ەلدە قىتاي كولىكتەرى كوبەيدى

استانا. قازاقپارات - قاڭتار-اقپان ايلارىندا 10 مىڭ داناسى جەتكىزىلدى. بۇل بىلتىرعى سايكەس كەزەڭنەن 2 ەسە كوپ. ماماندار كولىك نارىعىنداعى احۋال جونىندە نە دەيدى؟

ەلدەگى ءاربىر ەكىنشى شەتەلدىك كولىك قىتايدان كەلەدى. ماماندار كورسەتكىشتىڭ ۇلعايا بەرەرىنە سەنىمدى. قىستا عانا كورشى ەلدەن 130 ميلليون دوللارعا 10 مىڭ كولىك جەتكىزىلدى. بۇل يمپورتتالعان تەمىر تۇلپارلاردىڭ تەڭ جارتىسى. 19 پايىزى، ياعني 4 مىڭعا جۋىعى ا ق ش-تان كەلگەن. ءتىزىمدى جاپونيا مەن كورەيا جالعايدى. بۇل ەلدەردەن 4,5 مىڭ داناسىن اكەلدىك. ساراپشىلار قىتايلىق كولىكتىڭ ساپاسى ارتا تۇسكەنىن ايتادى. ءبىراق باعاسى باسقالارىنا قاراعاندا ارزانداۋ.

ارتۋر ميسكاريان، اۆتوموبيل نارىعىن باقىلاۋ جانە تالداۋ اگەنتتىگىنىڭ باس ديرەكتورى:

- حالقىمىز سالوندار مەن جولداردا قىتايلىق كولىكتەردىڭ كوبەيۋىنە ۇيرەنىپ قالدى. 2015-2019-جىلدارى ءبىزدىڭ نارىقتا قىتايلىق اۆتوونەركاسىپتىڭ 2-3 برەندى ۇسىنىلسا، بىلتىر اياسى كەڭەيدى. ءسويتىپ بارلىق قىتايلىق برەند ەلىمىزدە 40 مىڭنان استام كولىك بىرلىگىن ساتتى.

ەلدەگى شەتەلدىك كولىكتەردىڭ ۇلەسى:

قىتاي - %42 (10 مىڭ)؛

ا ق ش - %19 (3,7 مىڭ)؛

جاپونيا - %15 (3 مىڭ)؛

كورەيا - %8 (1,6 مىڭ)

ەلەكترلى كولىكتەرگە سۇرانىس ارتتى

ەلدە ەلەكتر كارلارعا سۇرانىس ارتتى. اسىرەسە الماتىداعى ساتىلىم ۇلەسى ايتارلىقتاي جوعارى. بىلتىر عانا 3600 داناسى تىركەلگەن. بۇل ەل اۋماعىنداعى ەلەكتر كولىكتەرىنىڭ 59 پايىزىن قامتيدى. قىتايدان كەلگەنىنە قىزىعۋشىلىق كوپ دەيدى ماماندار. سەبەبى باعاسى قولجەتىمدى. وعان قوسا كەدەندىك باجدى، ياعني كولىك سالىعىن جانە كادەگە جاراتۋ الىمىن تولەۋدىڭ قاجەتى جوق.

دەسە دە، ازىرگە قۋاتتاۋ ورىندارى از. ال ۇكىمەت 2029 -جىلعا دەيىنگى جول كارتاسىن قابىلداپ، ءىرى قالالارداعى قاجەتتى ينفراقۇرىلىمدى قۇرۋعا دەن قويىپ جاتىر. مىسالى بيىل وسىنداي كولىكتەردىڭ ەركىن قوزعالىسى ءۇشىن ارنايى جولاق بولىنبەك. بارلىق تاراپتان قۋاتتاۋ ستانسالارىن سالۋ ءۇشىن سالىق الۋ ۇسىنىلدى.

ساراپشى ارتۋر ميسكاريان قاۋىپسىزدىكتى دە ەسكەرۋ كەرەك دەيدى. ول ءۇشىن جوبانى ەلەكتر جەلىلەرىمەن كەڭەسە وتىرىپ جۇزەگە اسىرۋ كەرەك دەگەن پىكىردە. ويتكەنى ەنەرگيا تاپشىلىعىن دا نازاردا ۇستاۋ قاجەت.

ارتۋر ميسكاريان، اۆتوموبيل نارىعىن باقىلاۋ جانە تالداۋ اگەنتتىگىنىڭ باس ديرەكتورى:

- ەلگە جەتكىزىلەتىن ەلەكروموبيلدەردىڭ قۇنى ورتاشا العاندا - 23 ميلليون ت گ. ءبىراق بۇعان لوگيستيكا شىعىندارىن دا قوسۋ كەرەك. كولىكتى قىتايدان الساڭىز، ول 1-2 دوللار ارالىعىندا. وعان 200 دوللارداي بولاتىن بروكەرلىك قىزمەتتى قوسۋ قاجەت. وسىنىڭ ءبارىن قوسا ەسەپتەگەندە بىلتىر كولىك قۇنى 25-26 ميلليون تەڭگەگە شىقتى.

ال ءداستۇرلى كولىكتەردى سالوننان 14,5 ميلليون تەڭگەگە الۋعا بولادى. دەمەك، ەلەكتر كولىكتەرى ديزەل نە بەنزينمەن جۇرەتىن كولىكتەردەن اناعۇرلىم قىمبات شىعادى. وعان قوسا، قالا ىشىندە بولماسا، سىرتتا ونداي تۇلپارمەن جۇيىتكۋ قيىن.

ماماندار شەتەلدىك كولىكتەردى زاڭداستىرۋدىڭ نارىققا ايتارلىقتاي اسەر ەتكەنىن ايتادى. ستاتيستيكاعا سۇيەنسەك، اقپاندا 125 مىڭ جەڭىل كولىك تىركەلدى. بۇل بۇعان دەيىنگى كەزەڭدەرمەن سالىستىرعاندا، ەداۋىر جوعارى كورسەتكىش. بىلتىر ماۋسىم ايىندا 167 مىڭ بىرلىكتى قاتارعا قوستىق. بۇل تاريحي ماكسيمۋم. الايدا زاڭداستىرۋ اياقتالعاننان كەيىن جاعداي قايتا قالىپقا كەلدى.

رەكوردتىق دەڭگەي تىركەلدى. ەلدە ادەتتە قۇنى 15 ميلليون تەڭگەگە دەيىنگى كولىكتەر ساتىلادى. بىلتىر 200 مىڭى يەسىن تاپتى. بۇل رەكوردتىق كورسەتكىش. الايدا ساراپشى دياس ءۋاليحاننىڭ ايتۋىنشا، ماساتتانۋعا ءالى ەرتە. سەبەبى قاعاز جۇزىندە قازاقستاندىقتار ساتىپ العان كولىگىن بىردەن، ەكىنشى ادامعا، ياعني سىرتقى ەلدەرگە ساتىپ وتىرعان. ال ءبىزدىڭ جىلدىق الەۋەتىمىز 120 مىڭ كولىك شاماسىندا عانا. ونىڭ 90 پايىزى نەسيەگە الىنادى.

وكىنىشكە قاراي، جاڭا تۇلپارلاردىڭ ۇلەسى تىم از. ەندى باعاعا توقتالايىن. ماماندار كولىك الۋدى جوسپارلاپ جۇرگەندەرگە اسىعىڭىز دەيدى. ءدال قازىر اۆتوديلەرلەر بىلتىرعى كولىكتەرگە جەڭىلدىك جاساپ جاتىر. ال جاڭاسى قىمباتىراق ساتىلا باستايدى. دياس ءۋاليحاننىڭ ايتۋىنشا، 2025-جىلى باعا 10-15 پايىزعا دەيىن تۇسەدى. بۇعان الماتىدا سالىنىپ جاتقان قوس اۆتو زاۋىتتىڭ ءبىرىنىڭ ىسكە قوسىلۋى سەبەپ بولماق.

www.24.kz