لاۆروۆ: رەسەي ىستانبۇلدا ۋكراينالىق تاراپقا بارلىق نەگىزگى ماسەلە بويىنشا مەموراندۋم ۇسىنۋعا دايىن
استانا. KAZINFORM - رەسەي مەن ۋكراينا دەلەگاتسيالارىنىڭ 2 -ماۋسىمدا ستامبۋلدا وتەتىن كەلەسى كەزدەسۋىنىڭ مۇمكىندىگى تۋرالى تۇركيانىڭ سىرتقى ىستەر ءمينيسترى حاكان فيدان مەن رەسەي سىرتقى ىستەر ءمينيسترى سەرگەي لاۆروۆ اراسىنداعى تەلەفون ارقىلى سويلەسۋدەن كەيىن بەلگىلى بولدى.
رەسەي س ءى م باسشىسى سەرگەي لاۆروۆ رەسەي تاراپى بارلىق نەگىزگى ماسەلە بويىنشا ۇستانىمىن باياندايتىن ءتيىستى مەموراندۋم ازىرلەگەنىن جانە ونى ستامبۋلدا ۋكراينالىق تاراپقا تاپسىرۋعا دايىن ەكەنىن مالىمدەدى.
رەسەي دەلەگاتسياسىن ر ف پرەزيدەنتىنىڭ كومەكشىسى ۆلاديمير مەدينسكي باسقارادى. ولار بۇل مەموراندۋمدى ۋكراينا دەلەگاتسياسىنا تانىستىرىپ، ستامبۋلدا وتەتىن تىكەلەي كەلىسسوزدەردىڭ ەكىنشى كەزەڭىندە قاجەتتى تۇسىنىكتەمەلەر بەرۋگە دايىن.
- ا ق ش، ساۋد ارابياسى جانە تۇركيانىڭ قولداۋىمەن رەسەي مەن ۋكراينا اراسىنداعى تىكەلەي كەلىسسوزدەردى قايتا باستاۋعا جاعداي جاسالدى. قايتا جانداندىرىلعان العاشقى كەزدەسۋ 2025 -جىلدىڭ 16- مامىرىندا ستامبۋلدا ءوتتى. سول كەلىسسوزدەر ناتيجەسىندە «1000-عا 1000» فورماتى بويىنشا تۇتقىندار الماسۋ جۇزەگە استى. سونداي-اق ماسكەۋ مەن كييەۆ تۇراقتى بەيبىت رەتتەۋگە قول جەتكىزۋ ءۇشىن ءار تاراپتىڭ ۇستانىمىن بىلدىرەتىن قۇجاتتاردى دايىنداۋعا كەلىسكەن بولاتىن، - دەدى لاۆروۆ.
رەسەي س ءى م رەسمي وكىلى ماريا زاحاروۆا «60 مينۋت» باعدارلاماسىندا سويلەگەن سوزىندە ستامبۋلداعى ەكىنشى كەزەڭگە قاتىساتىن رەسەي دەلەگاتسياسىنىڭ قۇرامى وزگەرمەيتىنىن حابارلادى.
ر ف پرەزيدەنتىنىڭ كومەكشىسى ۆلاديمير مەدينسكي سارسەنبى كۇنى ۋكراينا قورعانىس ءمينيسترى رۋستەم ۋمەروۆقا مەموراندۋمدارمەن الماسۋ ءۇشىن ناقتى كۇن مەن ورىندى ۇسىنعانىن مالىمدەدى. ول سونداي-اق تاراپتار ۇسىنىلعان كەشەندى كەلىسىمنىڭ ءار تارماعىن مازمۇندى تالقىلاۋعا دايىن ەكەنىن جانە ۋكراينالىق تاراپتىڭ راستاۋىن كۇتىپ وتىرعانىن جەتكىزدى.
ماريا زاحاروۆا رەسەيدىڭ كيەۆپەن بەيبىت رەتتەۋ جونىندەگى مەموراندۋم جوبالارىمەن الماسۋ بارىسىندا باسقا ەلدەردىڭ كومەگىنە جۇگىنۋ تۋرالى كەلىسىمدەر جاساماعانىن دا اتاپ ءوتتى.
ءوز كەزەگىندە، ۋكراينا قورعانىس ءمينيسترى رۋستەم ۋمەروۆ الەۋمەتتىك جەلىدەگى پاراقشاسىندا قاقتىعىستى رەتتەۋ جونىندەگى ۋكراينالىق ۇستانىمدى قامتيتىن مەموراندۋم جوباسىن رەسەي جاعىنا تاپسىرعانىن جازدى. سونداي-اق ول ۋكراينا تاراپىنان اتىستى تولىق ءارى ءسوزسىز توقتاتۋعا جانە ديپلوماتيالىق جۇمىستى جالعاستىرۋعا دايىن ەكەنىن راستادى.
ا ق ش پرەزيدەنتىنىڭ ارنايى وكىلى كيت كەللوگ تەلەارنالاردىڭ بىرىنە بەرگەن سۇحباتىندا رەسەي مەن ۋكراينا دەلەگاتسيالارىنىڭ مۇمكىن بولاتىن كەزدەسۋىنە وراي 2 -ماۋسىم كۇنى ستامبۋلدا ا ق ش، گەرمانيا، فرانسيا جانە ۇلى بريتانيا وكىلدەرى دە بولاتىنىن مالىمدەدى.
25- 27 -مامىر ارالىعىندا تۇركيا سىرتقى ىستەر ءمينيسترى حاكان فيدان ماسكەۋگە رەسمي ساپارمەن بارىپ، رەسەي پرەزيدەنتى ۆ. پۋتين، پرەزيدەنت كومەكشىسى ۆ. مەدينسكي، س ءى م باسشىسى س. لاۆروۆ جانە سىرتقى بارلاۋ قىزمەتىنىڭ باسشىسى س. نارىشكينمەن كەزدەستى. ساپار قورىتىندىسى بويىنشا ول رەسەيگە رەسمي ساپارى بارىسىندا اتىستى توقتاتۋ ءۇشىن ناقتى نەگىز بولا الاتىن تۇركيانىڭ شىنايى پارامەترلەرگە قاتىستى كوزقاراسىن تانىستىرعانىن ايتتى. ونىڭ سوزىنشە، رەسەي مەن ۋكراينانىڭ اتىستى توقتاتۋ رەجيمىن جۇزەگە اسىرۋ بويىنشا تالاپتارى ءارتۇرلى، جانە بۇل ايىرماشىلىقتار ءالى دە كەلىسۋدى قاجەت ەتەدى. انكارانىڭ ۋكراينا بويىنشا بەلسەندى ديپلوماتيالىق كۇش- جىگەرى ماسكەۋ، كيەۆ، ۆاشينگتون جانە ەۋروپا ەلدەرىمەن تۇراقتى بايلانىستاردى قامتيدى.
بۇعان دەيىن ىستانبۇلدا رەسەي مەن ۋكراينا دەلەگاتسيالارىنىڭ ەكى ساعاتقا سوزىلعان كەزدەسۋى اياقتالعانىن جازعان بولاتىنبىز.
