ەلدوس سمەتوۆكە جامبىل وبلىسىنىڭ اكىمى Lexus 600 كولىگى مەن 5 بولمەلى پاتەر سىيلادى
تاراز. KAZINFORM - دزيۋدودان پاريج وليمپياداسىنىڭ جەڭىمپازى ەلدوس سمەتوۆكە جامبىل وبلىسىنىڭ اكىمى ەربول قاراشوكەيەۆ جاڭا Lexus 600 كولىگى مەن تاراز قالاسىنان 5 بولمەلى پاتەر كىلتىن تابىستادى.
وبلىس اكىمى، سونداي-اق، ەلدوستىڭ جاتتىقتىرۋشىسى عالىمجان جىلگەلديەۆكە دە Lexus اۆتوكولىگى مەن 2 بولمەلى پاتەر كىلتىن سىيلادى.
«جاقىندا عانا پاريجدە ءوتىپ جاتقان 33- جازعى وليمپيادا ويىندارىندا ەلىمىز تاريحي جەڭىسكە قول جەتكىزدى. بۇل جەڭىس جامبىلدىقتاردىڭ عانا ەمەس، بارشا قازاقستاندىقتىڭ مارتەبەسىن اسقاقتاتتى. ەل بالاسى ەلدوس سمەتوۆ دزيۋدو سپورتى بويىنشا تاۋەلسىز قازاقستاننىڭ تاريحىندا تۇڭعىش وليمپيادا چەمپيونى اتانىپ وتىر. دانقتى سپورتشى جاقسىلىق ۇشكەمپىروۆ اعامىزدان كەيىن بىردە-ءبىر قازاق بالاسى بۇل بيىكتى باعىندىرعان ەمەس. اراعا 44 جىل سالىپ ەلدوس سمەتوۆ قازاقتىڭ وسى ارمان-ماقساتىنا قول جەتكىزدى. وسى ساتتە، اۋليە اتا ءوڭىرى - چەمپيوندار ولكەسى، مىقتى باپكەرلەر ورداسى دەگىم كەلەدى. سونداي-اق، قاسيەتتى جامبىل جەرى - ەر ەلدوستىڭ جەڭىسىنەن كەيىن جاۋىرىنى جەر يىسكەمەگەن پالۋانداردىڭ استاناسى دەسەك قاتەلەسپەيمىز. قازاق سپورتىنىڭ، جامبىل سپورتىنىڭ داڭقى ارتا بەرسىن! ەلىمىزدىڭ كوك بايراعى بيىكتەن جەلبىرەي بەرسىن!» - دەدى ستاديوندا سويلەگەن سوزىندە وبلىس اكىمى.
سالتاناتتى كەشتە «الاش ۇلى» توبى، ادام، تۇرار، Kalifarniya جانە ەرنار ايدار سىندى ەسترادا جۇلدىزدارى ونەر كورسەتتى.
بۇعان دەيىن جامبىلدىقتار ەلدوس سمەتوۆتى تاراز قاقپاسىنان كۇتىپ العانىن حابارلاعان بولاتىنبىز.
اۆتور
ەلۆيرا جارىلقاسىنوۆا
