لا ليگا باسشىسى مباپپەنىڭ ءسوزى ءۇشىن قىتايدان كەشىرىم سۇرادى

ءبارى 26 -قازاندا، دۇيسەنبى كۇنى مباپپەنىڭ The Bridge شوۋىنا بەرگەن سۇحباتى ەفيرگە شىققاننان كەيىن باستالدى. اڭگىمە بارىسىندا فۋتبولشى ءتۇرلى سۇراقتارعا ءازىل-قالجىڭمەن جاۋاپ بەرگەن. سونىڭ ءبىرى: «سەنى ەڭ قاتتى كۇلدىرگەن مەم (ءازىل-وسپاق) قايسى؟» دەگەن سۇراق بولدى.

مباپپە ءوزىن ەڭ كوپ كۇلدىرگەن مەمدە ونىڭ بەت-بەينەسى «الدەبىر ادامنىڭ، شاماسى، قىتاي ديكتاتورىنىڭ» پورترەتىنە قويىلعانىن ايتتى. الايدا فۋتبولشى ماۋ زىدۇڭنىڭ ەسىمىن تىكەلەي اتاماعان.

ماۋ زىدۇڭ — قىتاي كوممۋنيستىك پارتياسىنىڭ جەتەكشىسى ءارى قىتاي حالىق رەسپۋبليكاسىنىڭ نەگىزىن قالاۋشى. قىتايدا ونى مەملەكەتتىڭ نەگىزىن قالاعان تۇلعا رەتىندە قۇرمەتتەيدى، ال ونىڭ بەينەسى سىنعا ۇشىراتۋعا بولمايتىن تاقىرىپتاردىڭ ءبىرى سانالادى.

مباپپە بىرنەشە دەمەۋشىسىمەن كەلىسىمشارتىنان ايىرىلۋى مۇمكىن

فۋتبولشىنىڭ سۇحباتى قىتايدا ۇلكەن نارازىلىق تۋدىردى. AFP اگەنتتىگىنىڭ مالىمەتىنشە، قىتايدىڭ ەڭ ءىرى الەۋمەتتىك جەلىسى Weibo قولدانۋشىلارىنىڭ ءبىرى: «ەگەر بۇل ەلدە بيزنەس جۇرگىزگىڭ كەلسە، ءبىزدى قۇرمەتتەۋدى ۇيرەن»، - دەپ جازعان.

سپورتشىنىڭ دەمەۋشىلەرى دە ونىڭ سوزىنە نارازىلىق ءبىلدىردى. سەيسەنبى كۇنى ولاردىڭ ۇشەۋى - Dongpeng سۋسىن ءوندىرۋشىسى، Mengniu ءسۇت ونىمدەرى كومپانياسى جانە Milkground ىرىمشىك ءوندىرۋشىسى - كيليان مباپپەمەن جارنامالىق كەلىسىمشارتتارىن دەرەۋ بۇزاتىنىن مالىمدەدى.

- ءبىزدىڭ كومپانيا ۇلتتىق سەزىمدەردى قورلايتىن كەز كەلگەن ارەكەتكە مۇلدەم توزبەۋ ساياساتىن ۇستانادى، - دەلىنگەن Dongpeng كومپانياسى مالىمدەمەسىندە.

ال Mengniu كومپانياسى مباپپەمەن ىنتىماقتاستىقتىڭ بارلىق ءتۇرىن دەرەۋ توقتاتاتىنىن حابارلادى.

بۇل جاعدايعا قىتاي سىرتقى ىستەر مينيسترلىگى دە پىكىر ءبىلدىردى. ۆەدومستۆو وكىلدەرىنىڭ ايتۋىنشا، «قىتاي حالقىنىڭ سەزىمىنە تيەتىن سوزدەر قوعامنىڭ بارلىق توپتارىنىڭ قارسىلىعىن تۋدىرماي قويمايدى».

قىتاي يسپانيا چەمپيوناتىنىڭ ماتچتارىن كورسەتۋدى توقتاتتى

قىتايدىڭ ورتالىق تەلەارناسى مباپپە قاتىساتىن يسپانيا چەمپيوناتى - لا ليگا ماتچتارىنىڭ كورسەتىلىمىن ۋاقىتشا توقتاتتى.

ءوز كەزەگىندە لا ليگا پرەزيدەنتى حاۆەر تەباس الەۋمەتتىك جەلىدە مالىمدەمە جاريالاپ، قىتايدان كەشىرىم سۇرادى.

- كيليان مباپپەنىڭ قىتايدا جاعىمسىز سەزىم مەن رەنىش تۋدىرعان سوزدەرىنە قاتتى وكىنەمىز. ونىڭ قانداي زيان كەلتىرگەنىن تۇسىنەمىز، - دەپ جازدى ول.

تەباستىڭ ايتۋىنشا، لا ليگا جاعدايدى رەتتەۋ ءۇشىن بارلىق مۇمكىن شارانى قابىلداپ، قىتايداعى سەرىكتەستەرىمەن جانە ارىپتەستەرىمەن تىكەلەي جۇمىس ىستەپ جاتىر.

- ءبىزدىڭ قىتايعا، ونىڭ حالقىنا جانە مەملەكەتتىك مەكەمەلەرىنە دەگەن قۇرمەتىمىز وزگەرمەيدى. كوپ جىل بويى قالىپتاسقان قارىم-قاتىناس ءبىر عانا وقيعانىڭ كەسىرىنەن بۇزىلماۋى كەرەك، - دەپ اتاپ ءوتتى لا ليگا باسشىسى.

بۇل جانجال مباپپەنىڭ قىتايداعى ميلليونداعان جانكۇيەرىنەن ايىرىلۋىنا اكەپ سوعۋى مۇمكىن. بۇعان دەيىن «رەال» شابۋىلشىسى بۇل ەلدە ۇلكەن تانىمالدىققا يە بولعان.

قىتايلىق جانكۇيەرلەر مباپپەنى «نيندزيا تاسباقالار» مۋلتسەريالىنداعى دوناتەللوعا ۇقساستىعىنا بايلانىستى ەركەلەتىپ «گۋيگۋي» (تاسباقا) دەپ اتاعان.

سوڭعى الەم چەمپيوناتى كەزىندە قىتاي كورەرمەندەرىنە فرانسيا قۇراماسىنىڭ كاپيتانى Dongpeng ەنەرگەتيكالىق سۋسىنىن ىشەتىن جارناما ءجيى كورسەتىلگەن ەدى.

بۇدان بۇرىن قىتايدا مباپپە قاتىسقان ماتچتار مەن جارنامالاردى كورسەتۋ توقتاتىلعانىن جازعانبىز.

اۆتورلار

اينۇر تۋماكبايەۆا