەيىن شىبىق ەگەدى. ءتىپتى 2022 -جىلى اعاش ەككەن اۋماق 4 مىڭ گەكتارعا جەتتى. مۇنىڭ سىرتىندا جىل بۇرىن ەگىلىپ، كوكتەمەي قالعان شىبىقتاردىڭ ورنىنا دا قايتالاپ اعاش ەگەدى. بۇل جۇمىستارمەن بىلتىر 4 مىڭ گەكتارعا جۋىق القاپ قامتىلدى.

ەكولوگيا جانە تابيعي رەسۋرستار مينيسترلىگىنىڭ مالىمەتىنە سايكەس 2021 -جىلدان بەرى 840 ميلليونعا جۋىق اعاش ەگىلدى. ال بيىل 360 ميلليون اعاش ەگۋ جوسپاردا تۇر. جالپى پرەزيدەنت تاپسىرماسىن ۋاقىتىندا ورىنداۋ ءۇشىن اكىمدىكتەر جۇمىستى شيراتۋى كەرەك. بۇعان دەيىن اتالعان مينيسترلىكتەگى القا وتىرىسىندا پاۆلودار، قاراعاندى، قوستاناي جانە اقتوبە وبلىستارىندا بۇل جۇمىستىڭ اقساپ تۇرعانى ايتىلعان ەدى. ەندى قالعان ەكى جىل ىشىندە 1 ميللياردتان استام اعاشتى ەگۋ وڭاي جۇمىس ەمەس. ءتىپتى اكىمدىكتەر ەگەتىن اعاش تاپپاي قالۋى دا مۇمكىن. سەبەبى ەلدەگى ورمان شارۋاشىلىقتارىنىڭ ءتالىمباقتارىندا ەڭ كوپ دەگەندە 242 ميلليون كوشەت وسىرۋگە بولادى.

تاعى ءبىر ايتىپ وتەر ماسەلە، ارال تەڭىزىنىڭ اۋماعىنا سەكسەۋىل ەگىلەدى. جوسپار بويىنشا 1 ميلليون 100 مىڭ گەكتار جەردە سەكسەۋىل تامىر جايۋعا ءتيىس. بۇل تەڭىز تابانىنان كوتەرىلەتىن تۇزدان ساقتاپ، ەكولوگيالىق اپاتتىڭ زاردابىن ازايتادى. 3 جىل ىشىندە 545 مىڭ گەكتارعا سەكسەۋىل وتىرعىزىلدى. بۇل جۇمىستارعا ۆولونتەرلەر دە ۇلەس قوسىپ وتىر. ماسەلەن، وسى ايدىڭ باسىندا 80-گە جۋىق قىز-جىگىت ەلىمىزدىڭ ءار تۇپكىرىنەن وسى ارالدا جينالدى. مىڭداعان شاقىرىمدى ءجۇرىپ ءوتىپ، ارنايى كەلگەن جاستار 5 مىڭنان استام سەكسەۋىل ەكتى. ۆولونتەرلەر بۇل كوشەتتەردىڭ تامىر الىپ كەتەتىنىنە سەنىمدى. سەبەبى اعاشتار مينەرالدى زاتتارعا باي لاي سەبەتىندە وسىرىلگەن. ياعني، سۋارۋ قاجەت ەمەس. بۇيىرسا، سەكسەۋىلدەر 4 جىلدان كەيىن تۇقىم بەرەدى.