لاكشمي ميتتال قازاقستان ۇكىمەتىمەن جاسالعان مامىلە تۋرالى ايتتى

لاكشمي ميتتال قازاقستان ۇكىمەتىمەن جاسالعان مامىلەگە قاتىستى پىكىر ءبىلدىردى. Kazinform بۇل تۋرالى ArcelorMittal كورپوراتسياسىنىڭ سايتىنا سىلتەمە جاساپ حابارلايدى.

«وسى مۇمكىندىكتى پايدالانا وتىرىپ، «ارسەلورميتتال تەمىرتاۋ» كومپانياسىنىڭ قىزمەتكەرلەرىنە سوڭعى 28 جىل ىشىندە قوسقان ۇلەسى ءۇشىن العىس ايتقىمىز كەلەدى. بيزنەس ۇلكەن قيىندىقتارعا تاپ بولعانىمەن، ماقتانۋعا تۇرارلىق كوپتەگەن ەلەۋلى جەتىستىكتەر دە بار. «ارسەلورميتتال تەمىرتاۋ» «ارسەلورميتتالدىڭ» وتە قۇندى بولىگى بولدى. قازاقستان جايلى جانە بىزبەن قىزمەتتەس بولعان بارلىق ادام تۋرالى ەستەلىكتەردى وزىمىزبەن الىپ كەتىپ بارامىز»، - دەلىنگەن حابارلامادا.

قازاقستان ۇكىمەتى مەن ArcelorMittal مامىلەنى اياقتادى. ونىڭ اياسىندا ۇكىمەت باقىلاۋىنداعى جەكە كاپيتال قورىQazaqstan Investment Corporation («QIC» ) «ارسەلورميتتال تەمىرتاۋ» اق مەن «ارسەلورميتتال تۋبۋلار پروداكتس اكتاۋ» ا ق اكسيالارىنىڭ % 100- ىن ساتىپ الدى. كوپ ايلىق تالقىلاۋدىڭ ناتيجەسى بولىپ سانالاتىن بۇل كەلىسىم ستراتەگيالىق تۇرعىدان «ارسەلورميتتال تەمىرتاۋ» كومپانياسىنىڭ بولاشاعىن قامتاماسىز ەتۋگە باعىتتالعان جانە بارلىق قاتىسۋشى تاراپتىڭ ءوزارا مۇددەسىنە ساي كەلەدى.

مامىلە شارتتارىنا سايكەس اكتيۆتەر پورتفەلى «سول قالپىندا» بەرىلەدى. وسىلايشا، كەلىسىمگە قول قويىلعاننان كەيىن QIC «ارسەلورميتتال تەمىرتاۋ» كومپانياسىنىڭ قىزمەتىنە تولىق باقىلاۋ جۇرگىزۋ مەن جاۋاپكەرشىلىكتى ءوز موينىنا الدى. كومپانيا رەبرەندينگتەن ءوتىپ، جاڭا اتاۋمەن جۇمىس ىستەيتىن بولادى.

ArcelorMittal 1995 -جىلدان بەرى بولات زاۋىتى مەن بىرىكتىرىلگەن تەمىر رۋداسى مەن كومىر شاحتالارىنا يەلىك ەتتى. وسىلايشا شامامەن وتىز جىلعا جۋىق ۋاقىت ەلدەگى بىرىكتىرىلگەن بولات ءوندىرىسىن جالعاستىرۋعا ىقپال ەتتى. بولات جانە تاۋ- كەن اكتيۆتەرى جەرگىلىكتى جانە ايماقتىق ەكونوميكادا ماڭىزدى ءرول اتقارادى.

جاڭا مەنشىك يەسى رەتىندە قازاقستان ۇكىمەتىنە كومپانيانىڭ ۇزاقمەرزىمدى قارجىلىق جانە وپەراتسيالىق تۇراقتىلىعىنا قولايلى جاعداي جاساۋ مىندەتى جۇكتەلدى. اعىمداعى وپەراتسيالاردىڭ ۇزدىكسىز جۇرگىزىلۋىن قامتاماسىز ەتە وتىرىپ، بارلىق قولدانىستاعى بيزنەس- پروتسەستەردىڭ تيىمدىلىگىن ساقتاۋ عانا ەمەس، سونىمەن قاتار ارتتىرۋ وتە ماڭىزدى. بۇعان قوسا، ۇكىمەت كومپانيانىڭ يننوۆاتسيالىق دامۋ باعىتتارىن ىلگەرىلەتۋگە مىندەتتەلەدى.

مامىلە شارتتارىنا سايكەس، ArcelorMittal سوڭعى وتەماقى رەتىندە 286 ميلليون ا ق ش دوللارىن الدى. بۇل شامامەن 800 ميلليون ا ق ش دوللارىنا تەڭ كاپيتالعا تەرىس اسەر ەتتى.

ايتا كەتەيىك، بۇگىن «ارسەلورميتتال تەمىرتاۋعا» قاتىستى مامىلە اياقتالعانى حابارلانعان بولاتىن. سونداي- اق بۇگىن جاڭا ينۆەستور رەسمي تۇردە جاريالاندى. ول قازاقستاندىق كاسىپكەر اندرەي لاۆرەنتيەۆ بولاتىن. سونىمەن قاتار AMT رەسمي تۇردە QARMET دەپ وزگەرتىلدى.

اۆتور

ەلميرا ورالبايەۆا