ەلدە ينۆەستورلارمەن سوتقا دەيىنگى داۋدى رەتتەۋ جونىندەگى كوميسسيا قۇرىلادى

ءتيىستى بۇيرىققا ق ر باس پروكۋرورى 2026 -جىلعى 20 -شىلدەدە قول قويدى. قۇجات 2026 -جىلعى 16 -تامىزدان باستاپ قولدانىسقا ەنگىزىلەدى.

قۇجاتقا سايكەس، ينۆەستيتسيالىق قىزمەتكە بايلانىستى داۋدى سوتقا دەيىن رەتتەۋ تۋرالى ينۆەستوردىڭ، مەملەكەتتىك ورگاننىڭ، اكىمدىكتىڭ، مەملەكەتتىك مەكەمەنىڭ، كۆازيمەملەكەتتىك سەكتور سۋبەكىسىنىڭ نەمەسە ينۆەستيتسيالىق پروكۋروردىڭ ءوتىنىشى كوميتەتكە تۇسكەننەن كەيىن كوميسسيا قۇرىلادى. كوميسسيانى قۇرۋ تۋرالى شەشىمدى كوميتەت ءتوراعاسى نەمەسە ونىڭ مىندەتىن اتقارۋشى جەتى جۇمىس كۇنى ىشىندە قابىلدايدى.

سونىمەن قاتار، ەگەر ءوتىنىش كونستيتۋتسيالىق زاڭدا بەلگىلەنگەن مەرزىمنەن كەش بەرىلسە، كوميتەت ونى قاراۋدان باس تارتۋعا قۇقىلى.

كوميسسيانىڭ بەس مۇشەسى بولادى. ونىڭ قۇرامىنا كوميتەتتىڭ قۇرىلىمدىق بولىمشەلەرىنىڭ باسشىلارى، ق ر سىرتقى ىستەر مينيسترلىگى ينۆەستيتسيالار كوميتەتىنىڭ وكىلى، سونداي-اق «اتامەكەن» ۇلتتىق كاسىپكەرلەر پالاتاسى باسقارماسىنىڭ مۇشەسى ەنەدى. كوميسسيانىڭ قۇرامى، ءتوراعاسى جانە حاتشىسى جەكە بۇيرىقپەن بەكىتىلەدى.

ۇسىنىلعان ماتەريالداردى جان-جاقتى قاراستىرۋ ءۇشىن، قاجەت بولعان جاعدايدا كوميسسيا وتىرىسىنا مۇددەلى مەملەكەتتىك ورگانداردىڭ وكىلدەرى مەن ءتيىستى سالا ساراپشىلارى تارتىلۋى مۇمكىن.

كوميسسيانىڭ جۇمىس ورگانى قۇرىلعان كۇننەن باستاپ ءۇش جۇمىس كۇنى ىشىندە ماتەريالداردى دايىنداپ، وتىرىستىڭ كۇن ءتارتىبىنىڭ جوباسىن جاساپ، ونى ۇيىمداستىرۋدى قامتاماسىز ەتۋى كەرەك.

وتىرىس قورىتىندىسى بويىنشا حاتتاما راسىمدەلەدى. سونىڭ نەگىزىندە كوميتەت قورىتىندى شىعارادى.

جاڭا قاعيدا 2026 -جىلعى 16-تامىزدان باستاپ كۇشىنە ەنەدى.

ايتا كەتەيىك، بۇعان دەيىن پروكۋراتۋرا 5,8 ميلليارد تەڭگەلىك ينۆەستجوبانى زاڭسىز تەكسەرۋدەن اراشالاپ قالعانىن جازعانبىز.